بالی ووڈ کی مقبول عدالتی مزاحیہ فلمی سیریز ’’جولی ایل ایل بی‘‘ کے چوتھے حصے کو لے کر اہم خبر سامنے آئی ہے۔ میڈیا رپورٹس کے مطابق’’جولی ایل ایل بی ۴‘‘ میں اکشے کمار شامل نہیں ہوں گے، جبکہ ارشد وارثی ایک بار پھر وکیل جگدیش تیاگی عرف جولی کے مرکزی کردار میں واپسی کریں گے۔

بالی ووڈ کی مقبول عدالتی مزاحیہ فلمی سیریز ’’جولی ایل ایل بی‘‘ کے چوتھے حصے کو لے کر اہم خبر سامنے آئی ہے۔ میڈیا رپورٹس کے مطابق’’جولی ایل ایل بی ۴‘‘ میں اکشے کمار شامل نہیں ہوں گے، جبکہ ارشد وارثی ایک بار پھر وکیل جگدیش تیاگی عرف جولی کے مرکزی کردار میں واپسی کریں گے۔ فلم کی کہانی پچھلی فلموں کے واقعات کو آگے بڑھانے کے بجائے پہلی فلم سے پہلے کے دور پر مبنی ہوگی، یعنی یہ ایک پیش رو فلم (پریکوئل) ہوگی۔ 

یہ بھی پڑھئے:ٹائیگر شروف نہیں، پہلے کسی اور بالی ووڈ شخصیت کو نشانہ بنانے کی تھی منصوبہ بندی

رپورٹس کے مطابق فلم کی ہدایت کاری امیش شکلا کریں گے، جو’ ’او مائی گاڈ‘‘ اور’ ’۱۰۲؍ ناٹ آؤٹ‘‘ جیسی فلموں کے لیے جانے جاتے ہیں۔ اس بار سیریز کے تخلیق کار اور گزشتہ تینوں حصوں سے وابستہ ہدایت کار سبھاش کپور کی جگہ امیش شکلا کو ذمہ داری سونپے جانے کی اطلاع ہے۔ فلم کی تیاری کا کام آخری مراحل میں بتایا جا رہا ہے، جبکہ اس کی شوٹنگ جنوری ۲۰۲۷ء تک مکمل کرنے کا منصوبہ ہے۔ تاہم، فلم کا حتمی نام اور دیگر تفصیلات ابھی طے ہونا باقی ہیں۔ 

یہے بھی پڑھئے:اٹل کی سنچری، افغانستان نے زمبابوے کو ۱۵۸؍ رن سے شکست دی

’’جولی ایل ایل بی‘‘ کی پہلی فلم ۲۰۱۳ء میں ریلیز ہوئی تھی، جس میں ارشد وارثی نے وکیل جگدیش تیاگی کا کردار ادا کیا تھا۔ ۲۰۱۷ء میں ریلیز ہونے والی دوسری فلم ’’جولی ایل ایل بی ۲‘‘میں اکشے کمار نے وکیل جگدیشور مشرا کا کردار نبھایا، جبکہ ارشد وارثی مرکزی کردار میں موجود نہیں تھے۔ اس کے بعد ۲۰۲۵ء میں ریلیز ہونے والی ’’جولی ایل ایل بی۳ ‘‘ میں دونوں اداکار ایک ساتھ نظر آئے اور ان کے کرداروں کے درمیان عدالتی مقابلہ فلم کی خاص توجہ بنا۔
اب چوتھے حصے میں ارشد وارثی کی مرکزی کردار میں واپسی کی خبر سے ان کے مداحوں میں دلچسپی بڑھ گئی ہے۔ تاہم، اکشے کمار کی عدم موجودگی اور دیگر سابق اداکاروں کی شمولیت کے بارے میں ابھی تک فلم سازوں کی جانب سے باضابطہ اعلان نہیں کیا گیا ہے۔ اس لیے فی الحال اکشے کمار کے فلم میں شامل نہ ہونے کی خبر کو میڈیا رپورٹس کی بنیاد پر ہی دیکھا جانا چاہیے۔ 
  نئی فلم کو پہلی فلم سے پہلے کے واقعات پر مبنی بتایا جا رہا ہے، اس لیے امکان ہے کہ اس میں ارشد وارثی کے کردار جولی کی زندگی اور وکالت کے ابتدائی سفر کو پیش کیا جائے۔ اس سیریز کی خاص بات عدالت کے اندر ہونے والی بحث، سماجی مسائل پر طنز، مزاح اور انصاف کے نظام سے جڑے سوالات رہے ہیں۔ نئی فلم میں ان عناصر کو کس انداز میں پیش کیا جائے گا، اس بارے میں فی الحال تفصیلات دستیاب نہیں ہیں۔