ہدایتکار شوجیت سرکار، جنہوں نے ’’وکی ڈونر‘‘ اور ’’پیکو‘‘ جیسی کامیاب کامیڈی فلمیں بنائیں، اب ایک نئی افسانوی کامیڈی فلم کے ساتھ اس صنف میں واپسی کیلئے تیار ہیں۔ فلم میں منوج باجپائی اور راجکمار راؤ مرکزی کردار ادا کریں گے جبکہ کہانی مہابھارت کے ایک اہم باب کی مزاحیہ انداز میں نئی تجدید پر مبنی ہوگی۔

معروف ہدایت کار شوجیت سرکار، جو ’’اکتوبر‘‘، ’’سردار ادھم‘‘، ’’وکی ڈونر‘‘ اور ’’پیکو‘‘ جیسی منفرد اور جذباتی فلموں کیلئے جانے جاتے ہیں، اب ایک بار پھر کامیڈی کی صنف میں قدم رکھنے جا رہے ہیں۔ شائقین کے مطابق ان کی کامیڈیز ہمیشہ ایک خاص دلکشی رکھتی ہیں، یہی وجہ ہے کہ نئی فلم کی خبر نے جوش و خروش پیدا کر دیا ہے۔ ایک قریبی ذرائع کے مطابق’’شوجیت سرکار کئی برسوں بعد کامیڈی میں واپسی کر رہے ہیں، لیکن اس بار ایک بالکل نئی صنف کے ساتھ۔ وہ مزاح کے ایک ایسے پہلو کو دریافت کرنے جا رہے ہیں جسے ہندوستانی سنیما میں بہت کم چھوا گیا ہے۔‘‘

یہ بھی پڑھئے: کیا کالم ٹرنر اگلے جیمز بونڈ (007) ہوسکتے ہیں؟

منصوبے کے بارے میں بتایا گیا ہے کہ شوجیت سرکار مہابھارت کے ایک اہم باب کو مزاحیہ اور جدید انداز میں دوبارہ تخلیق کریں گے۔ فلم کی ساخت افسانوی کامیڈی ڈرامے جیسی ہوگی جو کہ کلاسک داستان سے جڑی رہے گی مگر اسے موجودہ دور کے عناصر کے ساتھ متوازن کرے گی۔ فلم کے مرکزی کرداروں کیلئے منوج باجپائی اور راجکمار راؤ کا انتخاب کیا گیا ہے، یہ دونوں ہی اپنی ہمہ جہت پرفارمنس کیلئے مشہور ہیں۔ ذرائع کے مطابق یہ جوڑی اس اسکرپٹ میں ’’غیر روایتی مگر بےحد مضبوط‘‘ کرداروں میں نظر آئے گی۔

یہ بھی پڑھئے: پرتیک سمیتا پاٹل اپنی والدہ کی وراثت کو آگے بڑھارہے ہیں

فلم کو ’’سنکی کامیڈی‘‘ اور ’’اختراعی افسانوی مزاح‘‘ کا بہترین امتزاج کہا گیا ہے۔ اس میں اساطیری عناصر برقرار رہیں گے مگر انہیں ایک نئے، تخلیقی زاویے سے پیش کیا جائے گا۔ اس منفرد انداز کی وجہ سے فلم کو سرکار کے کریئر کے ’’سب سے تجرباتی پروجیکٹس‘‘ میں سے ایک قرار دیا جا رہا ہے۔ خیال رہے کہ شوجیت سرکار نے آخری بار ابھیشیک بچن کی فلم ’’آئی وانٹ ٹو ٹاک‘‘ کی ہدایتکاری کی، جو کینسر سے جوجھتے ایک شخص اور اس کی بیٹی کے پیچیدہ رشتے پر مبنی ایک جذباتی ڈرامہ تھی۔ ان کی نئی کامیڈی فلم کی شوٹنگ ۲۰۲۶ء میں شروع ہوگی۔