وراثت کے دو سوال 

(۱)زید کے وارثوں میںایک حقیقی بہن ایک علاتی(باپ شریک)بہن اور دو اخیافی (ماں شریک)بھائی موجود ہیں ۔اس صورت میں ترکہ کی تقسیم کس طرح ہوگی ؟کیا حقیقی بہن پوری جائیداد کی مالک ہو گی ؟

(۲)ایک لاولد شخص کے وارث ایک حقیقی بھائی ،ایک علاتی بھائی ایک چچا دوسرے ایک چچا کے لڑکے لڑکیاں اور ماں کے پہلے شوہر سے ایک لڑکا ایک لڑکی (اخیافی بہن بھائی) ہے اس صورت میں ترکہ کسے اور کتنا ملے گا؟

عبداللہ ،ممبئی

باسمہ تعالیٰ۔ ھوالموفق:  (۱) ایک حقیقی بہن ایک علاتی بہن اور دو اخیافی بھائیوں کی موجودگی میں یہ سبھی  وارث ہیں۔ حقیقی بہن ایک ہے تو اسے کل ترکہ کا نصف ملےگااور  علاتی بہن کو سدس یعنی چھٹواں حصہ دیا جائے گا۔ ان دونوں کی موجودگی میں ماں شریک بھائی بھی حقدار ہوتے ہیں ان کا حصہ ایک تہائی ہوگا لہٰذا ترکہ کے چھ سہام (یعنی حصے) بناکر تین حقیقی بہن کو ایک علاتی بہن کو اورایک ایک دونوں اخیافی بھائیوں میں ہر ایک کو دینگے۔  واللہ اعلم 

(۲)حقیقی بھائی، علاتی بھائی،اخیافی بہن بھائی ، چچا اور چچا کی اولاد ان میں سے چچا اور چچا کی اولاد اس صورت حال میں شرعی وارث نہیں بنتے۔ حقیقی بھائی اور علاتی بھائی دونوں عصبہ ہیں اور اصول یہ ہے کہ جو قریبی عصبہ ہوتا ہے اصحاب فرایض کو دینے کے بعد جو بچتا ہےوہ اس کا حق ہوتا ہے۔ حقیقی اور علاتی میں حقیقی سب سے قریبی ہے بس اسی لئےعصبہ والا پورا حصہ اسے ملےگا لہٰذا علاتی محروم رہےگا مگر  ان تمام کی موجودگی میں اخیافی بھائی بہن محروم نہیں ہوتے وہ دو ہیں تو ایک  تہائی ان کوملے گا جو دونوں میں برابر برابر تقسیم ہوگا (کیونکہ اخیافی بھائی بہن برابر کے حقدار ہوتے ہیں)لہٰذا ترکہ کے چھ سہام میں ایک ایک اخیافی بہن اور بھائی کو اور باقی تنہا حقیقی بھائی کو ملے گا۔ واللہ اعلم وعلمہ اتم

یہ بھی پڑھئے: رہائش،خورد ونوش،لباس اور بیوی کی دیگر جائز واجبی ضروریات کا پورا کرنا شوہر کی شرعی ذمے داری ہے

اے سی کا پانی اور وضو 

ایک مسٔلہ  پوچھنا  ہے کہ ایئرکنڈیشن کا پانی وضو میں استعمال کر سکتے ہیں یا نہیں؟  فہیم الدین کرناٹکا

باسمہ تعالیٰ۔  ھوالموفق:  پانی ایک ایسا مایع (سیال) ہے جو خالص ہو تو بے رنگ وبو اور بے ذائقہ کے ہوتا ہے۔ زمین پر اس کا وجود حیات کی بقا کے لئے بے حد ضروری ہے۔  زمین جو نظام شمسی کا ایک سیارہ  ہے اس کا تقریباً ۷۱؍ فیصد حصہ پانی پر مشتمل ہے جو کنوؤں چشموں دریاؤں ندیوں سمندر اور پگھلنے والی برف اور بارش وغیرہ  سے حاصل ہوتا ہے۔ یہ صفر درجہ حرارت میں ٹھوس ( برف کی) شکل اختیار کرلیتا ہے اور جب حدت بڑھ جاتی ہے تو پگھل کر پانی کی شکل میں ڈھل جاتا ہے۔   اے سی سے  جو پانی گرتا ہے وہ فضا میں موجود نمی ہے جو کوایل سے ٹکرانے کے بعد پائپ کے راستے باہر گرتا رہتا ہے۔  یہ خالص پانی ہوتا ہے جس کا حکم طاہر اور مطہر کا ہے یعنی پاک بھی ہے اور دوسری اشیاء کو پاک بھی کرتا ہے لہٰذا اگر اے سی سے گرنے والا پانی کسی پاک جگہ یا برتن میں میں جمع ہو جائے تو اس سے وضو بھی جائز ہے اور غسل بھی نیز نجاست حقیقی کو بھی اس سے زائل کیا جاسکتا ہے البتہ کسی نجس مقام پر جمع ہو نے کی صورت میں یہ بھی نجس ہوگا اور اس سے  طہارت حاصل نہیں کی جاسکے گی۔ واللہ اعلم وعلمہ اتم

یہ بھی پڑھئے: ادارے کیلئے محنت کرنے والے کی اُجرت

فجر کی قضا

فجر کی نماز قضا ہوجائے تو کب تک اس کی قضا کی جاسکتی ہے؟ کیا اسی دن زوال سے پہلے پہلے یا غروب آفتاب کے پہلے تک ادا کرلینا ضروری ہے  یا بعد میں بھی ادا کرسکتے ہیں   ؟  اگر اس دن کسی وجہ سے ادا نہ کرسکے تو کیا بعد میں قضا کی ضرورت ہے  نیز یہ بھی بتائیں کہ فجر کی قضا کرتے وقت کیا سنت کی قضابھی ضروری ہوتی ہے؟ محمداحمد، ممبرا

باسمہ تعالیٰ۔  ھوالموفق:  ایک سفر میں حضور ؐاور حضرات صحابہ ؓ کی آنکھ فجر کے وقت نہ کھل سکی تھی توآپؐ نے سورج نکلنے کے بعد اس کی قضا پڑھی۔  ثابت ہوتاہے کہ اگر کسی وجہ سے نماز چھوٹ جائے تو اس کی قضا ضروری ہے  وہیں یہ بھی ظاہر ہے کہ بہتر صورت یہ ہے کہ اسی دن سورج نکلنے کے بعد قضا پڑھ لی جائے۔ آپؐ  نے سنت کی بھی قضا پڑھی تھی اسی لئے علماء نے لکھاہے کہ اگر اسی دن زوال سے پہلے پہلے قضا پڑھی جائے تو سنت بھی ادا کی جائے  البتہ بعد میں قضا پڑھنے پر سنت کی قضاکا حکم نہیں ہے مگر  فرض کی قضا بہرحال واجب ہے۔ اس دن نہ پڑھ سکے تو بعد میں قضا پڑھے۔  واللہ اعلم وعلمہ اتم