ممبئی کے تاریخی وانکھیڈے اسٹیڈیم میں کل ایک ایسا مقابلہ ہونے جا رہا ہے جس نے کرکٹ مبصرین کی توجہ اپنی جانب مبذول کروا لی ہے۔

ممبئی کے تاریخی وانکھیڈے اسٹیڈیم میں کل  ایک ایسا مقابلہ ہونے جا رہا ہے جس نے کرکٹ مبصرین کی توجہ اپنی جانب مبذول کروا لی ہے۔ ایک طرف ٹورنامنٹ کی سب سے حیران کن ٹیم زمبابوے ہے جو ناقابلِ شکست رہتے ہوئے ’’انڈر ڈاگ‘‘ کے طور پر ابھری ہے، تو دوسری طرف ویسٹ انڈیز کے نامور پاور ہٹرز ہیں جو اپنی جارحانہ بیٹنگ کے لیے مشہور ہیں۔زمبابوے نے اب تک نظم و ضبط اور بہترین ٹیم ورک کے ذریعے سب کو حیران کیا ہے۔ ان کی بیٹنگ انفرادی اننگز کے بجائے مضبوط شراکت داریوں پر منحصر ہے۔ ٹاپ آرڈر میں ۱۲۰؍ سے زائد کے اسٹرائیک ریٹ کے ساتھ ٹیم کو ٹھوس آغاز فراہم کر رہے ہیں۔ 
کپتان اور آل راؤنڈر سکندر رضا ٹیم کی ریڑھ کی ہڈی ثابت ہو رہے ہیں، جو مڈل آرڈر کو استحکام بخشتے ہیں۔ بلیسنگ موزاربانی اور بریڈ ایونز اپنی رفتار اور لینتھ میں تبدیلی کے ذریعے حریف بلے بازوں کو پریشان کر رہے ہیں، جبکہ ویلنگٹن مساکادزا اسپن کے شعبے میں کلیدی کردار ادا کریں گے۔  ویسٹ انڈیز اپنی روایتی ٹی ۲۰؍ فلسفے یعنی ’’جارحانہ بیٹنگ‘‘ کے ساتھ میدان میں اترے گی۔ 
شائی ہوپ ۵۰؍ سے زائد کی اوسط کے ساتھ اننگز کو سنبھالنے کا کام کر رہے ہیں۔ روومین پاویل، شمرون ہٹمائر اور شیرفین ردرفورڈ ڈیتھ اوورز میں رنز کی رفتار بڑھانے کی بھرپور صلاحیت رکھتے ہیں۔  شیمر جوزف کی برق رفتار گیند بازی اور جیسن ہولڈر کا تجربہ بولنگ لائن اپ کو متوازن بناتا ہے۔ عقیل حسین اور گڈاکیش موتی مڈل اوورز میں رنز روکنے کے ماہر سمجھے جا رہے ہیں۔ 
وانکھیڈے کی پچ اپنی روایت کے برعکس اس بار کچھ سست روی کا شکار ہے، جہاں پہلی اننگز کا اوسط اسکور ۱۶۰؍ سے۱۷۰؍ کے درمیان دیکھا گیا ہے۔ تاہم، پہلے بیٹنگ کرنے والی ٹیم ۱۹۰؍ تک کا ہدف بھی دے سکتی ہے۔ ماہرین کے مطابق ٹاس جیتنے والی ٹیم پہلے فیلڈنگ کو ترجیح دے گی۔  ویسٹ انڈیز کو اپنی بیٹنگ کی گہرائی اور ہندوستانی کنڈیشنز میں کھیلنے کے تجربے کے باعث معمولی برتری حاصل ہے، لیکن زمبابوے کا اب تک کا ناقابلِ شکست سفر اس مقابلے کو آخری گیند تک سنسنی خیز بنا سکتا ہے۔ 

یہ بھی پڑھئےَ:’’ٹاکسک ‘‘ اور ’’دُھرندھر‘‘ دونوں فلمیں ایک دوسرے کو نقصان پہنچائیں گی

شیفرڈ کی زمبابوے کے خلاف واپسی کا امکان، ڈیرن سیمی کا اشارہ
ویسٹ انڈیز کے جارح مزاج آل راؤنڈر روماریو شیفرڈ، جو گزشتہ ایک ہفتے سے ٹیم سے باہر تھے، پیر کے روز زمبابوے کے خلاف پہلے سپر ایٹ میچ میں شرکت کر سکتے ہیں۔ ۳۱؍سالہ شیفرڈ نے ٹریننگ سیشن کے دوران اپنی فٹنیس اور فارم کا بھرپور مظاہرہ کیا، جہاں وہ وانکھیڈے اسٹیڈیم کی چھت کے اوپر سے بلند و بالا چھکے لگاتے نظر آئے۔
ویسٹ انڈیز کے ہیڈ کوچ ڈیرن سیمی نے شیفرڈ کی واپسی پر خوشی کا اظہار کرتے ہوئے کہاکہ ’’انہوں نے کل بہترین پریکٹس کی، بولنگ بھی اچھی رہی اور وہ گیند کو بہت کلین ہٹ کر رہے ہیں۔ ہمارے لیے سب سے اچھی بات یہ ہے کہ سپر ایٹ مرحلے میں تمام کھلاڑی سلیکشن کے لیے دستیاب ہیں۔ مجھے خوشی ہے کہ میرے تمام فوجی  جنگ کے لیے تیار ہیں۔

یہ بھی پڑھئے:رونالڈو کے ۲؍گول، سعودی پرولیگ میں النصر سرفہرست

شیفرڈ نے ٹورنامنٹ کے آغاز میں اسکاٹ لینڈ کے خلاف ہیٹ ٹرک سمیت ۵؍ وکٹ حاصل کئے  تھے ، لیکن ۱۱؍ فروری کے بعد سے وہ انجری کی وجہ سے ایکشن میں نظر نہیں آئے۔ سیمی نے حریف ٹیم زمبابوے کی کارکردگی کو سراہتے ہوئے کہا کہ وہ ایک خطرناک ٹیم ثابت ہو سکتی ہے۔ انہوں نے خاص طور پر سکندر رضا کا ذکر کیا جو اپنی مثال سے ٹیم کی قیادت کر رہے ہیں۔ سیمی کا کہنا تھا کہ زمبابوے کے شائقین کا جوش و خروش ان کے لیے اضافی حوصلہ افزائی کا باعث بنتا ہے۔