ڈزنی اور پکسر کی نئی اینی میٹڈ فلم ’’ٹوائے اسٹوری ۵‘‘ نے ریلیز کے پہلے ہی ویک اینڈ میں عالمی باکس آفس پر شاندار کارکردگی کا مظاہرہ کرتے ہوئے ۳۱۲؍ ملین ڈالر کی کمائی کر لی ہے۔ فلم نے نہ صرف ۲۰۲۶ء کی سب سے بڑی اوپننگ کا ریکارڈ قائم کیا بلکہ ٹوائے اسٹوری فرنچائز کی تاریخ کا سب سے بڑا افتتاحی ویک اینڈ بھی اپنے نام کر لیا۔

ڈزنی اور پکسر کی مقبول اینی میٹڈ فرنچائز ٹوائے اسٹوری نے ایک بار پھر عالمی باکس آفس پر اپنی طاقت کا مظاہرہ کر دیا ہے۔ ’’ٹوائے اسٹوری ۵‘‘ نے ریلیز کے پہلے ویک اینڈ میں دنیا بھر سے ۳۱۲؍ ملین ڈالر کی کمائی کرتے ہوئے ۲۰۲۶ء کی سب سے بڑی باکس آفس اوپننگ کا اعزاز حاصل کر لیا ہے۔ اسٹوڈیو کے ابتدائی تخمینوں کے مطابق فلم نے امریکہ اور کنیڈا میں ۱۶۰؍ ملین ڈالر کی شاندار کمائی کی، جبکہ بین الاقوامی مارکیٹوں سے مزید ۱۵۲؍ ملین ڈالر حاصل کیے۔ یوں فلم کی عالمی افتتاحی کمائی ۳۱۲؍  ملین ڈالر تک پہنچ گئی، جو فرنچائز کی تاریخ کا نیا ریکارڈ ہے۔ اس کامیابی کے ساتھ ’’ٹوائے اسٹوری ۵‘‘ نے ’’ٹوائے اسٹوری ۴‘‘ کے ۱۲۰؍ ملین ڈالر کے افتتاحی ویک اینڈ کے ریکارڈ کو پیچھے چھوڑ دیا۔ فلم نے اینی میٹڈ سنیما کی تاریخ میں بھی دوسری سب سے بڑی اوپننگ درج کی ہے۔ اس فہرست میں اب بھی سرفہرست The Incredibles 2 ہے، جس نے شمالی امریکہ میں اپنے افتتاحی ویک اینڈ کے دوران ۷ء۱۸۲؍ ملین ڈالر کمائے تھے۔

یہ بھی پڑھئے: سیامی کھیر نے ۲۰۰؍ سال پرانے درخت کے کٹنے پر اپنے غصے اور غم کا اظہار کیا

۱۹۹۵ء میں ریلیز ہونے والی پہلی ٹوائے اسٹوری فلم کے ۳۱؍ سال بعد آنے والی اس نئی قسط نے ایک بار پھر ثابت کیا ہے کہ ووڈی، بز لائٹ ایئر اور دیگر محبوب کردار آج بھی دنیا بھر کے ناظرین میں غیر معمولی مقبولیت رکھتے ہیں۔ فلم کی شاندار شروعات کے بعد باکس آفس ماہرین کا ماننا ہے کہ ’’ٹوائے اسٹوری ۵‘‘ کے لیے عالمی سطح پر ایک ارب ڈالر سے زیادہ کمائی کا ہدف حاصل کرنا ممکن دکھائی دیتا ہے۔ ٹوائے اسٹوری فرنچائز پہلے ہی اینی میشن کی تاریخ کی کامیاب ترین سیریز میں شمار ہوتی ہے۔ اس سیریز کی پہلی چار فلمیں مجموعی طور پر دنیا بھر میں ۳؍ ارب ڈالر سے زائد کمائی کر چکی ہیں۔ ناقدین کی جانب سے بھی فرنچائز کو مسلسل پذیرائی حاصل ہوتی رہی ہے۔

یہ بھی پڑھئے: راج کمار ہیرانی کی فلموں میں حالات حقیقی ویلن ہوتے ہیں: وکرانت میسی

اب تک ٹوائے اسٹوری فلموں کو ۱۱؍ اکیڈمی ایوارڈ نامزدگیاں مل چکی ہیں، جبکہ سیریز تین آسکر ایوارڈز جیت چکی ہے، جن میں بہترین اینی میٹڈ فیچر کے دو اعزازات بھی شامل ہیں۔ پکسر اینی میشن اسٹوڈیوز کی تیار کردہ اور ڈزنی کی جانب سے جاری کی گئی ٹوائے اسٹوری سیریز کو عالمی سنیما کی تاریخ کی سب سے بااثر اور کامیاب اینی میٹڈ فرنچائزز میں شمار کیا جاتا ہے۔ تازہ ترین باکس آفس نتائج اس بات کی نشاندہی کرتے ہیں کہ تین دہائیوں بعد بھی اس کے کردار اور کہانیاں ناظرین کو اپنی طرف متوجہ کرنے کی بھرپور صلاحیت رکھتی ہیں۔