او جی ایکشن اسٹار اجے دیوگن اپنی آنے والی فلم ’’رینجر‘‘ کے ساتھ ایک بار پھر زبردست ایکشن کے میدان میں واپسی کر رہے ہیں، جس میں ان کے ساتھ سنجے دت بھی کام کر رہے ہیں۔

او جی ایکشن اسٹار اجے دیوگن اپنی آنے والی فلم ’’رینجر‘‘ کے ساتھ ایک بار پھر زبردست ایکشن کے میدان میں واپسی کر رہے ہیں، جس میں ان کے ساتھ سنجے دت بھی کام کر رہے ہیں۔جہاں ’’رینجر‘‘ سے متعلق اپ ڈیٹ کا انتظار کیا جا رہا ہے، وہیں اجے نے اپنی نئی ایکشن فلم کا اعلان کر دیا ہے جس کا نام ’’چوہان‘‘ ہے۔

 اجے دیوگن بطور ’’چوہان‘‘ نئی ایکشن فلم میں
اپنے والد ویرو دیوگن کی برسی کے موقع پر اجے دیوگن نے اپنی نئی ایکشن فلم ’’چوہان‘‘ کا اعلان کیا۔۲؍منٹ ۲۴؍ سیکنڈ کے اعلان کردہ ٹیزر میں کشمیر کا ایک پس منظر دکھایا گیا ہے جہاں فسادی فوجیوں پر پتھر اور دیگر ہتھیاروں سے حملہ کرتے نظر آتے ہیں۔ پھر انٹری ہوتی ہے مرکزی کردار چوہان کی، جسے ان جنگجوؤں  کی طرف سے دفاعی اہلکاروں اور ہندوستان  کے لیے ایک ’’علاج‘‘ یا حل کے طور پر دکھایا گیا ہے۔ آدھے چہرے پر بالاکلاوا ماسک پہنے اجے دیوگن امیتابھ بچن کے مشہور گانے کی دھن پر انٹری کرتے ہیں اور کشمیر میں عسکریت پسندی کے مسئلے کا مستقل حل دینے کا وعدہ کرتے ہیں۔

یہ بھی پڑھئے:فیفا ورلڈ کپ میں گول کا نیا طوفان، ۱۶۱؍ گولز کا حیران کن ریکارڈ

ٹیزر کے آخر میں اجے دیوگن دھاڑتے ہوئے کہتے ہیں: ’’پٹھانوں سے کہنا، چوہان آ رہا ہے۔‘‘یہ  شاہ رخ خان کی فلم ’’پٹھان‘‘ پر ایک طنز کے طور پر محسوس کیا گیا۔ انسٹاگرام پر اعلان کردہ ٹیزر شیئر کرتے ہوئے جیو اسٹوڈیوز نے لکھا ’’#CHAUHAAN آ رہا ہے۔ آنجہانی ویرو دیوگن کی برسی کے موقع پر ہم اپنے او جی ایکشن اسٹار اجے دیوگن کو ایک بڑے پردے کے لیے تیار کیے گئے ایکشن انٹرٹینر میں واپس لا رہے ہیں۔ سنیما گھروں میں یکم  اکتوبر ۲۰۲۷ء کو ، ویرو جی کا شکریہ، جنہوں نے ایکشن سنیما کو بہت کچھ دیا اور ایک ایسی میراث چھوڑی جو نسلوں کو متاثر کرتی رہے گی۔‘‘

یہ بھی پڑھئے:راجکمار ہیرانی نے اعتراف کیا کہ ’’ڈنکی‘‘ عام لوگوں کو متاثر نہیں کرسکی

ٹیزر پر ردعمل دیتے ہوئے ایک سوشل میڈیا صارف نے لکھا ’’دماغ ہلا دینے والا اعلان #CHAUHAAN، زبردست ڈائیلاگ ڈیلیوری، ایک بڑا اور شاندار ایکشن انٹرٹینر، اجے دیوگن کی اسکرین پر موجودگی لاجواب ہے۔‘‘ایک اور نے کہا ’’آخرکار او جی باس آ گیا… زبردست ٹیزر @ajaydevgn‘‘۔ تیسرے صارف نے لکھا’’یقینی طور پر بلاک بسٹر آنے والا ہے۔‘‘