ایک طرف سوشل میڈیا پر مداح اپنے پسندیدہ ستاروں سے جڑ پاتے ہیں، تو دوسری طرف آن لائن ٹرولنگ بھی تیزی سے بڑھ رہی ہے۔ اسی مسئلے پر اب اداکارہ رکول پریت سنگھ نے ایک انٹر ویو میں اپنی بے باک رائے پیش کی۔

آج کے دور میں سوشل میڈیا فنکاروں کے لیے ایک ایسا پلیٹ فارم بن چکا ہے جہاں انہیں مقبولیت بھی ملتی ہے اور تنقید کا سامنا بھی کرنا پڑتا ہے۔ ایک طرف مداح اپنے پسندیدہ ستاروں سے جڑ پاتے ہیں، تو دوسری طرف آن لائن ٹرولنگ بھی تیزی سے بڑھ رہی ہے۔ اسی مسئلے پر اب اداکارہ رکول پریت سنگھ نے ایک انٹر ویو میں اپنی بے باک رائے پیش کی۔ اس دوران انہوں نے سوشل میڈیا کے اثرات اور اس سے مناسب فاصلہ برقرار رکھنے کی ضرورت پر زور دیا۔
 رکول پریت سنگھ نے کہاکہ ’’ایک فنکار کے لیے یہ بہت ضروری ہے کہ وہ سوشل میڈیا پر ہونے والے شور اور مسلسل آنے والے ردِعمل سے خود کو الگ رکھنا سیکھے۔ اگر کوئی فنکار انٹرنیٹ پر لکھی ہر بات کو دل پر لینے لگے تو اس کا اثر اس کے کام اور ذہنی حالت دونوں پر پڑ سکتا ہے۔ ایسے میں ضروری ہے کہ وہ اپنی توانائی اپنے کام پر لگائے۔‘‘
رکول نے اپنا تجربہ شیئر کرتے ہوئے کہاکہ ’’جب میں نے اپنے کیریئر کی شروعات کی تھی، اُس وقت سوشل میڈیا اتنا وسیع نہیں تھا۔ اُس دور میں فنکاروں کو آج کی طرح فوری ردِعمل نہیں ملتا تھا، جس کی وجہ سے ذہنی دباؤ بھی کم ہوتا تھا۔ اُس وقت تنقید اور گفتگو کا انداز مختلف تھا، جبکہ آج ہر شخص اپنی رائے فوراً اور کھل کر سوشل میڈیا پر ظاہر کرتا ہے۔‘‘

یہ بھی پڑھئے:اپریل میں اسرائیلی افواج کے ہاتھوں ۱۲۲؍ فلسطینی شہید: اقوامِ متحدہ کی رپورٹ

انہوں نے مزید کہاکہ ’’کورونا وبا کے بعد سوشل میڈیا کا استعمال کافی بڑھ گیا ہے۔ پچھلے چند برسوں میں لوگوں کے پاس زیادہ وقت تھا۔ اس کا نتیجہ یہ نکلا کہ اب ہر موضوع پر لوگوں کی رائے بہت تیزی سے سامنے آتی ہے اور فنکاروں کو مسلسل تنقید اور تبصروں کا سامنا کرنا پڑتا ہے۔‘‘ رکول پریت سنگھ نے کہا کہ ’’ایک اداکار کو اس شور سے خود کو دور رکھنا چاہیے۔ فنکار کا کام اداکاری کرنا اور اپنے کردار کو بہترین انداز میں نبھانا ہے، نہ کہ ہر آن لائن ٹرولنگ کا جواب دینا۔ اگر کوئی شخص سوشل میڈیا کی ہر بات کو سنجیدگی سے لینے لگے گا، تو اس کی توجہ بٹ جائے گی اور اس کا کام بھی متاثر ہو سکتا ہے۔‘‘

یہ بھی پڑھئے:مرنال سین نے بامعنی فلمیں بناکر سماجی شعور بیدار کیا

انہوں نے آخر میں کہاکہ ’’آج کے وقت میں ذہنی طور پر مضبوط رہنا فنکاروں کے لیے بہت ضروری ہے۔ میرے خیال میں ہر اداکار کو اپنے اردگرد ایک دیوار بنا لینی چاہیے تاکہ بیرونی منفی اثرات براہِ راست اس کے کام پر اثر انداز نہ ہوں۔ کبھی کبھار سوشل میڈیا سے دوری اختیار کرنا اور صرف اپنے کام پر توجہ دینا ہی صحیح طریقہ ہوتا ہے۔‘‘