مقبول، اومکارا اور حیدر جیسی فلموں کے خالق وشال بھاردواج نے ایک اور شاندار فلم پیش کی ہے، خون خرابے اور عشق و محبت دونوں کویکجا کیا گیا ہے۔

او‘ رومیو (O` Romeo)
اسٹارکاسٹ: شاہد کپور، ترپتی ڈمری، اویناش تیواری، نانا پاٹیکر، دیشا پٹانی، فریدہ جلال، شکتی کپور، رام کپور، تمنا بھاٹیہ
ڈائریکٹر: وشال بھاردواج
رائٹر: وشال بھاردواج، روہن نرولا، حسین زیدی
پروڈیوسر: ساجد ناڈیاڈوالا
موسیقار: وشال بھاردواج
سنیماٹوگرافر: کلیمینس بیکر، بین برنہارڈ، سوربھ گوسوامی
کاسٹنگ ڈائریکٹر: مکیش چھابرا
پروڈکشن ڈیزائنر: مصطفیٰ اسٹیشن والا
کاسٹیوم ڈیزائن: میکسیما باسو، مارٹا مارگو گومز
ریٹنگ:****
آج کل محبت پر مبنی کہانی اور دوسری طرف خطرناک ایکشن یعنی بھرپور خون خرابہ ہی فلموں کا اہم موضوع بنا ہوا ہے۔ اکثر فلموں میں یہی چیزیں دیکھنے کو مل رہی ہیں اور تنقیدوں کامرکز بن رہی ہیں لیکن وشال بھاردواج جیسے عمدہ ہدایت کار ہوتے ہیں تو خون خرابے کو بھی اس انداز میں پیش کرتے ہیں کہ لوگ اس کی تعریف کرنے پر مجبور ہوجاتے ہیں۔ یہی حال اس ہفتہ یعنی ویلنٹائن ڈے سے ایک دن پہلے مشہور عاشق کے کردار کے عنوان پر مبنی فلم کا ہے جو نام کی مناسبت سے محبت کی کہانی ہے لیکن ساتھ ہی گینگ وار بھی اس کا ایک اہم حصہ ہے۔ 
فلم کی کہانی
استرا (شاہد کپور) فلم کے تاریک لہجے کو ترتیب دیتے ہوئے ’دھک دھک کرنے لگا‘کی تھاپ پر ابتدائی منظر میں زبردست انٹری دیتے ہیں۔ استراایک خطرناک کانٹریکٹ کلر(کرائے کا قاتل) ہے جو اپنے ہدف کے جسم سے روح کوالگ کردیتا ہے۔ جس صفائی سے وہ استرے پر ہاتھ نچاتا ہےاسی شاندار انداز میں ٹھمکے بھی لگاتا ہے۔ لیکن اس کی دھن خان صاحب (نانا پاٹیکر)طے کرتے ہیں۔ ایک آئی بی افسر خان صاحب، دوسرے غنڈوں کو ختم کرنے کے لیے استراکا استعمال کرتے ہیں۔ لیکن اسی وقت اس دل پھینک منچلے کی زندگی میں افشاں (ترپتی ڈمری) داخل ہوتی ہے۔ افشاں بدلہ لینا چاہتی ہے۔ افشاں استرا کے پاس خونخوار گینگسٹر جلال (اویناش تیواری) اور اس کے تین ساتھیوں کی سپاری لے کر آتی ہے لیکن اسے رومیو بنا جاتی ہے۔ اب کہانی میں ایسا کیا ہوتا ہے ؟ افشاں کیوں جلال کو مارنا چاہتی ہے؟ یہ رومیو اپنی عاشقی میں کس حد تک جاتا ہے، یہ سب جاننے کیلئےآپ کو فلم دیکھنا ہوگی۔ 
ہدایت کاری
یہ کہانی معروف مصنف حسین زیدی کی کتاب ’مافیا کوئینز آف ممبئی‘ سے اخذ کی گئی ہے جس کی بنیاد پر وشال بھردواج نے محبت اور انتقام کی ایک سنسنی خیز دنیا تخلیق کی ہے۔ کہانی گینگسٹرز پر مرکوز ہے، اور یہ دنیا تاریک اور خونریزی سے بھری ہوئی ہے، اس لیے یہ کبھی کبھی بوجھل محسوس ہوسکتی تھی۔ لیکن پھر وشال بھردواج نے اس میں محبت، دوستی اور قربت کی مٹھاس ڈال دی۔ اس کےابتدائی حصےمیں، ۹۰؍کی دہائی کے’’دھیرے دھیرے سے میری زندگی میں آنا...‘‘ اور’’اے میرے ہمسفر...‘ جیسے گانے ایک پرسکون احساس فراہم کرتے ہیں۔ 

یہ بھی پڑھئے: ودھ۲: عمدہ کہانی میں سنجے مشرا اور نینا گپتا کی شاندار اداکاری

وشال بھردواج اتنے ہی شاندار ہدایت کار ہیں جتنے وہ ایک شاندارموسیقار ہیں۔ اس فلم میں ان کا میوزک بھی شاندار ہے۔ ’عاشقوں کی کالونی‘، ’عشق کا بخار‘، اور’نیچے پان کی دُکان‘جیسے گانے متاثر کن ہیں، جس کا کچھ حصہ گلزار کے بولوں کی بدولت ہے۔ 
اداکاری 
اداکاری کی بات کریں تواس معاملے میں یہ فلم غیرمعمولی ہے۔ شاہدکپورنے بطور استرا اپنے کریئرکی ایک اور شاندار کارکردگی پیش کی ہے۔ ان کے پاس اپنی انفرادیت، خوف، درد اور محبت کو ظاہر کرنے کا موقع ہے اور انہوں نےاس سے بھرپورفائدہ اٹھایا ہے۔ یہی بات ترپتی ڈمری پر بھی لاگو ہوتی ہے۔ ترپتی نے افشاں کی معصومیت، غصہ، جرم اور ضد کے ہر پہلو کو شاندار طریقے سے پیش کیا ہے۔ 
مزید برآں، نانا پاٹیکرجب بھی اسکرین پر نظر آتے ہیں ایک پاور ہاؤس محسوس ہوتےہیں۔ وہ اکثرشاندار تاثرکے معاملے میں شاہدکو پیچھے چھوڑ دیتے ہیں۔ اویناش تیواری بھی جلال کے طور پر مضبوط ہیں، لیکن ان کے کردارکو ملنے والی گہرائی اور تہوں کی کمی ہے، جو فلم کا ایک کمزور نقطہ ہے۔ دریں اثنا، راہل دیشپانڈے بطور انسپکٹر پتھارے، جو کلاسیکی گانے گاتے ہیں، اور حسین دلال بطور استرا کے دوست، بہترین ہیں۔ 
باقی کاسٹ، بشمول دیشا پٹانی، تمنا بھاٹیہ، ارونا ایرانی، وکرانت میسی، اور فریدہ جلال، فلم میں اسٹار پاور کا اضافہ کرتے ہیں۔ 
کیوں دیکھیں ؟
یہ ایک دلکش گینگسٹر ڈرامہ فلم ہے۔ شاہد کپور اور ترپتی ڈمری کی شانداراداکاری کے ساتھ ساتھ وشال بھردواج کی طاقتور ڈائریکشن بھی اسے دیکھنے کے قابل بناتی ہے۔