فیشن صنعت پر مبنی فلم The Devil Wears Prada 2 نے ریلیز کے چند ہی ہفتوں میں باکس آفس پر زبردست کامیابی حاصل کرتے ہوئے ۲۰۰۶ء کی اصل فلم کے تمام ریکارڈ توڑ دیے۔ فلم نے افتتاحی ہفتے میں دنیا بھر سے ۶ء۲۳۳؍ ملین ڈالر کمائے، جبکہ دو ہفتوں کے اندر اس کی مجموعی کمائی ۴۳۳؍ ملین ڈالر تک پہنچ گئی۔

دو دہائیاں گزرنے کے بعد بھی The Devil Wears Prada کا جادو برقرار ہے، اور اب اس کے سیکوئل ’’دی ڈیول ویئرز پراڈا ۲‘‘ نے باکس آفس پر غیر معمولی کامیابی حاصل کرتے ہوئے ہالی ووڈ کو حیران کر دیا ہے۔ ڈیوڈ فرینکل کی ہدایت کاری میں بننے والی اس فلم نے نہ صرف شائقین کی یادوں کو تازہ کیا بلکہ تجارتی اعتبار سے بھی ۲۰۲۶ء کی سب سے بڑی فلموں میں اپنی جگہ بنا لی۔ فلم میں ایک بار پھر میریل اسٹریپ بطور مرانڈا پریسٹلی، اینی ہیتھوے، ایمیلی بلنٹ اور اسٹینلی ٹوچی اپنے یادگار کرداروں کے ساتھ واپس آئے ہیں، جس نے پرانے مداحوں کے ساتھ نئی نسل کو بھی سنیما گھروں تک کھینچ لیا۔

یہ بھی پڑھئے : ’’ویلکم ٹودی جنگل ‘‘:اکشے کمار کی بڑی تیاری شروع، مئی میں دھماکہ کرنے والے ہیں

یکم مئی ۲۰۲۶ء کو ریلیز کی جانے والی اس فلم نے شمالی امریکہ میں ۴۱۵۰؍ سنیما گھروں سے افتتاحی ویک اینڈ پر ۷۷؍ ملین ڈالر کمائے۔ یہ رقم ۲۰۰۶ء کی اصل فلم کے ۵ء۲۷؍ ملین ڈالر کے افتتاحی بزنس سے تقریباً تین گنا زیادہ ہے۔ باکس آفس پرو کے مطابق یہ ۲۰۲۶ء کی اب تک کی تیسری سب سے بڑی گھریلو اوپننگ بن گئی، جبکہ میریل اسٹریپ کے پورے کریئر کی سب سے بڑی افتتاحی فلم بھی قرار دی جا رہی ہے۔ اصل حیرت انگیز کامیابی بیرونِ ملک مارکیٹس میں سامنے آئی۔ فلم نے اپنے پہلے ہی ہفتے میں عالمی سطح پر ۶ء۲۳۳؍ ملین ڈالر کمائے، جن میں ۶ء۱۵۶؍ ملین ڈالر بین الاقوامی مارکیٹس سے حاصل ہوئے۔

اٹلی، جہاں Prada کا ہیڈکوارٹر ہے، فلم کی سب سے بڑی بین الاقوامی مارکیٹ ثابت ہوا جہاں سے ۶ء۱۶؍ ملین ڈالر کا بزنس ہوا۔ اس کے بعد برازیل ۶ء۱۲؍ ملین اور برطانیہ ۱۲؍ ملین ڈالر کے ساتھ نمایاں رہے۔ یورپ نے مجموعی طور پر ۷۸؍ ملین ڈالر، ایشیا پیسیفک نے ۴۰؍ ملین ڈالر اور لاطینی امریکہ نے ۵ء۳۸؍ ملین ڈالر کا اشتراک کیا۔ برازیل اور ارجنٹائنا نے لاطینی امریکی مارکیٹ کی مجموعی کمائی کا تقریباً ۶۰؍ فیصد فراہم کیا۔ تقریباً ۱۰۰؍ ملین ڈالر کے بجٹ سے تیار ہونے والی فلم نے صرف چھ دن میں اپنی لاگت پوری کر لی۔ دو ویک اینڈ مکمل ہونے تک فلم کی عالمی کمائی ۴۳۳؍ ملین ڈالر تک پہنچ گئی، جس میں ۱۴۴؍ ملین ڈالر شمالی امریکہ اور ۲۸۸؍ ملین ڈالر بین الاقوامی مارکیٹس سے آئے۔

یہ بھی پڑھئے : ’’لکڑبگھا۲: دی منکی بزنس‘‘ کی خصوصی اسکریننگ کانز فلم فیسٹیول میں ہوگی

یہ کمائی ۲۰۰۶ء کی اصل فلم کے مکمل تھیٹر رن کے ۳۲۶؍ ملین ڈالر کے عالمی بزنس سے کہیں زیادہ ہے، جس کا مطلب ہے کہ سیکوئل نے محض دو ہفتوں میں اپنے پیشرو کو پیچھے چھوڑ دیا۔ ماہرین کا کہنا ہے کہ فلم کی مضبوط ’’ورڈ آف ماؤتھ‘‘ تشہیر، فیشن کلچر سے جڑی یادیں، اور اصل کاسٹ کی واپسی نے اسے عالمی سطح پر بڑی کامیابی دلائی۔ ڈزنی کے لیے بھی یہ فلم خاص اہمیت رکھتی ہے، کیونکہ اسی کی بدولت اسٹوڈیو ۲۰۲۶ء میں دنیا بھر میں ۲؍ بلین ڈالر سے زیادہ کمائی کرنے والا پہلا ہالی ووڈ اسٹوڈیو بن گیا ہے۔ انڈسٹری تجزیہ کاروں کے مطابق یہ فلم اب ۷۰۰؍ ملین ڈالر سے زیادہ عالمی کمائی کر سکتی ہے، اور یہ ان نایاب سیکوئلز میں شامل ہو چکی ہے جنہوں نے نہ صرف اصل فلم کی مقبولیت کو برقرار رکھا بلکہ تجارتی لحاظ سے اسے پیچھے بھی چھوڑ دیا۔