دنیاکی معروف فیشن کمپنیوں میں کیلون کلائن کا نام نہایت احترام اور اہمیت کے ساتھ لیا جاتا ہے۔ یہ برانڈ محض ملبوسات تک محدود نہیں بلکہ جدید طرزِ زندگی، نفاست، سادگی اور منفرد ڈیزائن کا استعارہ بن چکا ہے۔ گزشتہ ۵؍دہائیوں کے دوران اس امریکی برانڈ نےملبوسات، خوشبوؤں، زیر جاموں، جوتوں، گھڑیوں اور فیشن سے متعلق دیگرمصنوعات کے میدان میں عالمی سطح پر اپنی ایک الگ شناخت قائم کی ہے۔ آج دنیا کے تقریباً ہر بڑے شہر میں کیلون کلائن کی مصنوعات دستیاب ہیں اور یہ برانڈ نوجوانوں سے لے کر بڑی عمر کے افراد تک یکساں مقبولیت رکھتا ہے۔

کیلون کلائن کی بنیاد۱۹۶۸ءمیں امریکی شہر نیویارک میں رکھی گئی تھی۔اس کے بانی معروف فیشن ڈیزائنر کیلون رچرڈ کلائن ہیں، جنہوں نے اپنے کاروباری ساتھی بیری شوارتز کے ساتھ مل کر اس کمپنی کا آغاز کیا۔ ابتدا میں یہ ادارہ صرف کوٹ اور خواتین کے ملبوسات تیار کرتا تھا، لیکن جلد ہی اس کے منفرد ڈیزائن اور جدید طرز نے فیشن کی دنیا میں ہلچل مچا دی۔

 

 

کیلون کلائن کی سب سے بڑی خصوصیت اس کا سادہ مگر پُرکشش ڈیزائن فلسفہ ہے۔ اس برانڈ نے ہمیشہ کم سے کم آرائش اور زیادہ سے زیادہ نفاست کے اصول کواپنایا ہے۔ صاف ستھرے خطوط، ہلکے رنگ، آرام دہ کپڑے اور جدید تراش خراش اس کی بنیادی شناخت بن چکے ہیں۔فیشن کے ماہرین کے مطابق کیلون کلائن نے دنیا بھر میں ’منیملزم‘یا سادگی پر مبنی فیشن کے رجحان کو فروغ دینے میںاہم کردار ادا کیا۔ یہی وجہ ہے کہ اس کے ملبوسات وقتی فیشن کے بجائے دیرپا خوبصورتی اور وقار کی علامت سمجھے جاتے ہیں۔

۱۹۷۰ءکی دہائی کے آخر میں کیلون کلائن نے جینز کے شعبے میں قدم رکھا اور جلد ہی اس میدان میں انقلاب برپا کر دیا۔ اس سے قبل جینزکو زیادہ تر روزمرہ کے عام لباس کے طور پر دیکھا جاتا تھا، لیکن کیلون کلائن نے اسے فیشن کی دنیا کا اہم حصہ بنا دیا۔

۱۹۸۰ءمیں اداکارہ بروک شیلڈز کے ساتھ بنائی گئی مشہور اشتہاری مہم نے دنیا بھر میں تہلکہ مچا دیا۔ اس اشتہار نے نہ صرف برانڈ کی مقبولیت میں اضافہ کیا بلکہ جینز کو ایک فیشن آئیکون کی حیثیت بھی دلائی۔آج بھی کیلون کلائن جینز اس کمپنی کی سب سے زیادہ فروخت ہونے والی مصنوعات میں شمار ہوتی ہیں۔

آج کیلون کلائن دنیا کے درجنوں ممالک میں موجود ہے۔ اس کےاسٹورز امریکہ، یورپ، ایشیا، مشرق وسطیٰ اور دیگر خطوں میں قائم ہیں۔کمپنی کی مصنوعات بڑے ڈپارٹمنٹل اسٹورز، خصوصی فیشن شاپس اور آن لائن پلیٹ فارمز کے ذریعے بھی فروخت کی جاتی ہیں۔ ۲۰۰۳ءمیں امریکی فیشن کمپنی پی وی ایچ کارپوریشن نے کیلون کلائن کو خرید لیا، جس کے بعد اس برانڈ کی بین الاقوامی توسیع میں مزید اضافہ ہوا۔ آج یہ دنیا کے سب سے بڑے فیشن گروپوں میں شمار ہوتا ہے۔

 

 

ہندوستان میں بھی کیلون کلائن کی مقبولیت مسلسل بڑھ رہی ہے۔ ممبئی، دہلی، بنگلورو، حیدرآباد، پونے اور دیگر بڑے شہروں کے شاپنگ مالز میں اس کے خصوصی اسٹورز موجود ہیں۔ہندوستانی صارفین خاص طور پر کیلون کلائن کی جینز، انڈرویئر، ٹی شرٹس، خوشبوؤں اور گھڑیوں کو پسند کرتے ہیں۔ آن لائن خریداری کے مختلف پلیٹ فارمز پر بھی اس کی مصنوعات آسانی سے دستیاب ہیں۔ اس کے علاوہ ممبئی کے اہم مقامات پر اس کے بڑے بڑے اور عالیشان اسٹور موجود ہیں۔ اس کے اسٹورممبئی کے کف پریڈ علاقے اور قلابہ میں کے علاوہ باندرہ کرلا کمپلیکس،لوئر پریل کے فنکس پلاڈیم مال،کرلا کے فنکس مارکیٹ سٹی مال،اندھیری کے ساکی ناکہ علاقے، اندھیری ویسٹ کے ورسوا علاقے،گوریگائوں کے اوبرائے مال، ملاڈ کے انفنیٹی مال،نیرول کے سیکٹر ۴۰؍ اورتھانے کے لکشمی نگر میں موجود ہیں جہاں سے خریداری کی جاسکتی ہے۔