سوہا علی خان نے حال ہی میں اپنے بچپن کی خوبصورت یادیں مداحوں کے ساتھ شیئر کیں۔ انہوں نے اپنے پسندیدہ کھلونا کتے ’’ایلیوٹ‘‘ کے ساتھ گزری ہوئی گرمیوں کی تعطیلات، اپنے بہن بھائیوں سیف علی خان اور صبا پٹودی کے ساتھ تخیلاتی کھیل، اور اب اپنی بیٹی عنایا میں وہی تخلیقی صلاحیتیں دیکھنے کے جذباتی تجربے پر بات کی۔

سوہا علی خان نے حال ہی میں اپنے انسٹاگرام اکاؤنٹ پر ایک جذباتی اور پرانی یادوں سے بھرپور ویڈیو شیئر کیا، جس میں انہوں نے اپنے بچپن کے پسندیدہ کھلونے ’’ایلیوٹ‘‘ کے بارے میں گفتگو کی۔ یہ ویڈیو ’’ٹوائے اسٹوری ۵‘‘ کی ریلیز کے موقع پر شیئر کیا گیا جو ۱۹؍ جون ۲۰۲۶ء کو سنیما گھروں میں نمائش کے لیے پیش کی جا رہی ہے۔ اپنی یادوں کو تازہ کرتے ہوئے سوہا علی خان نے بتایا کہ ان کی گرمیوں کی چھٹیوں کی سب سے خوبصورت یادوں میں اپنے بھائی سیف علی خان اور صبا پٹودی کے ساتھ بیٹھ کر کہانیاں بنانا شامل تھا۔

 

 

 

 

 

View this post on Instagram

 

 

 

 

 

 

 

 

 

 

 

A post shared by Soha (@sakpataudi)

انہوں نے کہا کہ ’’موسمِ گرما کی میری پسندیدہ یادوں میں سے ایک یہ ہے کہ میں اپنے بھائی اور بہن کے ساتھ بیٹھتی تھی اور ہم اپنے پسندیدہ کھلونے ایلیوٹ کے گرد نئی نئی کہانیاں تخلیق کرتے تھے۔ ہر شخص کہانی میں اپنا موڑ شامل کرتا تھا اور دن کے اختتام تک ایلیوٹ دنیا کا سفر کر چکا ہوتا، اسرار حل کر چکا ہوتا اور نئے دوست بنا چکا ہوتا۔‘‘ سوہا نے ان تخیلاتی کھیلوں کا بھی ذکر کیا جن میں ان کے بھائی گھر کے مختلف حصوں میں سراغ چھپاتے تھے، جبکہ ان کی بہن خزانے کے نقشے بناتی تھیں۔

انہوں نے یاد کرتے ہوئے کہا کہ ’’میرے بھائی گھر بھر میں سراغ چھپاتے، میری بہن خزانے کا نقشہ تیار کرتی اور میں ایلیوٹ کے ذریعے تحقیقات کی قیادت کرتی تھی۔ کئی کئی گھنٹے یوں ہی گزر جاتے تھے جب ہم صرف اپنے تخیل میں موجود رازوں کو حل کرنے کی کوشش کرتے تھے۔‘‘ سوہا کے مطابق، اصل خوشی کھلونے میں نہیں بلکہ ان کہانیوں اور تخیلاتی دنیا میں تھی جو وہ اس کے گرد تخلیق کرتے تھے۔ اب خود ایک ماں ہونے کے ناطے، سوہا علی خان اپنی بیٹی عنایا میں وہی تخلیقی صلاحیتیں دیکھتی ہیں۔

یہ بھی پڑھئے: ویر پہاڑیہ اور ورون شرما ایکشن تھریلر فلم ’’نام۔ ٹو لِو اِز وار‘‘ میں جلوہ گر

انہوں نے بتایا کہ ’’جب عنایا پیدا ہوئی تو میری خواہش تھی کہ وہ بھی اپنی تخیلاتی دنیا بنانے کی وہی خوشی محسوس کرے جو میں نے بچپن میں محسوس کی تھی۔ اسی لیے میں نے ایلیوٹ اسے دے دیا۔ اب اس کے پسندیدہ کھلونے بھی بھرے ہوئے جانور ہیں۔ کبھی وہ انہیں پڑھاتی ہے، کبھی ان کے لیے کھانا بناتی ہے اور کبھی انہیں سبق سکھاتی ہے۔‘‘ انہوں نے مزید کہا کہ اپنی بیٹی کے تخیل کو پروان چڑھتے دیکھنا ان کی زندگی کے خوبصورت ترین تجربات میں سے ایک ہے۔ اپنی پوسٹ کے کیپشن میں سوہا علی خان نے ’’ٹوائے اسٹوری ۵‘‘ کا حوالہ دیتے ہوئے لکھا کہ فلم نہ صرف مداحوں کو ایک بار پھر ووڈی، بز لائٹ ایئر، جیسی اور دیگر محبوب کرداروں سے ملاتی ہے بلکہ آج کے دور میں ایک اہم سوال بھی اٹھاتی ہے کہ اسکرینز کے بڑھتے ہوئے استعمال کے درمیان بچوں کے تخیل اور تخلیقی صلاحیتوں کو کیسے زندہ رکھا جا سکتا ہے۔

انہوں نے اپنے مداحوں سے بھی سوال کیا کہ ان کے بچپن کا وہ کون سا کھلونا تھا جس کے بغیر وہ بڑے نہیں ہو سکتے تھے اور ان کا تخیل انہیں کہاں کہاں لے گیا۔ واضح رہے کہ ڈزنی اور پکسر اینی میشن اسٹوڈیوز کی مشترکہ پیشکش ’’ٹوائے اسٹوری ۵‘‘ ۱۹؍ جون ۲۰۲۶ء کو ہندوستان میں انگریزی اور ہندی زبانوں میں ریلیز کی جا رہی ہے۔