ریلوے کا کنفرم ٹکٹ حاصل کرنے کیلئے ہونے والی کھینچا تانی اور اس کے پیچھے کے عوامل کو مزاح کے ساتھ پیش کرنے کی کوشش کی گئی ہے۔

ویٹنگ ہے (Waiting Hai)
اسٹریمنگ ایپ: ایم ایکس اوریجنل(۷؍ایپی سوڈ)
اسٹار کاسٹ: دویندو شرما، بھوون اروڑا، کمودمشرا، وجے موریہ، ہرشیتا گور، سنیتا راجور، یشپال شرما، دیاشنکر پانڈے، نوید اسلم
ڈائریکٹر: سمیر ودوان
رائٹر: شریاس جین، پرتیک پایودھی، اشیش تھامس
پروڈیوسر: اجے رائے، ثنا وارثی، دیپک سمہل، جیوتی دیشپانڈے
موسیقار: ڈینیل بی جارج
سنیماٹوگرافر: نوگت پرکاش
ایڈیٹر: نکھل پریہار 
کاسٹنگ ڈائریکٹر: لوکش گپتا
آرٹ ڈائریکٹر: شانِ علی خان
ریٹنگ:***
ہندوستانی ریلوے کو ملک کی لائف لائن کہا جاتا ہے۔ ہر روز اوسطاً۲ء۴؍کروڑ مسافر اس کے ذریعے سفر کرتے ہیں۔ ریلوے کی کنفرم ٹکٹ حاصل کرنے کے لیے ہونے والی مارا ماری کسی سے پوشیدہ نہیں ہے۔ خاص طور پر تتکال کاکنفرم ٹکٹ حاصل کرنا عام مسافروں کے لیے کسی جدوجہد سے کم نہیں۔ او ٹی ٹی پلیٹ فارم ایمیزون ایم ایکس پلیئرکی نئی ویب سیریز ’ویٹنگ ہے‘ عام مسافروں کی اسی پریشانی اور الجھن کو موضوع بناتی ہے۔ 
کہانی 
کہانی کے مرکزمیں سگم مشرا (دِویندو شرما) ہیں، جو ریلوے پروٹیکشن فورس میں نئےبھرتی ہونے والے کانسٹیبل ہیں۔ وہ ابھی اپنی ملازمت اور ازدواجی زندگی، دونوں کو سمجھنے کی کوشش کر رہے ہیں۔ ڈیوٹی سنبھالنے کے کچھ ہی عرصے بعد سگم کو ایک عجیب صورت حال کا احساس ہوتا ہے۔ عام مسافروں کو کنفرم تتکال ٹکٹ حاصل کرنے کیلئےسخت جدوجہد کرنی پڑتی ہے، جبکہ کچھ ایجنٹ انہیں انتہائی آسانی سے اور مشتبہ انداز میں حاصل کرلیتے ہیں۔ 
خود کو ثابت کرنے، اپنے سینئر افسران کا اعتماد حاصل کرنے اور اپنےمرحوم والد کی یادوں کا احترام رکھنے کی خواہش میں سگم مشرا اس گڑبڑکی تہہ تک پہنچنے کی کوشش شروع کرتےہیں۔ ان کی تفتیش انہیں افروز (بھون اروڑہ) تک لے جاتی ہے، جو کمپیوٹر کا ایک ہونہار طالب علم ہے اور ریلوے کے بکنگ سسٹم میں ہیر پھیر کرنے کے طریقے تلاش کرلیتا ہے۔ 
ایک لڑکی کو متاثر کرنے کی معصوم سی کوشش کے طور پر شروع ہونے والایہ کام رفتہ رفتہ ایک انتہائی منافع بخش کاروبار میں تبدیل ہوجاتا ہے۔ بے عزتی اور مسترد کیے جانے کا سامنا کرنے کے بعد افروز اپنے چالاک ماموں (وجے موریہ) کی وجہ سے اس ریکٹ میں مزید گہرائی تک دھنس جاتا ہے۔ اب غیر قانونی تتکال ایجنٹوں کے بڑے نیٹ ورک اور پولیس کے درمیان چوہے بلی کا یہ کھیل کہاں تک پہنچتا ہے، یہ جاننے کے لیے سیریز دیکھنی ہوگی۔

یہ بھی پڑھئے: علی بابا اور۴۰؍بھوت: الف لیلوی کہانی کوہارر کامیڈی بناکر پیش کرنے کی کوشش

ہدایت کاری
’ویٹنگ ہے‘ کی سب سے دلچسپ بات یہ ہے کہ یہ تتکال ٹکٹ کےگھوٹالے کو محض پولیس اور مجرم کے درمیان ہونے والی روایتی جنگ کےطور پر پیش نہیں کرتی۔ سگم اور افروز کئی اعتبار سے ایک دوسرے کے متوازی کردار ہیں۔ سگم صحیح کام کرنے کی خواہش کے ساتھ نظام کا حصہ بنتےہیں، لیکن انہیں جلد ہی اندازہ ہوجاتا ہے کہ محکمے کی افسر شاہی اور درجہ بندی کے درمیان ایمانداری برقرار رکھنا کتنا مشکل ہے۔ 
دوسری طرف افروزایک ناتجربہ کار نوجوان کے طور پر سامنے آتا ہے، جو اپنی تکنیکی صلاحیتوں کا استعمال ابتدا میں ایک بے ضرر مقصد کیلئےکرتا ہے۔ لیکن بعد میں اسے احساس ہوتا ہے کہ اسی ہنر سے وہ پیسے بھی کما سکتا ہے۔ سیریز میں دونوں کرداروں کے سفر آہستہ آہستہ ایک دوسرے سے جڑتے ہیں، جس سے شو کو اس کے اسکیم والے بنیادی موضوع کے مقابلے میں کہیں زیادہ مضبوط جذباتی بنیاد ملتی ہے۔ 
اداکاری
بھون اروڑہ نےافروز کے کردار میں گہری اداکاری کی ہے۔ ایک بھولے بھالے اور قدرے عجیب و غریب طالب علم سے ایک پراعتماد آپریٹر بننے تک افروز کاسفر بتدریج اور قابل یقین انداز میں دکھایاگیا ہے۔ جس بے عزتی کی وجہ سے وہ اس ریکٹ میں شامل ہوتا ہے، وہ اسے محض ایک عام ٹیکنالوجی کے مجرم کے بجائے ایک جذباتی پس منظر بھی فراہم کرتی ہے۔ سگم کے کردار میں دِویندو شرما بھی اتنے ہی مؤثر نظر آتے ہیں۔ انہوں نے ایک ایسے پولیس اہلکار کی کمزوریوں کو بخوبی پیش کیا ہے جس کے پاس ہر سوال کا جواب نہیں ہوتا۔ اپنےسینئر افسران کے ساتھ پیش آنے والی مشکلات، نئی ذمہ داریوں اور ازدواجی زندگی کے درمیان توازن قائم کرنے کی ان کی کوششیں سگم کو ایک ایسے پولیس اہلکار کے بجائے ایک حقیقی انسان بنا دیتی ہیں جو کبھی غلطی نہیں کرتا۔ سیریز کی معاون کاسٹ بھی اس کے جذباتی پہلو کو مزید مضبوط بناتی ہے۔ ہرشیتا گور نے پرنسی کے کردار کو اس انداز میں ادا کیا ہے کہ وہ محض ہیرو کی بیوی بن کر نہیں رہ جاتیں۔ وہیں کُمُد مشرا نےاپنے کردار میں خاموش لیکن زبردست سنجیدگی پیدا کی ہے۔ 
نتیجہ
’ویٹنگ ہے‘ میں مزاح، جذبات اور سسپنس سب کچھ موجود ہے۔ اس کا بنیادی خیال بھی دلچسپ اور عام مسافروں کی زندگی سے جڑا ہوا ہے۔ تاہم اگر آپ ایک ہی خیال پر مبنی انتہائی مضبوط اور مسلسل گرفت رکھنے والی سیریز دیکھنا چاہتے ہیں تو یہ شو کچھ حد تک مایوس کرسکتا ہے۔