’’ہیرا پھیری ۳‘‘ کو ایک اور بڑا دھچکا لگا ہے کیونکہ ہدایتکارپریہ درشن نے تصدیق کی ہے کہ وہ اب اس منصوبے کا حصہ نہیں ہیں۔ تاہم، پروڈیوسر فیروز ناڈیاڈوالا کا کہنا ہے کہ فلم پر کام اب بھی جاری ہے۔

فلم ’’ہیرا پھیری ۳‘‘ فی الحال بنتی نظر نہیں آ رہی اور یہ اس مقبول فرنچائز کے مداحوں کے لیے یقیناً ایک افسوسناک خبر ہے۔ اعلان کے بعد سے اس فلم کو بار بار مشکلات اور رکاوٹوں کا سامنا کرنا پڑا ہے۔ اب سب سے بڑا جھٹکا خود ہدایت کار پریہ درشن کی علیحدگی کی صورت میں سامنے آیا ہے۔
فلم کا ہندی ورژن قانونی تنازعات میں گھرا ہوا ہے۔  تمام صورتحال کے درمیان پروڈیوسر فیروز ناڈیاڈوالا نے کہا ہے کہ فلم پر کام جاری ہے، لیکن اصل ہدایت کار کے بغیر۔ دوسری جانب ’’بھوت بنگلہ‘‘ کے ہدایت کار پریہ درشن نے بھی اس بات کی تصدیق کی، مگر ساتھ ہی یہ بھی کہا کہ ’’ہیرا پھیری ۳‘‘ کبھی سنیما گھروں کی زینت نہیں بنے گی۔
 پریہ درشن نے ’’ہیرا پھیری ۳‘‘ سے علیحدگی اختیار کر لی
اپنے منصوبوں سے متعلق معلومات کھل کر شیئر کرنے والے پریہ درشن نے اس بات کی تصدیق کی ہے کہ وہ اب اس فلم کا حصہ نہیں رہے، جس سے وہ کئی برسوں سے وابستہ تھے۔انہوں نے کہا’’فیروز نے جو کچھ کہا ہے، وہ درست ہے۔ اس وقت میرا ’’ہیرا پھیری۳‘‘ سے کوئی تعلق نہیں ہے۔‘‘تاہم، انہوں نے یہ بھی کہا کہ وہ خود اس منصوبے کے مستقبل کے بارے میں پُراعتماد نہیں ہیں۔ ان کے مطابق’’جہاں تک میری معلومات ہیں،’’ہیرا پھیری ۳‘‘ متعدد قانونی مسائل اور ذاتی تنازعات کی وجہ سے کبھی بھی ریلیز نہیں ہوگی۔ میں اس کا حصہ ہوں یا نہیں، اس سے کوئی فرق نہیں پڑتا۔‘‘
واضح رہے کہ ’’ہیرا پھیری‘‘ کے پہلے ہندی ورژن کی ہدایت کاری بھی پریہ درشن نے کی تھی۔ یہ ۱۹۸۹ء کی ملیالم فلم ’’رام جی راؤ اسپیکنگ‘‘ کا ری میک تھی، جسے  صدیق لال نے ڈائریکٹ کیا تھا۔

یہ بھی پڑھئے:اداکارہ کریتی سینن نے انجینئرنگ چھوڑ کر اداکاری میں قدم رکھا ہے

 فیروز ناڈیاڈوالا نے کیا کہا؟
ایک علیحدہ انٹرویو میں فیروز ناڈیاڈوالا نے بھی تصدیق کی کہ پریہ درشن ’’ہیرا پھیری۳‘‘ کے تیسرے حصے کا حصہ نہیں ہیں۔
’’ہیرا پھیری ۳‘‘تنازع
یہ فلم، جس میں ایک بار پھر اکشے کمار، پریش راول اور سنیل شیٹی کی مشہور تین رکنی جوڑی کو اکٹھا لانے کا منصوبہ تھا، زیادہ تر اپنے تنازعات کی وجہ سے خبروں میں رہی ہے۔ پریش راول کے فلم چھوڑنے اور بعد ازاں واپس آنے کے بعد، فلم اس وقت قانونی مشکلات میں گھِر گئی جب پروڈکشن کمپنی  سیون آرٹس انٹرنیشنل  نے  مدراس ہائی کورٹ سے رجوع کیا۔ کمپنی نے دعویٰ کیا کہ ’’ہیرا پھیری ‘‘ چونکہ ۱۹۸۹ء کی ملیالم فلم ’’رام جی راؤ اسپیکنگ‘‘ کا ری میک ہے، اس لیے اس کے حقوق ان کے پاس ہیں۔

یہ بھی پڑھئے:پیراگوئے نے جرمنی کو پنالٹی شوٹ آؤٹ میں شکست دے کر ورلڈ کپ سے باہر کر دیا

 کمپنی نے پروڈیوسر فیروز ناڈیاڈوالا کے خلاف مقدمہ دائر کرتے ہوئے مؤقف اختیار کیا کہ انہیں صرف ایک ہندی ورژن بنانے کی اجازت دی گئی تھی۔ پنک ولا سے گفتگو کرتے ہوئے  وجے کما ر نے کہا کہ ان کی کمپنی کے پاس اس فرنچائز کی ’ مکمل اور واضح‘ ملکیت موجود ہے۔ انہوں نے مزید کہا’’ اس شخص (فیروز ناڈیاڈوالا) نے ہماری اجازت کے بغیر دوسرا حصہ بنایا۔ دوسری فلم کے بعد اس نے تیسرے حصے کا بھی اعلان کر دیا۔ تب ہمیں اس صورتحال کا علم ہوا، ہم نے انہیں خط بھی لکھا، لیکن وہ مسلسل ہم سے بچتے رہے۔‘‘