یش راج فلمز (YRF) نے اپنی بلاک بسٹر رومانوی فلم ’’سیارہ‘‘ کی پہلی سالگرہ کے موقع پر مداحوں کے لیے خصوصی کلیکٹرز ایڈیشن ونائل ایل پی (LP) متعارف کرانے کا اعلان کیا ہے۔ فلم نے دنیا بھر میں تقریباً ۵۸۰؍ کروڑ روپے کا کاروبار کرتے ہوئے ہندوستانی سنیما کی سب سے زیادہ کمائی کرنے والی رومانوی فلم کا اعزاز حاصل کیا تھا۔ اس خصوصی پیک میں فلم کے تمام گانے، بیک گراؤنڈ اسکور، یادگار مکالمے، خصوصی ڈائری، سیاہی والا قلم اور منفرد بک مارکس شامل کیے گئے ہیں، جبکہ یہ ایڈیشن دنیا بھر کے شائقین کے لیے دستیاب ہوگا۔

یش راج فلمز (YRF) کی سپر ہٹ رومانوی فلم ’’سیارہ‘‘ نے نہ صرف باکس آفس پر غیر معمولی کامیابی حاصل کی بلکہ حالیہ برسوں میں ہندوستانی سنیما کی سب سے بڑی کامیابیوں میں بھی اپنا نام درج کرایا۔ اب فلم کی پہلی سالگرہ کے موقع پر یش راج فلمز نے مداحوں کے لیے ایک خصوصی کلیکٹرز ایڈیشن ونائل ایل پی (Vinyl LP) جاری کرنے کا اعلان کیا ہے۔ موہت سوری کی ہدایت کاری اور یش راج فلمز کے چیف ایگزیکٹو آفیسر اکشے ودھانی کی پروڈیوس کردہ ’’سیارہ‘‘ نے دنیا بھر میں تقریباً ۵۸۰؍  کروڑ روپے کا کاروبار کیا، جس کے بعد اسے ہندوستانی سنیما کی تاریخ کی سب سے زیادہ کمائی کرنے والی رومانوی فلم قرار دیا گیا۔

 

 

 

 

 

View this post on Instagram

 

 

 

 

 

 

 

 

 

 

 

A post shared by Yash Raj Films (@yrf)

فلم نے اپنی نئی مرکزی جوڑی آہان پانڈے اور انیت پڈا کو راتوں رات شہرت کی بلندیوں تک پہنچایا اور انہیں جین زی کے نمایاں ابھرتے ہوئے ستاروں میں شامل کر دیا۔ فلم کے مداحوں کے لیے سب سے یادگار مناظر میں سے ایک ویمبلے اسٹیڈیم کا وہ جذباتی لمحہ ہے، جہاں فلم کے مرکزی کردار کرش کپور اپنی محبوبہ وانی بترا کو اسٹیڈیم کی بڑی اسکرین پر ان کی آنکھوں سے پہچان لیتا ہے، جبکہ فلم کا اختتامی کنسرٹ بھی دونوں کرداروں کے دوبارہ ملاپ کی یادگار تصویر پیش کرتا ہے۔ یش راج فلمز کے مطابق اسی یادگار لمحے کو مدنظر رکھتے ہوئے فلم کی پہلی سالگرہ پر اس خصوصی ونائل ایل پی کی رونمائی کا فیصلہ کیا گیا۔ یہ دو ڈسکوں پر مشتمل کلیکٹرز ایڈیشن فلم کے مکمل موسیقی کے سفر کو سمیٹتا ہے۔

یہ بھی پڑھئے: ایس ایس راجامولی نے ’’وارانسی‘‘ سے پرینکا چوپڑا کی پہلی جھلک جاری کی

پہلی ڈسک (LP-1) میں فلم کے تمام ۹؍ مقبول گانے شامل کیے گئے ہیں، جبکہ دوسری ڈسک (LP-2) میں مجموعی طور پر ۲۵؍ ٹریکس موجود ہیں، جن میں ۱۶؍ اصل بیک گراؤنڈ اسکور کمپوزیشنز اور فلم کے ۹؍ یادگار مکالمے شامل ہیں تاکہ شائقین فلم کے ہر جذباتی لمحے کو دوبارہ محسوس کر سکیں۔ اس خصوصی کلیکٹرز پیک میں ایک خوبصورت ’سیارہ ڈائری‘ بھی شامل کی گئی ہے، جس میں فلم سے وابستہ نمایاں شخصیات کے خصوصی نوٹس موجود ہیں۔
ڈائری میں اکشے ودھانی، موہت سوری، آہان پانڈے، انیت پڈا، تنشک باغچی، فہیم عبداللہ، ارسلان نظامی، ارشاد کامل، دی رشک، سچیت پرمپرا، متھن اور جان اسٹیورٹ ایڈوری کے پیغامات شامل کیے گئے ہیں۔ اس کے علاوہ مداحوں کے لیے وانی کی نوٹ بک سے متاثر ایک خصوصی سیاہی والا قلم اور کرش اور وانی کے دو منفرد ڈیزائن کردہ بک مارکس بھی اس کلیکٹرز ایڈیشن کا حصہ ہیں۔ اس موقع پر گفتگو کرتے ہوئے یش راج فلمز کے سی ای او اکشے ودھانی نے کہا کہ ’’سیارہ‘‘ ان کے لیے صرف ایک فلم نہیں بلکہ ایک جذباتی سفر تھا، کیونکہ اس نے یش راج فلمز کی رومانوی فلموں کی روایت کو نئی زندگی بخشی۔ انہوں نے کہا کہ ان کی خواہش تھی کہ صرف ایک فلم ہی نہیں بلکہ ایسا موسیقی کا البم بھی تخلیق کیا جائے جو برسوں تک لوگوں کے دلوں میں زندہ رہے۔

یہ بھی پڑھئے: امیتابھ بچن نے گووندا ہی نہیں ان کے والد کے ساتھ بھی کام کیا ہے

اکشے ودھانی نے مزید کہا کہ فلم کی پہلی سالگرہ پر اس خصوصی ونائل ایل پی کی پیشکش کے ذریعے مداحوں کو ’’سیارہ‘‘ کی موسیقی، آوازوں، مکالموں اور جذبات کو ایک نئے انداز میں دوبارہ جینے کا موقع فراہم کیا جا رہا ہے، تاکہ وہ اس یادگار فلم کو ہمیشہ اپنے پاس محفوظ رکھ سکیں۔ فلم کے ہدایت کار موہت سوری نے کہا کہ ہر محبت کی کہانی کی اصل روح اس کی موسیقی ہوتی ہے، اور ’’سیارہ‘‘ کے معاملے میں بھی یہی موسیقی کرش اور وانی کے رشتے کی گہرائی، معصومیت اور جذبات کو ناظرین تک پہنچانے کا سب سے مضبوط ذریعہ بنی۔ انہوں نے کہا کہ اکثر لوگ وقت کے ساتھ فلم کی کہانی بھول جاتے ہیں، لیکن اگر موسیقی دل کو چھو جائے تو وہ ہمیشہ زندہ رہتی ہے۔ ان کے بقول، ’’سیارہ‘‘ کا بنیادی مقصد ہی یہ تھا کہ ہر گانا سننے والے کو اپنی کسی خوبصورت یاد، کسی لمحے یا کسی محبت کی طرف واپس لے جائے۔

یہ بھی پڑھئے: کاجل اور شریاس نے’آپ کی تھالی میں کیا ہے‘ چیلنج سے فوڈ سیفٹی پر بڑھائی بیداری

موہت سوری نے مزید کہا کہ یہی وجہ ہے کہ یہ ونائل ایل پی محض چند گانوں کا مجموعہ نہیں بلکہ فلم کے پورے جذباتی سفر کو دوبارہ محسوس کرنے کا ایک منفرد تجربہ ہے، جس کے ہر حصے کو انتہائی احتیاط اور محبت سے تیار کیا گیا ہے۔ یش راج فلمز کے مطابق ’’سیارہ‘‘ کلیکٹرز ایڈیشن ونائل ایل پی دنیا بھر کے شائقین کے لیے دستیاب ہوگا۔