جنوبی ہند کے سپر اسٹار وجے دیوراکونڈا کی انتہائی متوقع فلم ’رن بالی‘ (Ranabaali) کا پہلا ٹیزر جاری کردیا گیا ہے، جس نے ریلیز ہوتے ہی فلمی شائقین میں زبردست تجسس پیدا کردیا۔ راہل سنکرتیان کی ہدایت کاری میں بننے والی یہ فلم ایک تاریخی پیریڈ ایکشن ڈراما ہے۔

جنوبی ہند کے سپر اسٹار وجے دیوراکونڈا  کی انتہائی متوقع فلم  ’رن بالی‘ (Ranabaali)  کا پہلا ٹیزر جاری کردیا گیا ہے، جس نے ریلیز ہوتے ہی فلمی شائقین میں زبردست تجسس پیدا کردیا۔ راہل سنکرتیان کی ہدایت کاری میں بننے والی یہ فلم ایک تاریخی پیریڈ ایکشن ڈراما ہے، جس میں وجے دیوراکونڈا ایک ایسے جنگجو کے کردار میں نظر آرہے ہیں جو برطانوی استبداد کے خلاف بغاوت کا علم بلند کرتا ہے۔ 

یہ بھی پڑھئے:عمران طاہر کی خطرناک گیندبازی، گیانا امیزون نے سینٹ لوسیا کنگز کو شکست دی

تقریباً دو منٹ سے زائد دورانیے کے ٹیزر میں ۱۹؍ویں صدی کے جنوبی ہندوستان کی ایک انتہائی پُرتشدد اور مشکل تصویر پیش کی گئی ہے۔ کہانی ۱۸۷۶ء تا۱۸۷۸؍ کے مدراس قحط  کے پس منظر میں ترتیب دی گئی ہے، جسے ہندوستان کی تاریخ کے بدترین انسانی بحرانوں میں شمار کیا جاتا ہے۔ فلم میں قحط، بھوک، ظلم اور برطانوی نوآبادیاتی نظام کے خلاف عوام کی مزاحمت کو مرکزی موضوع بنایا گیا ہے۔ 
 ٹیزر میں وجے دیوراکونڈا کا کردار انتہائی غصے، طاقت اور بغاوت سے بھرپور دکھائی دیتا ہے۔ وہ رنابالی کے کردار میں اپنے لوگوں کو برطانوی ظلم سے بچانے کے لیے مسلح مزاحمت کرتے نظر آتے ہیں۔ ان کا انداز، مکالمہ ادائیگی اور ایکشن فلم میں ان کے اب تک کے کرداروں سے کافی مختلف دکھائی دے رہا ہے، جس پر شائقین نے بھی مثبت ردعمل کا اظہار کیا ہے۔ 

 فلم کی سب سے بڑی خاص بات ہالی ووڈ اداکار آرنالڈ ووسلو کی موجودگی ہے، جو’’دی ممی‘‘ فرنچائز میں امہوتپ  کے کردار کے لیے دنیا بھر میں مشہور ہیں۔ ’’رانابالی‘‘ میں وہ سر تھیوڈور ہیکٹر (Sir Theodore Hector)  نامی برطانوی مخالف کردار ادا کررہے ہیں۔ ٹیزر میں وجے دیوراکونڈا اور آرنالڈ ووسلو کے درمیان نظریاتی اور طاقت کا تصادم فلم کی کہانی کا اہم حصہ دکھائی دیتا ہے۔ 

یہ بھی پڑھئے:’’مرزا پور: دی مووی‘‘ فرحان اختر اور رتیش سدھوانی کی تاریخ کی سب سے بڑی ہٹ بن گئی

فلم میں  رشمیکا مندانا  ایک مرتبہ پھر وجے دیوراکونڈا کے ساتھ نظر آئیں گی۔ وہ  جایما (Jayamma) کا کردار ادا کررہی ہیں، جو رن بالی کی اہلیہ اور اس کی جدوجہد میں اہم ساتھی ہے۔ اس جوڑی کو دوبارہ بڑے پردے پر دیکھنے کے لیے مداح بھی خاصے پرجوش ہیں۔ 
’’رن بالی‘‘ کو صرف ایک ایکشن فلم کے بجائے ہندوستانی تاریخ کے ایک تلخ باب کو بڑے پردے پر پیش کرنے والی کہانی کے طور پر دیکھا جارہا ہے۔ ٹیزر میں ظلم، بغاوت، قربانی اور انتقام کے عناصر نمایاں ہیں، جبکہ وجے دیوراکونڈا کا طاقتور روپ اور آرنالڈ ووسلو کی ویلن کے طور پر موجودگی فلم کی توقعات کو مزید بڑھا رہی ہے۔ فلم ۱۶؍ اکتوبر ۲۰۲۶ء کو سنیما گھروں میں ریلیز ہونے والی ہے۔