شریعت کی روشنی میں اپنے سوالوں کے جواب پایئے۔ آج پڑھئے: (۱) کسی کمپنی کے نام میں جزوی تبدیلی کر کے اپنا مال سپلائی کرنا۔ (۲) چار رکعت والے نوافل میں قعدہ اولیٰ۔ (۳) عقیقہ کے تعلق سے ایک سوال۔

کسی کمپنی کے نام میں جزوی تبدیلی کرکے اپنا مال سپلائی کرنا 

کیا فرماتے ہیں علما اس مسئلہ کے تعلق سے کہ نور ہوزیئری نام سے ایک کمپنی ہے جو کئی طرح کا مال سپلائی کرتی ہے۔ اس کا مال کئی ملکوں میں سپلائی ہوتا ہے۔ اس کمپنی کا وہاں نام بہت ہے۔ میں بھی وہی سب چیزیں سپلائی کرتا ہوں جو مذکورہ کمپنی کرتی ہے مگر، میری اتنی کھپت نہیں ہوپاتی لہٰذا میں نے ارادہ کیا کہ میں النور ہوزیری نام کی کمپنی بنا کر اس نام سے اپنا مال سپلائی کروں گا۔ کیا اس طرح کی تبدیلی کرکے میرے لئے سپلائی کرنا درست ہوگا؟

دوسرا سوال یہ تھا کہ ’النور‘ اللہ کا صفاتی نام ہے۔ پیکنگ پر اس نام کی پرنٹ ہوگی۔ لوگ پیکنگ پھینک دیتے ہیں جس سے اس مبارک نام کی بے ادبی یا بے حرمتی ہوسکتی ہے تو کیا کمپنی کا ایسا کوئی صفاتی نام رکھنا درست ہوگا؟ عبداللہ ،ممبئی

باسمہ تعالیٰ۔ ھوالموفق:  کوئی  بھی کمپنی جو کسی خاص نام سے مال بناتی اور فروخت کرتی ہے، دوسرے کسی شخص کا اسی نام سے مال بنانا جعلسازی کے زمرے میں آتا ہے لہٰذا جو کمپنی نور ہوزیری کے نام سے مال بناتی اور بیچتی ہے یہ نام بھی اس کی ملکیت ہے اس لئے دوسرے تاجروں کا اس نام سے مال بنانا اور بیچنا صحیح نہیں ۔یہ عمل جہاں کمپنی کی حق تلفی ہے وہیں عام خریداروں کے ساتھ فریب اور دھوکہ دہی بھی ہے۔ حدیث شریف میں ہے کہ جس نے دھوکہ دیا وہ ہم میں سے نہیں۔ نام کے علاوہ کمپنیوں کا ٹریڈ مارک بھی ہوتاہے۔ یہ کمپنی کی شناخت اور اس کی ملکیت مانا جاتا ہے۔ کسی نے نور کی جگہ النور نام کی کمپنی بناکر ٹریڈ مارک اصل کمپنی ہی کا استعمال کیا تو یہ بھی جعلسازی ہوگی اور غالباً قانون کی خلاف ورزی بھی ۔ نور کی جگہ النور کی قانونی حیثیت کیا ہے اور کیا قانون اس کی اجازت دیتا ہے یہ تو کسی وکیل سے دریافت کریں تاہم قانونی اجازت ہو اور ٹریڈ مارک بھی اپنا مستقل بنا لیں جس میں کسی قسم کا اشتباہ نہ ہو تو اس کی اجازت ہوسکتی ہے، پھر بھی بہتر یہ ہے کہ اپنی الگ شناخت بناکر بہتر مال تیار کرکے فروخت کریں تو یہ عمل مستقبل میں زیادہ مفید ثابت ہو سکتا ہے۔

(۲)علماء نے لکھا ہے کہ النوربھی  اللہ کے صفاتی ناموں میں شامل ہے لیکن صفات مختصہ میں سے نہیں ہے۔ قرآن کریم اور احادیث مبارکہ میں دوسرے معانی میں بھی استعمال ہوا ہے جیسے نُورٌ وَکِتَابٌ مُّبِينٌ۔

روایات میں اعمال خیر کو نور اور اعمال شر کو ظلمات سے تعبیر کیا گیا ہے اس لئے گنجائش تو تھی لیکن ذہن میں یہ خلجان ہے اس لئے بہتر طریقہ یہ ہوگا کہ پیکنگ میں  اپنا مستقل ٹریڈ مارک استعمال کریں اور النور لکھنا ہو تو حروف کو الگ الگ لکھ کرکے  نیچے ہوزیری لکھ دیں ۔واللہ اعلم وعلمہ اتم

یہ بھی پڑھئے: فتاوے: لے پالک اور وصیت، وراثت کے دو سوال، اے سی کا پانی اور وضو، فجر کی قضا