رتناگیری میں واقع یہ نیم دائرہ نماساحل آلودگی سے پاک اور پرسکون ہے،یہاں کی آب و ہوا بھی مرطوب معتدل ہےجو بہت ہی اچھی لگتی ہے۔

مہاراشٹر کے رتناگیری ضلع میں واقع ویلنشور بیچ، کوکن کے ساحلی علاقوں میں ایک ایسا مقام ہے جو اپنی قدرتی خوبصورتی، دلکش ماحول اور مقامی ثقافت کے امتزاج کے لیےمشہور ہے۔ اگر آپ ’سیرِقرب و جوار‘کے تحت ایک منفرد اور پُرسکون سفر کی تلاش میں ہیں، تو ویلنشور بیچ آپ کے لیے بہترین انتخاب ہو سکتا ہے۔ 
ساحل کیسا ہے؟
 ویلنشور بیچ ایک نیم دائرہ نماساحل ہے جو اپنی صاف ستھری سفیدریت اور ہموار ساحلی پٹی کیلئےجانا جاتا ہے۔ یہاں کی فضا پُرسکون اوربھیڑ بھاڑ سے پاک ہے، جو اسے آرام اور سکون کے متلاشیوں کے لیے مثالی بناتی ہے۔ ویلنشور کا ساحل ناریل اور پام کے درختوں سے سجا ہوا ہے، جو ساحلی علاقوں کے قدرتی توازن کے محافظ سمجھے جاتے ہیں۔ یہاں کا مینگرووزاگرچہ بڑے پیمانے پر موجود نہیں، مگر اطراف میں کچھ علاقوں میں چھوٹے مینگروو کلسٹر پائےجاتے ہیں، جو مقامی آبی حیات کی پناہ گاہ ہیں۔ یہ علاقہ مہاراشٹر کے’ویسٹرن گھاٹ اور ’کوکن کے ساحل‘کےسنگم پر واقع ہے، جس کی وجہ سے یہاں مرطوب معتدل آب و ہوا پائی جاتی ہے۔ یہی وجہ ہے کہ یہاں کئی طرح کے پرندے، جھینگے، کیکڑے، اور دیگر چھوٹے آبی جاندار بکثرت دیکھے جا سکتے ہیں۔ 
پرسکون ماحول
 خوش آئند بات یہ ہے کہ ویلنشور بیچ ابھی تک بڑی کمرشیل یلغارسے محفوظ ہے۔ یہاں کی ریت حیرت انگیز حد تک صاف ستھری اور غیر آلودہ ہے۔ یہ اس بات کا ثبوت ہے کہ مقامی آبادی ساحل کے قدرتی حسن اور صفائی کا خیال رکھتی ہے۔ لیکن مستقبل میں اگر سیاحت میں اضافہ ہوتا ہے تو یہاں ٹھوس کوڑا، پلاسٹک، اور سیویج سسٹم پر کام کرنا لازمی ہوگا تاکہ بیچ کی اصل فطری شان قائم رہے۔ یہ بھی ضروری ہے کہ سیاح خود بھی صفائی اور خاموشی کا خیال رکھیں، کیونکہ ساحل کی خاموش فطرت ہی اس کا اصل سرمایہ ہے۔ 
تیراکی آسان
 ویلنشور بیچ کی لہریں عام طور پر ہموار اور نرم مزاج ہوتی ہیں۔ یہ ساحل نہایت ہی کم گہرائی والے ساحلوں میں شمار ہوتا ہے، جس کی وجہ سےیہاں تیرنے والے سیاحوں کے لیے زیادہ خطرہ نہیں ہوتا لیکن چونکہ کوئی باقاعدہ لائف گارڈسروس موجود نہیں، اس لیے احتیاط لازمی ہے۔ ساحل کے کنارے کوئی بڑی چٹانی آڑ یا ٹکراؤ نہیں، جس کی وجہ سے یہ بیچ قدرتی ایروشن (زمین کے کٹاؤ) سے کسی حد تک محفوظ ہے، تاہم طویل مدتی ماحولیاتی تبدیلیوں اور سمندر کی سطح میں اضافے سے یہاں کے قدرتی توازن کو چیلنج درپیش ہو سکتے ہیں۔ ویلنشور ایک روایتی ماہی گیر بستی بھی ہے، جہاں مقامی لوگ اب بھی چھوٹی کشتیوں سےماہی گیری کرتے ہیں۔ ان کی روزمرہ زندگی اور معیشت براہِ راست سمندر سے جڑی ہوئی ہے۔ وہ ماہی گیری کیلئے روایتی طریقے استعمال کرتے ہیں، جو ماحول دوست اور پائیدار ہیں۔ 
 یہاں کیسے جائیں ؟
 ویلنشور بیچ، گُہاگَرسےتقریباً ۲۰؍کلومیٹر جنوب میں واقع ہے۔ ممبئی سے اس کا فاصلہ تقریباً ۳۳۰؍کلومیٹر ہے، جسے مختلف ذرائع سے طے کیا جا سکتا ہے۔ ذیل میں اس کی تفصیل پیش ہے۔ 
بذریعہ ٹرین :ممبئی سے چپلون تک کوکن ریلوے کے ذریعے سفر کریں۔ چپلون سے گُہاگَر کے لیے بسیں دستیاب ہیں، اور وہاں سے آٹو رکشہ کے ذریعے ویلنشور پہنچا جا سکتا ہے۔ 
سڑک کے راستے:اگر آپ اپنی کار سےجارہے ہیں توممبئی-گوا ہائی وےکے راستے سفر کرتے ہوئے، گُہاگَر سے ویلنشور کی طرف مڑیں۔ یہ سفر تقریباً۷؍تا ۸؍گھنٹے کا ہے، جو سڑک کی حالت اور ٹریفک پر منحصر ہے۔ 
بس کے ذریعہ:ممبئی، پونے اور کولہاپور سے گُہاگَر کے لیے اسٹیٹ ٹرانسپورٹ کی بسیں چلتی ہیں۔ گُہاگَر سے ویلنشور کے لیے مقامی بسیں یا آٹو رکشہ دستیاب ہیں۔