مہاراشٹر کی سرزمین پر ہر پہاڑی چوٹی پر کوئی نہ کوئی تاریخی قلعہ کھڑاہےجو صدیوں کی داستانیں سناتا ہے۔بھوپت گڑھ قلعہ مہاراشٹر کےپال گھر ضلع میں جوار تعلقہ کا واحد قلعہ ہے اور یہ چھترپتی شیواجی مہاراج کی مراٹھا سلطنت سے گہرا تعلق رکھتا ہے۔ یہ قلعہ مہاراشٹر کے خوبصورت ترین ٹریکس میں سے ایک ہے اور جوار کے قریب دیکھنے لائق مقامات میں سرفہرست ہے۔

بھوپت گڑھ قلعہ پال گھر ضلع میںجوار تعلقہ میں واقع ہے اور تھانےسے اس کا فاصلہ تقریباً ۱۳۰؍کلومیٹر ہے۔ قریب ترین شہر جوارہے اور یہ قلعہ جوار سے ۳۰؍کلومیٹر مشرق میں جوار سے مشرق کی طرف نکلنے والی پہاڑیوں کی شمالی سلسلے پر واقع ہے۔ 

۱۶۷۲ءمیںچھترپتی شیواجی مہاراج نے بھوپت گڑھ کے علاقےکو سوراجیہ میں شامل کیا۔ روایت کے مطابق چھترپتی اپنی سرکاری اور ذاتی مجالس اسی قلعے میں منعقد کرتے تھے۔اس قلعے کو سوراجیہ میں شامل کرنے کے بعد یہ ایک نگرانی چوکی کے طور پر استعمال ہوتا تھا۔ شیواجی مہاراج کی وفات کے بعد مغلوں نے ۱۶۸۸ءمیں اس قلعے پر قبضہ کر لیا۔تجارتی راستے کی نگرانی کے حوالے سے یہ قلعہ ترمبک-واڈہ تجارتی راستے پر نظر رکھنے کے لیے انتہائی اہم تھا۔ ۱۹۴۷ءتک یہ قلعہ جوار ریاست کا حصہ رہا۔

بھوپت گڑھ ایک وسیع سطح مرتفع پر قائم ہے۔ کچھ فصیلیں اب بھی موجود ہیں اور محلوں کے کھنڈرات نظر آتے ہیں۔ پیچھے پانی کے ٹینک بنے ہوئے ہیں۔قلعے میں ۲؍داخلی دروازے ہیں،ایک شمال سے اور ایک جنوب سے لیکن دونوں خستہ حال ہیں۔ اس کے علاوہ پتھر میں تراشے ہوئے پانی کے ٹینک بھی موجود ہیں۔

قلعے کے اوپر محل کی موجودگی کی نشاندہی کرنے والے کھنڈرات بھی دیکھے جا سکتے ہیں۔

یہ ایک بہترین یک روزہ ٹریک ہے جو خوبصورت قدرتی مناظرسے بھرپور ہے۔ قلعے تک کُرلوڈ یا زاپ بیس گاؤں سے ایک آسان ٹریک کے ذریعے ایک گھنٹے میں پہنچا جا سکتا ہے۔سیاحوں کے تجربات کے مطابق ٹریک کا راستہ قدرے چیلنجنگ ہے جس میں ناہموار راستے، پتھریلے حصے اور تنگ پگڈنڈیاں شامل ہیں۔ جنگل کے درمیان سے گزرنا ایک مہم جویانہ تجربہ دیتا ہے اور پرسکون ماحول آپ کو فطرت سے گہرائی سے جوڑتا ہے۔ مانسون میں سرسبزی اور دھند اس ٹریک میں اضافی خوبصورتی لاتی ہے۔یہاں سے تِرنگل واڑی، ہریہر، ترمبکیشور، جوار اور موکھاڈا کے مناظر نظر آتے ہیں۔

 

 

قلعے کی سیر کے بعد جوار میں جے وِلاس محل کا دورہ ضرور کریں۔یہ جوار کے شاہی خاندان موکانے راجوں کا محل ہے جو مراٹھا فنِ تعمیر کا ایک شاندار نمونہ ہے۔ سیاحوں کے مطابق یہاں قدیم دور کی عظمت کا احساس ہوتا ہے اور محل کے اندر شاہی نوادرات اور پینٹنگز موجود ہیں۔اکتوبر سے فروری تک یہاں کی سیر کا بہترین وقت ہے۔مانسون میں قلعے کا ٹریک انتہائی دلکش ہو جاتا ہے جب چاروں طرف سرسبزی ہوتی ہے اور دھند پہاڑوں کو ڈھانپ لیتی ہے۔

 

 

ممبئی سےبھوپت گڑھ تک پہنچنے کا راستہ کچھ اس طرح ہے۔ آپ کو ممبئی- نوی ممبئی-تھانے ویسٹ- پیلہر- سفالےہوتے ہوئے جوار اور پھر زاپ گاؤں کے راستے بھوپت گڑھ قلعہ تک پہنچنا ہوگا۔گاڑی کو چِنچپاڈ گاؤں کے قریب پارک کریں اور وہاں سے پیدل ٹریک شروع کریں۔ راستے پر کوئی نشاندہی نہیں ہے اس لیے مقامی لوگوں سے راستہ پوچھتے جائیں۔ مانسون میں سڑکیں بند ہو سکتی ہیں اس لیے گاڑی کو مرکزی سڑک پر ہی چھوڑنا بہتر ہے۔