مارول کے سپر ہیرو اسپائیڈر مین کی نئی فلم’’اسپائیڈر مین: برانڈ نیو ڈے‘‘ نے ریلیز سے قبل ہی باکس آفس پر دھوم مچا دی ہے اور اس کی ایڈوانس بکنگ نے کئی ریکارڈ توڑ دیئے ہیں۔ فلم کے فائنل ٹریلر کو بھی شائقین کی جانب سے زبردست پذیرائی ملی ہے، جبکہ ماہرین اسے سال کی سب سے بڑی ہالی ووڈ فلم قرار دے رہے ہیں۔

ٹام ہالینڈ کی اداکاری سے سجی فلم’’ اسپائیڈر مین: برانڈ نیو ڈے ‘‘کا فائنل ٹریلر حال ہی میں جاری کیا گیا، جسے سوشل میڈیا پر مداحوں کی جانب سے زبردست پذیرائی ملی۔ ٹریلر کے ساتھ ہی فلم کی ایڈوانس بکنگ بھی کھول دی گئی، اور اس کا ردِعمل ریکارڈ توڑ ثابت ہوا۔ 
’’اسپائیڈر مین: برانڈ نیو ڈے ‘‘نے باکس آفس پری سیلز میں تاریخ رقم کر دی
فلم نے گزشتہ پانچ برسوں کی بہترین پہلے دن کی پری سیلز کا ریکارڈ قائم کیا ہے۔ یہ امریکہ میں وبا کے بعد دوسری سب سے بڑی پری سیلز والی فلم بن گئی ہے، جس سے آگے صرف ’’اسپائیڈر مین: نو وے ہوم‘‘ ہے۔ ۲۰۲۱ء میں ریلیز ہونے والی ’’اسپائیڈر مین: نو وے ہوم‘‘ نے تاریخ کے دوسرے سب سے بڑے اوپننگ ویک اینڈ کے طور پر ۲۶۰ء۱۰؍ملین ڈالر کمائے تھے۔ توقع کی جا رہی ہے کہ’’ اسپائیڈر مین: برانڈ نیو ڈے ‘‘امریکی باکس آفس پر۲۰۰؍ملین ڈالر سے زیادہ کا آغاز کرے گی۔ یہ فلم اب تک کی چوتھی سب سے بڑی پری سیلز والی فلم بن چکی ہے۔ اس سے آگے’’ایونجرز: اینڈگیم‘‘، ’’ اسپائیڈر مین: نووے ہوم‘‘، ’’ اسٹار وارز: دی فورس اویکنس‘‘ اور’’ ولورین اینڈ ڈیڈ پول‘‘نے۲۱۱ء۴۰؍ملین ڈالر کی اوپننگ کی تھی، اور اب توقع ہے کہ’’ اسپائیڈر مین: برانڈ نیو ڈے ‘‘اس ریکارڈ کو بھی پیچھے چھوڑ دے گی۔ 

یہ بھی پڑھئے: شاہد کپور کی ’’کاک ٹیل۲‘‘ کا شاندار آغاز، پہلے دن عالمی سطح پر۲۰؍ کروڑ کی کمائی

زینڈایا کی مداحوں سے خصوصی درخواست
فرنچائز میں ایم جے کا کردار ادا کرنے والی زینڈایا نے مداحوں سے کہا:’’میں یہی کہوں گی کہ ہماری تمام پچھلی اسپائیڈر مین فلمیں دوبارہ دیکھ لیں تاکہ آپ پوری کہانی سے جڑے رہیں، اور ساتھ ٹشو پیپر ضرور لائیں کیونکہ اس بار فلم جذباتی موڑ بھی لے گی۔ ’’اسپائیڈر مین: نو وے ہوم‘‘ نے دنیا بھر میں ۱ء۹۱؍ارب ڈالر کا بزنس کیا تھا۔ اگرچہ یہ تقریباً یقینی سمجھا جا رہا ہے کہ ’’برانڈ نیو ڈے‘‘۱ء۵؍ارب ڈالر کا ہندسہ عبور کر لے گی، تاہم، اس کی حتمی کامیابی کا انحصار ناظرین کے ردِعمل پر ہوگا۔ 

یہ بھی پڑھئے: لاس اینجلس سٹی کونسل نے ۶؍ جنوری کو ’’دلجیت دوسانجھ ڈے‘‘ قرار دیا

کہانی، کاسٹ اور ریلیز کی تاریخ
فلم کے آفیشل خلاصے کے مطابق:’’پیٹر پارکر کیلئے یہ ایک بالکل نیا دن ہے۔ دنیا اسے بھول چکی ہے لیکن وہ اپنے دوستوں کو نہیں بھولا۔ اسپائیڈر مین کے طور پر مکمل وقت جرائم سے لڑتے ہوئے اور اپنے پرانے دوستوں کو زندگی میں آگے بڑھتے دیکھ کر پیٹر ایک ایسی تبدیلی سے گزرتا ہے جس پر شاید اس کا اپنا کنٹرول نہ رہے۔ مگر یہی تبدیلی شہر اور اس کے پیاروں کو ایک ایسے طاقتور دشمن سے بچانے کا واحد راستہ بھی بن سکتی ہے، جسے کوئی دیکھ نہیں سکتا۔ ‘‘ ہدایت کاری ڈیسٹن ڈینیئل کریٹن نے کی ہے، جبکہ فلم کی نمایاں کاسٹ میں ٹام ہالینڈ، زینڈایا، سیڈی سنک، جیکب بٹالن، جان برنتھل، ٹریمل ٹلمن، مائیکل مانڈو اور مارک روفالو شامل ہیں۔ بتا دیں کہ ’’اسپائیڈر مین: برانڈ نیو ڈے‘‘ ہندوستان میں ۳۰؍ جولائی ۲۰۲۶ء جبکہ امریکہ میں ۳۱؍ جولائی کو ریلیز ہوگی۔