اپنے پیشے کو خدمت خلق کا ذریعہ بنالیا لینا ہر کسی کا مقدر نہیں ہوتا ۔ لیکن جو خوش قسمت ایسا کرتے ہیں انہیں روزی کے ساتھ عزت بھی حاصل ہوتی ہے۔

اپنے پیشے کو خدمت خلق کا ذریعہ بنالیا لینا ہر کسی کا مقدر نہیں ہوتا ۔ لیکن جو خوش قسمت ایسا کرتے ہیں انہیں روزی کے ساتھ عزت بھی حاصل ہوتی ہے۔ دھولیہ شہر کے حاجی مسعود انصاری (۷۳) عرف مسعود ایمبولنس اور ان کے فرزن د ابو ہریرہ انصاری (۳۴) بھی انہی لوگوں میں سے ہیں۔ شہر کے اقبال روڈ پر واقع بہشتی گلی میں رہنے والےمسعود انصاری گزشتہ ۴۰؍ سال سے ایمبولنس چلا رہے ہیں ۔ یوں تو یہ ان کا پیشہ ہے لیکن وہ روزی کماتے ہوئے وہ خدمت خلق کا کوئی موقع ہاتھ سے جانے نہیں دیتے۔ گزشتہ ۷؍ سال سے ان کے بیٹے ابو ہریرہ نے بھی ان کا ساتھ دینا شروع کر دیا ہے۔ 

مسعود انصاری اور ابوہریرہ اپنی ایمبولنس کیساتھ۔ تصویر: آئی این این

دونوں ہی باپ بیٹے ہزاروں مریضوں اور میتوں کو ان کی منزل تک پہنچا چکے ہیں۔ اپنے گھر کے حالات نامساعد ہوتے ہوئے بھی دونوں کو دوسروں کی دشواریوں کا احساس رہتا ہے۔ مسعود انصاری آج خود ۳؍ ایمبولینس کے مالک ہیں لیکن دونوں باپ بیٹےقلیل کرایے پر مریضوں کو گھر سے اسپتال یااسپتال سے گھر پہنچاتے ہیں ۔ میت کے معاملے میں ان کا جذبہ فی سبیل اللّہ ہوتا ہے۔ کسی نے کچھ دیا تو رکھ لیا نہیں دیا تو مانگنے سے گریز کیا۔ اپنی خدمات کے سبب مسعود بھائی ایمبولینس نہ صرف دھولیہ بلکہ خاندیش کے دیگر علاقوں کے علاوہ پڑوس کی ریاستوں میں بھی پہنچانے جاتے ہیں۔ ان کا موبائل ۲۴؍ گھنٹے آن رہتا ہے۔ مسعود انصاری نے انقلاب کو بتایا کہ وہ پہلے کسان ٹرسٹ کی ایمبولینس فی کلو میٹر ۳؍ روپے سے چلاتے تھے۔ مہاراشٹر کے علاوہ مدھیہ پردیش، اتر پردیش، پنجاب، ہریانہ، چھتیس گڑھ، راجستھان، جمو، کنیاکماری جیسی ریاستوں میں مریضوں اور میت کو پہنچانے کا کام کیا ہے۔ کرایےکے تعلق سے حاجی مسعود کہتے ہیں کہ مریض یا متوفی کے اہل خانہ کی حالت دیکھ کر جو بھی کرایہ وہ دیتے ہیں لے لیتا ہوں۔ میت کے اہل خانہ کا حال معلوم ہوتو فی سبیل اللّہ خدمت انجام دیتا ہوں 
لاوارث لاشوں کی تجہیز وتکفین کا کی قابل تحسین خدمات 
 ہیرے میڈیکل کالج میں لاوارث لاش کو کوئی لینے نہ آئے تو ، ضلع پولیس اور شہری انتظامیہ اسے دفنانے یا جلانے کا خود انتظام کرتا ہے لیکن اس کیلئےبہت کم محنتانہ دیتا ہے۔ مسعود انصاری نے بتایا کہ انتظامیہ لاوارث لاش کو پہلے ٹھیلہ گاڑی پر ندی کنارے دفنانے کیلئے بھیج دیا کرتا تھا۔ اس میں لاش کی بے حرمتی ہوتی تھی۔ ایسی صورت میں ہم نے چند سماجی کارکنان کے ساتھ حکام سے ملاقات کی اپنے ذاتی خرچ سے میت کی تجہیز وتکفین کا ذمہ لیا۔ شہری انتظامیہ نے اجازت دیدی۔ تب ہم نے کفن، برگے اور تدفین کے دیگر سامان کا انتظام اپنی جیب سے کرنا شروع کیا۔ 
  یہ پوچھنےپر کہ کیا میت کو لے جاتے وقت ان کے ساتھ کوئی حادثہ پیش آیا: انھوں نے بتایا کہ ۴۰؍ سال کے عرصے میرے ساتھ کوئی ناخوشگوار حادثہ پیش نہیں آیا۔ لوگ اکثر افواہ پھیلاتے ہیں کہ ایمولینس میں لاش لے جاتے وقت بریکر کودنے سے لاش بیٹھ جاتی یا کھڑی ہوجاتی ہے یہ محض افواہ ہے ایسا کچھ بھی نہیں ہوتا۔ ۲۰۰۸ءکے فرقہ وارانہ فساد کا تذکرہ کرتے ہوئے مسعود انصاری نے بتایا کہ مولوی گنج کے ایک مریض کو سول اسپتال لے جاتے وقت چند شرپسندوں نے میرے ایمبولینس پر حملہ کر دیا تھا جس میں مجھے زخم آئے تھے۔ ۱۵؍ دنوں تک اسپتال میں رہنا پڑا تھا۔ 
کورونا میں اللّہ نے باپ، بیٹے سے خدمت لی
  حاجی مسعود انصاری اور ان کے فرزند ابو ہریرہ نے بتایا کہ کورونا کے دوران ہم روزانہ ۵؍ تا ۷؍ مریضوں کو اسپتال لے جاتے تھے۔ ساتھ ہی سیکڑوں میتوں کی تدفین بھی کروائی۔ مسلم میت ہوتی تو لاش کو ورجئی روڈ پر نیا مسلم قبرستان میں تدفین کیلئے لے جاتے اور ہندو میت کو ہیرے میڈیکل کے عقب میں آخری رسومات کیلئے لے جایا جاتا۔ دھولیہ میں کورونا کے سبب سے پہلے فوت ہونے والے مسلم شخص کی میت کو ساکری تعلقہ تک میں نے ہی پہنچایا تھا۔ 
 الیکشن میں مریضوں، معذوروں کی مفت خدمت 
  پارلیمانی اور اسمبلی الیکشن میں پولنگ کا فیصد بڑھانے کیلئے ضلع الیکشن کمیشن کے مشن کو صد فیصد کامیاب بنانے میں بھی مسعود انصاری کے فرزند ابوہریرہ نے اہم کردار ادا کیا۔ انہوں نے سیکڑوں مریضوں اور معذوروں کو ایمبولینس میں مفت گھر سے پولنگ بوتھ اور وہاں سے دوبارہ گھر پہنچانے کی خدمت انجام دی
حاجی مسعود کی خدمات کا اعتراف
مسعود انصاری کی زندگی بے لوث خدمت میں گزری تو سماج نے بھی انہیں نظر انداز نہیں کیا۔ انہیں متعدد اعزاز و اکرام سے نوازا جا چکا ہے۔ وہ بتاتے ہیں کہ سب سے پہلے دھولیہ میونسپل کمشنر آنجہانی دلیپ پائیگوڑے نے سند دے کر ان کی بلاتفریق خدمت کا اعتراف کیا تھا۔ اس کے بعد دھولیہ کے سابق مئیر چندرکانت سونار، کمشنر عزیز خان پٹھان نے سند اور ٹرافی دے کر ان کی حوصلہ افزائی کی۔ سابق رکن پارلیمان ڈاکٹر سبھاش بھامرے نے بھی مسعود بھائی ایمبولینس کو سند اور ٹرافی دے کر اعزاز سے نواز ہے۔ سابق ضلع کلکٹر سنجے جادھو نے بھی اسی طرح انہیں سند اور ٹرافی دی ہے۔ سب سے بڑا اعزاز انہیں کورونا کے دور میں ناقابل فراموش خدمات انجام دینے کی بنا پر مہاراشٹر کے اس وقت کے گورنر بھگت سنگھ کوشیاری کے ہاتھوں دیا گیا۔ ’کورونا یودھا‘ کے نام سے دیئے گئے اس ایوارڈ ی میں بھی انہیں سند اور ٹرافی دی گئی۔ ۷۳؍ سال کی عمر میں بھی مسعود انصاری ایمبولینس کے ذریعے خدمت خلق میں مصروف ہیں۔ ان کے بیٹے ابو ہریرہ نے خدمت کے اس سلسلہ کو مزید دراز کیا ہے۔ وہ اپنے والد کے نقش قدم پر چلتے ہوئے بلا تفریق مریضوں اور میتوں کو ان کی منزلوں تک پہنچانے کی خدمت انجام دے رہے ہیں۔ ٹھیک اسی جذبے کے ساتھ اور اسی لگن کے ساتھ