۳۰؍ہزار روپے سے شروع ہونے والی قیمت میں آپ کو ایک عمدہ پروسیسر، دلکش ڈیزائن اور بہتر کیمرے دستیاب ہوتے ہیں جواچھا تجربہ ثابت ہوتے ہیں۔

ہندوستان میں مڈ رینج اسمارٹ فون مارکیٹ گزشتہ چند برسوں میں کافی حد تک ایک جیسی ہوتی جارہی ہے۔ ایک پریمیم دکھائی دینے والا ڈیزائن تیار کیجئے، بڑی بیٹری شامل کردیجئے، کیمروں میں معمولی تبدیلی کردیجئے، چند اے آئی فیچرز ڈال دیجئے اور فون مارکیٹ میں اتار دیجئے۔ اگرچہ یہ فارمولہ کامیاب ضرور رہا ہے، لیکن اسی وجہ سے اس زمرے کے فونز کیلئے واقعی منفرد نظر آنا مشکل ہوگیا ہے۔ جہاں مقابلہ کرنے والی کمپنیاں ’سیلفی مرر‘یا خم دار شیشے جیسے چمکدار فیچرز کے ذریعے فون کو زیادہ پریمیم دکھانے کی کوشش کررہی ہیں، وہیں ون پلس نے اپنے نئے مڈ رینج فون ون پلس نورڈ سی ای ۶؍کے ساتھ ایک مختلف راستہ اختیار کیا ہے۔ 
قیمت
ہندوستان میں اس کی قیمت ۸؍جی بی ریم اور ۱۲۸؍ جی بی اسٹوریج والے بنیادی ویریئنٹ کیلئے ۲۹؍ہزار ۹۹۹؍روپے سے شروع ہوتی ہے۔ ہر کسی کو خوش کرنے کی کوشش کرنے کے بجائے یہ فون اُن صارفین کو ہدف بناتا ہے جو دکھاوے سے زیادہ پرفارمنس کو ترجیح دیتے ہیں اور ایک قابلِ اعتماد روزمرہ اسمارٹ فون چاہتے ہیں۔ 
ڈیزائن
ڈیزائن کی بات کریں تو جیسا کہ ابتدائی تجربے میں محسوس ہوا تھا، نورڈ سی ای ۶؍ ون پلس کی حالیہ ڈیزائن کو آگے بڑھاتا ہے اور اس میں ایسی نفاست شامل کرتا ہے جو اسے ہاتھ میں زیادہ پریمیم محسوس کراتی ہے۔ اس فون کا فریم اپنے پیشرو کے مقابلے میں زیادہ فلیٹ ہےجبکہ کنارے ہلکے گول ہیں، جس کی وجہ سے اسے پکڑنے میں آسانی ہوتی ہے اور یہ ہاتھ میں چبھتا نہیں۔ 
فون کی موٹائی تقریباً۸ء۵؍ملی میٹر ہے، اگرچہ وزن کچھ زیادہ محسوس ہوتا ہے، لیکن وزن کی تقسیم متوازن ہونے کے باعث یہ ایک ہاتھ سےاستعمال کرنے میں زیادہ بھاری محسوس نہیں ہوتا۔ اس کا پچھلا حصہ پولی کاربونیٹ سے تیار کیا گیا ہے، مگر اس کا احساس سستا نہیں لگتا۔ فراسٹڈ میٹ فنش انگلیوں کے نشانات کو کافی حد تک کم کردیتی ہے، اگرچہ فون اب بھی کافی پھسلنے والا محسوس ہوتا ہے۔

یہ بھی پڑھئے: انفنکس نوٹ ۶۰؍پرو: کئی عمدہ صلاحیتوں کا حامل اسمارٹ فون

ڈسپلے
ڈسپلے اس فون کی سب سے بڑی خوبیوں میں شامل ہے۔ رنگ شوخ اور جاندار دکھائی دیتے ہیں مگر ضرورت سے زیادہ مصنوعی محسوس نہیں ہوتے۔ ایچ ڈی آر سپورٹ کی وجہ سے او ٹی ٹی پلیٹ فارمز پر فلمیں اور ویب سیریز دیکھنے کا تجربہ کافی شاندار ہوجاتا ہے۔ باریک اور یکساں بیزلز اس تجربے کو مزید بہتر بناتے ہیں۔ اس کے علاوہ اسٹیریو اسپیکرز کی آواز بھی کافی بلند اور واضح ہے۔ اگرچہ باس کچھ کم محسوس ہوتا ہے، لیکن زیادہ والیوم پر بھی آواز میں بگاڑ پیدا نہیں ہوتا۔ 
سافٹ ویئر
یہ فون آکسیجن او ایس پر چلتا ہے جو کہ کافی صاف ستھرا اور ہموار تجربہ فراہم کرتا ہے۔ اس میں نورڈ ۶؍ کے تمام فیچر موجود ہیں۔ 
ہارڈویئر
پرفارمنس کے لحاظ سے اس میں اسنیپ ڈریگون ۷؍ایس جین ۴؍ پروسیسر دیا گیا ہے، جس کے ساتھ ایڈرینو ۸۱۰؍ جی پی یو، ۸؍جی بی ریم اور ۲۵۶؍ جی بی تک اسٹوریج ملتی ہے۔ فون میں بہتر تھرمل مینجمنٹ کیلئے ویپر چیمبر کولنگ سسٹم موجود ہے۔ 
کیمرہ
کیمروں کی بات کریں تو فون میں ۵۰؍میگا پکسل کا مین کیمرا دیا گیا ہے جس کے ساتھ او آئی ایس سپورٹ موجود ہے۔ دن کی روشنی میں یہ کیمرا تفصیلی تصاویر لیتا ہے، جن میں رنگ قدرتی اور ڈائنامک رینج متوازن محسوس ہوتی ہے۔ یہ واضح طور پر محسوس ہوتا ہے کہ ون پلس نے اس بار تصویروں میں ضرورت سے زیادہ پروسیسنگ کم کردی ہے، جس کی وجہ سے تصاویر نسبتاً صاف اور حقیقت سے قریب محسوس ہوتی ہیں۔ 
بیٹری
بیٹری لائف حالیہ ون پلس فونزکی ایک بڑی طاقت رہی ہے اور نورڈ سی ای۶؍بھی اسی روایت کو برقرار رکھتا ہے۔ کمپنی نے اس میں ۸ہزار ایم اے ایچ کی بڑی بیٹری دی ہے، جو ایک دن سے کہیں زیادہ آرام سے چل جاتی ہے۔ درمیانی استعمال، جیسے نیویگیشن، کیمرا اور سوشل میڈیا کے باوجود فون نے مکمل دن بخوبی گزارا جبکہ عام صارفین کیلئے یہ ڈیڑھ دن تک آسانی سے چل سکتا ہے۔ چارجنگ اسپیڈ بھی اچھی ہے۔ ۸۰؍واٹ سوپر وی او او سی چارجر کی مدد سے فون تقریباً ایک گھنٹہ۵؍ منٹ میں سو فیصد تک چارج ہوجاتا ہے۔