۱۹۹۱ء میں دوست جیمز کولتھرسٹ کے ساتھ خفیہ طور پر ریکارڈ ہونے والی گفتگو پہلی بار بڑے پیمانے پر سامنے آئے گی؛ چارلس، کمیلا، اینڈریو اور اپنے بچوں ولیم و ہیری سے متعلق ڈائنا کی باتیں شامل۔

برطانیہ کی آنجہانی شہزادی ڈائنا کی زندگی، شاہی خاندان اور ان کے ذاتی تجربات پر مبنی ۳؍ حصوں کی ایک نئی دستاویزی سیریز میں ان کی تقریباً ۵؍ گھنٹے کی ایسی آڈیو ریکارڈنگز شامل کی جائیں گی جو اب تک بڑی حد تک عوام کی سماعت سے دور رہی ہیں۔ ’’ڈائنا اَن ہرڈ‘‘ نامی اس سیریز میں ڈائنا کو اپنی زندگی کے اہم واقعات اپنی ہی آواز میں بیان کرتے سنا جائے گا۔ عالمی سطح پر اس سیریز کے حقوق سینے فِلکس رائٹس نے حاصل کرلیے ہیں اور اسے اگلے ماہ فرانس کے شہر کانز میں ہونے والی میپ کام نمائش میں بین الاقوامی خریداروں کے سامنے پیش کیا جائے گا۔ یہ ریکارڈنگز دراصل ۱۹۹۱ء میں ڈائنا اور ان کے قریبی دوست ڈاکٹر جیمز کولتھرسٹ کے درمیان ہونے والی خفیہ گفتگو پر مشتمل ہیں۔ انہی گفتگوؤں نے صحافی اینڈریو مورٹن کی مشہور کتاب Diana: Her True Story کی بنیاد فراہم کی تھی۔ نئی سیریز کے لیے پروڈیوسروں نے مورٹن اور کولتھرسٹ دونوں کے تعاون سے ان ریکارڈنگز کے مکمل ذخیرے تک رسائی حاصل کی ہے، اور دونوں اس دستاویزی سیریز میں بھی شامل ہیں۔ 

یہ بھی پڑھئے:’’ٹشن‘‘ کیوں فلاپ ہوئی تھی؟ ۱۸؍ سال بعد سیف علی خان نے فلم کی اصل کمی بتائی

پروڈکشن ٹیم کے مطابق ان ریکارڈنگز کا ایک بڑا حصہ گزشتہ ۳؍  دہائیوں میں عوام نے کبھی نہیں سنا۔ دستیاب معلومات کے مطابق تقریباً ایک گھنٹے سے بھی کم مواد پہلے مختلف دستاویزی پروگراموں میں سامنے آیا ہے، جبکہ باقی تقریباً ۵؍ گھنٹے کی گفتگو اب نئی سیریز کے مرکزی بیانیے کا حصہ بنے گی۔ اس طرح ناظرین ڈائنا کے اپنے الفاظ میں ان کے شاہی خاندان کے تجربات اور ذاتی زندگی کے کئی پہلو سن سکیں گے۔ ریکارڈنگز میں ڈائنا نے اپنے سابق شوہر، اس وقت کے شہزادہ چارلس، اور ان کی طویل عرصے سے جاری قربت رکھنے والی کمیلا کے بارے میں بھی بات کی تھی۔ آج چارلس بادشاہ چارلس سوم اور کمیلا ملکہ ہیں، لیکن ریکارڈنگ کے وقت دونوں کے تعلقات شاہی خاندان کے لیے ایک انتہائی حساس معاملہ تھے۔ سیریز میں اس دور کے واقعات کو ڈائنا کی اپنی گفتگو کے ذریعے دوبارہ سامنے لایا جائے گا۔ 
ڈائنا کی گفتگو صرف اپنی ازدواجی زندگی تک محدود نہیں۔ نئی سیریز میں ان کے بیٹوں ولیم اور ہیری، سارہ فرگوسن اور اس وقت کے شہزادہ اینڈریو کے بارے میں ان کے خیالات بھی شامل ہیں۔ اینڈریو کے بارے میں ڈائنا کی باتیں آج کے تناظر میں بھی خاص توجہ حاصل کرسکتی ہیں، کیونکہ گزشتہ برسوں میں ان کا شاہی حیثیت اور شاہی خاندان سے تعلق نمایاں طور پر تبدیل ہوچکا ہے۔ سیریز بنانے والی کمپنی لو منڈے ٹی وی کا کہنا ہے کہ اس منصوبے کا مقصد ڈائنا کو صرف ایسے شخص کے طور پر پیش کرنا نہیں جو حالات کا شکار رہی ہوں، بلکہ ان کی اپنی آواز کے ذریعے ان کی شخصیت، فیصلوں اور زندگی پر اختیار حاصل کرنے کی کوشش کو بھی سامنے لانا ہے۔ کمپنی کی تخلیقی سربراہ کیرین بیرفیلڈ کے مطابق ریکارڈنگز ڈائنا کو اپنی کہانی خود بیان کرنے کا موقع دیتی ہیں اور ناظرین کو ان کی زندگی کو ان کے اپنے نقطۂ نظر سے سننے کا موقع ملے گا۔ 

یہ بھی پڑھئے:’رامائن‘ کے پروڈکشن ڈیزائنر کا ہندوستانی وی ایف ایکس پر اعتراض، ۶۰؍ عالمی فنکاروں کی خدمات حاصل

سینی فلکس رائٹس کے عہدیدار رچرڈ لائف نے بھی کہا کہ اس سیریز کی خاص بات یہ ہے کہ ناظرین ڈائنا کی کئی گھنٹوں پر مشتمل نجی گفتگو ان کی اپنی آواز میں سن سکیں گے، خاص طور پر ان کی زندگی کے ایک نہایت اہم دور سے متعلق۔ ان کے مطابق ڈائنا کی وفات کے تقریباً ۳۰؍ سال بعد بھی وہ دنیا بھر میں غیر معمولی دلچسپی کا مرکز ہیں۔ سیریز کی تیاری ۲۰۲۶ء تک جاری رہنے کی اطلاعات ہیں اور اس کی عالمی نمائش ۲۰۲۷ء میں ڈائنا کی وفات کی ۳۰؍ ویں برسی کے موقع پر متوقع ہے۔ ایک صنعتی پروڈکشن فہرست کے مطابق اس کی منصوبہ بند ریلیز ۳۱؍ اگست ۲۰۲۷ءہے، تاہم موجودہ اعلان میں ہر ملک کے لیے نشریاتی پلیٹ فارم یا ٹیلی ویژن چینل کا حتمی نام سامنے نہیں آیا ہے۔ ڈائنا ۳۱؍ اگست ۱۹۹۷ء کو پیرس میں ایک کار حادثے میں ۳۶؍ برس کی عمر میں انتقال کرگئی تھیں۔ نئی دستاویزی سیریز ان کی موت کے بعد سامنے آنے والی متعدد کتابوں، ریکارڈنگز اور فلمی دستاویزی مواد کے سلسلے میں ایک اور اہم اضافہ ہوگی، لیکن اس بار مرکزی حیثیت ان کی اپنی آواز کو دی جارہی ہے۔