حکومت اور اپوزیشن کے لیڈروںنے فوجیوںکی قربانیوں کو یاد کیا،ملک و قوم کو ان کا مقروض اور ان کی شجاعت کو مثالی قراردیا۔

’کارگل وجے دیوس‘ پر پورے ملک  نےہندوستانی فوج کے بہادر جوانوں کی شجاعت اور دلیری کو سلام پیش کیا۔ اس موقع پر صدر جمہوریہ دروپدی مرمو، وزیر اعظم نریندر مودی،وزیر دفاع راجناتھ سنگھ، کانگریس صدر ملکارجن کھرگے اور لوک سبھا میں اپوزیشن لیڈر راہل گاندھی نے بھی بہادر جانبازوں کو خراج عقیدت پیش کیا ۔ صدر جمہوریہ دروپدی مرمو نے سوشل میڈیا پلیٹ فارم ’ایکس‘ پر لکھا  ’’کارگل وجے دیوس کے موقع پر میں مادر وطن کے دفاع کیلئے اپنی جان کا نذرانہ پیش کرنے والے بہادر سپاہیوں کو خراج عقیدت پیش کرتی ہوں۔ ان کی بے مثال بہادری، غیر متزلزل عزم اور بے لوث حب الوطنی ہماری مسلح افواج کی شاندار روایات کی روشن مثال ہے۔ قوم ہمیشہ ان کی قربانیوں کی مقروض رہے گی۔ ہمارے ان عظیم جانبازوں کی شجاعت کی داستانیں آنے والی نسلوں کو وطن کی خدمت، فرض شناسی اور ایثار کے جذبے کے ساتھ آگے بڑھنے کی مسلسل ترغیب دیتی رہیں گی۔‘‘

یہ بھی پڑھئے: مودی سرکار کو اَب لاٹھی چارج پر جوابدہی کا سامنا

وزیر اعظم نریندر مودی اور مرکزی وزیر دفاع راجناتھ سنگھ نے کارگل وجے دیوس کے موقع پر کارگل جنگ کے شہداء کو خراجِ عقیدت پیش کرتے ہوئے کہا کہ ان کی بہادری ہمیشہ قومی فخر کا سرچشمہ بنی رہے گی۔وزیر اعظم نریندر مودی نے اتوار کو سوشل میڈیا پر اپنے پیغام میں کہا’’کارگل وجے دیوس کے موقع پر پورا ملک ہماری بہادر مسلح افواج کے اس غیر معمولی حوصلے اور ملک کی سلامتی کیلئے ان کے عزم کو سلام پیش کرتا ہے۔ انتہائی دشوار حالات میں ان کی جانب سے دکھائی گئی جرأت ہمیشہ قومی فخر کا سرچشمہ رہے گی۔ ان کی غیر متزلزل حب الوطنی اور فرض شناسی آنے والی نسلوں کو مسلسل تحریک دیتی رہے گی ۔‘‘

مرکزی وزیر دفاع راجناتھ سنگھ نے بھی شہداء کو خراجِ عقیدت پیش کرتے ہوئے کہا’’ کارگل وجے دیوس کے موقع پر مادرِ وطن کے دفاع میں اپنی جان نچھاور کرنے والے تمام بہادر فوجیوں کو سلام۔۱۹۹۹ء میں کارگل کی دشوار گزار چوٹیوں پر غیر معمولی بہادری کا مظاہرہ کرنے والے تمام جانبازوںکا ملک ہمیشہ شکر گزار اور مقروض رہے گا۔‘‘انہوں نے کہا کہ ہندوستانی فوج کی ناقابلِ تسخیر جرات، قربانی اور غیر متزلزل عزم آنے والی نسلوں کو حب الوطنی، فرض شناسی اور مادرِ وطن کے لیے سب کچھ قربان کرنے کی ترغیب دیتا رہے گا۔

یہ بھی پڑھئے: دھرمیندر پردھان کے استعفیٰ کے بعد سوشل میڈیا پرمیمز کا طوفان، گڈکری اگلا نشانہ

واضح رہے کہ آج سے۲۷؍ برس قبل ہندوستانی فوج کے جانبازوں نےکارگل میں تقریباً ۳؍ ماہ تک جاری رہنے والی شدید لڑائی کے بعد انتہائی دشوار حالات میں اپنی جرات اور بہادری  سے کارگل کی چوٹیوں پر قابض پاکستانی فوجیوں اور دراندازوں کو پسپا کر دیا تھا۔ اسی کامیابی کی یاد میں ہر سال۲۶؍ جولائی کو کارگل وجے دیوس منایا جاتا ہے۔اس جنگ میں۵۲۷؍ ہندوستانی فوجی جاں بحق ہوئے تھے ۔کانگریس کے قومی صدر ملکارجن کھرگے نے ’ایکس‘ پر لکھا کہ ’’کارگل وجے دیوس کے موقع پر ہمارے بہادر فوجیوں، ان کے اہل خانہ اور تمام اہل وطن کو مبارک باد۔ کارگل جنگ میں مادر وطن کے دفاع کے لیے عظیم ترین قربانی پیش کرنے والے ہمارے امر جانبازوں کو ہم عقیدت کے ساتھ سلام پیش کرتے ہیں۔ ان کی بے مثال جرأت، غیر معمولی بہادری اور وطن کیلئے غیر متزلزل وابستگی ہمیشہ ہم سب کیلئے مشعل راہ اور باعث تحریک رہے گی ۔ جے ہند۔‘‘ ’کارگل وجے دیوس‘ کے موقع پر لوک سبھا میں حزب اختلاف کے قائد راہل گاندھی نے ’ایکس‘ پر لکھا کہ ’’کارگل وجے دیوس کے موقع پر ہندوستان کی سرحدوں کے دفاع میں اپنی جان کا عظیم نذرانہ پیش کرنے والے تمام بہادر جوانوں کو ہم خراج عقیدت پیش کرتے ہیں۔ قوم آپ کی جرأت، شجاعت اور عظیم قربانی کی ہمیشہ مقروض رہے گی۔‘‘واضح رہےکارگل جنگ کوہندوستان بری فوج ’ آپریشن وجے‘(۱۹۹۹ء) کا نام دیاتھا جبکہ ایئر فورس  نے اپنی کارروائی ’ آپریشن سفید ساگر‘ کےنام سے انجام دی تھی۔