سائنس فکشن رومانوی فلم ’’تیری باتوں میں ایسا الجھا جیا‘‘ کے سیکوئل پر کام شروع ہونے کی اطلاعات سامنے آئی ہیں۔ ذرائع کے مطابق میڈاک فلمز نے اس منصوبے کی ابتدائی تیاری شروع کر دی ہے، جس میں شاہد کپور اور کریتی سینن اپنے کرداروں میں واپس آئیں گے، جبکہ جھانوی کپور کی شمولیت بھی زیر غور ہے۔

بالی ووڈ کی حالیہ کامیاب سائنس فکشن رومانوی فلم ’’تیری باتوں میں ایسا الجھا جیا‘‘ کے سیکوئل سے متعلق سرگرمیاں تیز ہو گئی ہیں، جہاں تازہ اطلاعات کے مطابق میڈاک فلمز اس پراجیکٹ پر ابتدائی سطح پر کام شروع کر چکی ہے۔ ذرائع کا کہنا ہے کہ فلم کی کہانی وہیں سے آگے بڑھے گی جہاں پہلی فلم ختم ہوئی تھی، جس سے اس کے تسلسل اور بیانیے کو مزید وسعت دی جائے گی۔ رپورٹس کے مطابق شاہد کپور ایک بار پھر روبوٹکس انجینئر آرین اگنی ہوتری کے کردار میں نظر آئیں گے، جبکہ کریتی سینن بھی سفرا کے کردار میں واپسی کریں گی۔ اس کے ساتھ ہی جھانوی کے اس پراجیکٹ میں شامل ہونے کی خبریں بھی سامنے آئی ہیں، جس سے فلم کیلئے تجسس میں مزید اضافہ ہوا ہے، اگرچہ اس حوالے سے ابھی تک کوئی سرکاری تصدیق موجود نہیں۔

یہ بھی پڑھئے: ’’بھوت بنگلہ‘‘ کی ریلیز مؤخر، ’’دھرندھر ۲‘‘ کے دباؤ میں نئی حکمت عملی

تازہ ترین پیش رفت کے مطابق فلم کی اسکرپٹ پر کام جاری ہے اور توقع کی جا رہی ہے کہ یہ اگست ۲۰۲۶ء تک مکمل ہو جائے گی۔ اس کے بعد میکرز ۲۰۲۷ء کی پہلی سہ ماہی میں فلم کو فلور پر لے جانے کا منصوبہ بنا رہے ہیں۔ تاہم، انڈسٹری ذرائع کا کہنا ہے کہ فلم کی ٹائم لائن کا انحصار دیگر پراجیکٹس، خاص طور پر ’’کاکٹیل ۲‘‘ کی کارکردگی پر بھی ہوگا، جو اسٹوڈیو کی ترجیحات کو متاثر کر سکتی ہے۔

اداکارہ کریتی سینن نے حال ہی میں ایک انٹرویو میں اس بات کی تصدیق کی کہ سیکوئل کے اسکرپٹ پر کام جاری ہے۔ ان کے مطابق، ’’تیری باتوں میں...... کا سیکوئل لکھا جا رہا ہے اور ہم دونوں اس کے جلد شروع ہونے کیلئے بے حد پرجوش ہیں۔‘‘ ان کا یہ بیان اس بات کی نشاندہی کرتا ہے کہ مرکزی کاسٹ اس پراجیکٹ کیلئے سنجیدہ ہے۔

پہلی فلم کو جیو اسٹوڈیوز اور دنینش وجن کی قیادت میں میڈاک فلمز نے پروڈیوس کیا تھا۔ کہانی ایک روبوٹکس انجینئر اور ایک انسان نما روبوٹ کے درمیان غیر معمولی محبت کے گرد گھومتی ہے، جس میں مزاح، جذبات اور ٹیکنالوجی کا دلچسپ امتزاج پیش کیا گیا تھا۔ فلم میں دھرمیندر اور ڈمپل کپاڈیہ جیسے تجربہ کار اداکار بھی شامل تھے، جنہوں نے فلم کو مزید مضبوط بنایا۔ اس انوکھے تصور اور ہلکے پھلکے انداز نے اسے ناظرین میں مقبول بنایا، جس کے بعد سیکوئل کی توقعات بڑھ گئیں۔

یہ بھی پڑھئے: سورو گنگولی کی بایوپک کا نام ’’دادا‘‘ راجکمار راؤ مرکزی کردار میں

دوسری جانب جھانوی کپور کے دیگر پروجیکٹس بھی خبروں میں ہیں، جہاں رپورٹس کے مطابق وہ رام چرن کے ساتھ ایک فلم میں نظر آئیں گی، تاہم اس حوالے سے بھی باضابطہ تصدیق کا انتظار ہے۔ فلم ’’تیری باتوں میں ایسا الجھا جیا ۲‘‘ ابھی ابتدائی مراحل میں ہے، لیکن کاسٹ اور کہانی کے حوالے سے سامنے آنے والی معلومات نے شائقین میں دلچسپی پیدا کر دی ہے۔ اب نظریں اس بات پر مرکوز ہیں کہ میکرز کب اس پروجیکٹ کا باضابطہ اعلان کرتے ہیں اور کیا یہ سیکوئل پہلی فلم کی کامیابی کو دہرا پائے گا۔