مشہور ویب سیریز ’’دی فیملی مین‘‘ میں سری کانت تیواری کا کردار آج منوج باجپائی کی پہچان بن چکا ہے، لیکن تخلیق کار جوڑی راج اینڈ ڈی کے نے انکشاف کیا ہے کہ اس کردار کے لیے ان کی پہلی پسند منوج باجپائی نہیں بلکہ جنوبی ہند کے سپر اسٹار چرنجیوی تھے۔

جب بھی ’’دی فیملی مین‘‘ کا ذکر ہوتا ہے تو ذہن میں سب سے پہلے منوج باجپائی کا نام آتا ہے، جنہوں نے سری کانت تیواری کے کردار کو غیر معمولی مقبولیت دلائی۔ تاہم، حال ہی میں ایک دلچسپ انکشاف سامنے آیا ہے کہ اس کردار کے لیے ابتدائی طور پر منوج باجپائی کو نہیں سوچا گیا تھا۔ راج نے ایک انٹرویو میں بتایا کہ جب وہ اور ڈی کے اس منصوبے پر کام کر رہے تھے تو ان کے ذہن میں سری کانت تیواری کے کردار کے لیے چرنجیوی تھے۔ راج ندیمورو کے مطابق ’’ہم نے ابتدا میں یہ کہانی چرنجیوی سر کو ذہن میں رکھ کر لکھی تھی اور ہمارا ارادہ اسے ایک فیچر فلم کے طور پر بنانے کا تھا۔ تاہم مختلف وجوہات کی بنا پر بعد میں یہ پروجیکٹ ویب سیریز میں تبدیل ہو گیا۔‘‘

یہ بھی پڑھئے: ثریا بالی ووڈ کی آخری عظیم سنگنگ اسٹار تھیں

اس انکشاف نے مداحوں میں نئی بحث چھیڑ دی ہے کہ اگر چرنجیوی واقعی اس منصوبے کا حصہ بنتے تو شاید ’’دی فیملی مین‘‘ایک تیلگو ایکشن تھریلر فلم کی صورت میں سامنے آتی۔ فلمی ماہرین کا ماننا ہے کہ چار دہائیوں سے زائد تجربہ رکھنے والے چرنجیوی کی موجودگی اس منصوبے کو جنوبی ہندوستان سمیت بین الاقوامی سطح پر بھی مختلف نوعیت کی مقبولیت دلا سکتی تھی۔ اگرچہ ابتدائی منصوبہ تبدیل ہو گیا، لیکن منوج نے سری کانت تیواری کے کردار میں ایسی جان ڈالی کہ یہ ان کے کریئر کی سب سے یادگار پرفارمنسز میں شمار ہونے لگا۔ 

یہ سیریز ایک ایسے انٹیلی جنس افسر کی کہانی بیان کرتی ہے جو اپنے خفیہ مشنوں اور خاندانی زندگی کے درمیان توازن برقرار رکھنے کی کوشش کرتا ہے۔ راج ندیمورو نے انٹرویو کے دوران سیریز کے مستقبل پر بھی بات کی اور اشارہ دیا کہ تخلیق کاروں کے ذہن میں ایک بڑا منصوبہ موجود ہے۔ انہوں نے کہا کہ ’’ہمارے ذہن میں ایک بڑا پلان ہے اور موجودہ مرحلہ محض ایک وقفے کی طرح ہے۔‘‘ ان کے اس بیان کو ’’دی فیملی مین‘‘ کے آئندہ سیزن اور اس سے جڑی وسیع کائنات کی جانب اشارہ سمجھا جا رہا ہے۔

یہ بھی پڑھئے: ویر پہاڑیہ اور ورون شرما ایکشن تھریلر فلم ’’نام۔ ٹو لِو اِز وار‘‘ میں جلوہ گر

قابل ذکر بات یہ ہے کہ ’’فرضی‘‘ کو بھی اسی تخلیقی دنیا کا حصہ قرار دیا جاتا ہے، جس سے مستقبل میں مزید کراس اوور امکانات پیدا ہو سکتے ہیں۔ راج اور ڈی کے نے یہ بھی بتایا کہ وہ متعدد نئے منصوبوں پر کام کر رہے ہیں، جن میں ایک ہالی ووڈ اسکرپٹ، بڑی اسکرین پر واپسی اور مبینہ طور پر سلمان خان کے ساتھ ایک سپر ہیرو فلم بھی شامل ہے۔ تاہم ان منصوبوں کے بارے میں مزید تفصیلات فی الحال سامنے نہیں آئی ہیں۔