بالی ووڈ اداکار سلمان خان کی جانب سے سماجی کارکن سونم وانگچک سے بھوک ہڑتال ختم کرنے اور طلبہ سے احتجاج ختم کر کے گھروں کو لوٹنے کی اپیل سوشل میڈیا پر میمز کا موضوع بن گئی۔ خاص طور پر ان کا جملہ ’’Sonam, it’s done, bro‘‘ صارفین کی توجہ کا مرکز بن گیا، جس پر مزاحیہ تبصروں اور میمز کی بھرمار دیکھنے میں آئی۔

NEET کے مبینہ پرچہ لیک کے خلاف جاری احتجاج کے دوران بالی ووڈ اداکار سلمان خان کی ایک سوشل میڈیا پوسٹ غیر متوقع طور پر میمز اور مذاق کا موضوع بن گئی۔ سلمان نے وزیراعظم نریندر مودی کی جانب سے سخت کارروائی کی یقین دہانی کے بعد سماجی کارکن سونم وانگچک سے بھوک ہڑتال ختم کرنے اور احتجاج کرنے والے طلبہ سے گھروں کو واپس جانے کی اپیل کی تھی۔ اپنی پوسٹ میں سلمان خان نے لکھا کہ انہیں یقین ہے کہ حکومت پرچہ لیک کے ذمہ دار افراد کے خلاف سخت کارروائی کرے گی، اس لیے طلبہ کو اب اپنے والدین کے پاس واپس جانا چاہیے۔ انہوں نے سونم وانگچک سے مخاطب ہوتے ہوئے لکھا، ’’Sonam, it’s done, bro. Don’t extend this… If you want, will send you food from home.‘‘ یہی جملہ سوشل میڈیا پر تیزی سے وائرل ہو گیا۔

The students are at top priority, educationally n security-wise, so they need not worry and have their parents worried for them. The Honorable Prime Minister has tweeted, and I am sure that he will take strict action against all those people who are responsible for this leak. So… pic.twitter.com/89Ykfs5r4k

— Salman Khan (@BeingSalmanKhan) July 23, 2026

ایکس ، انسٹاگرام اور فیس بک پر صارفین نے اس جملے پر مختلف انداز میں میمز اور طنزیہ تبصرے شیئر کیے۔ کئی افراد نے سلمان خان کے منفرد اندازِ تحریر اور ’’برو‘‘ کے استعمال کو ان کی مخصوص شخصیت سے جوڑا، جبکہ بعض صارفین نے اس جملے کو فلمی مکالموں اور مقبول میمز کے ساتھ ملا کر نئے طنزیہ مواد تخلیق کیے۔ دوسری جانب کچھ صارفین نے سلمان خان کے پیغام کا دفاع بھی کیا۔ ان کا کہنا تھا کہ اداکار کا مقصد کسی سیاسی بحث میں پڑنے کے بجائے صرف سونم وانگچک کی صحت کی فکر کا اظہار کرنا اور طلبہ سے پرامن طور پر احتجاج ختم کرنے کی اپیل کرنا تھا۔ ان کے مطابق سوشل میڈیا پر صرف ایک جملے کو لے کر پورے پیغام کا مذاق بنانا مناسب نہیں۔ 
سلمان خان کی پوسٹ پر بننے والے میمز اس وقت سامنے آئے ہیں جب NEET احتجاج کو ملک بھر میں غیر معمولی توجہ حاصل ہے اور متعدد فلمی شخصیات بھی مختلف انداز میں اس معاملے پر اپنی رائے کا اظہار کر چکی ہیں۔