دنیا بھر میں ان دنوںانقلاب اور احتجاج کا موسم چل رہا ہے۔اس کی وجہ ہر جگہ ایک ہی ہے، لوگ اپنے سیاست دانوں کی ناکامیوں اور ان کے جھوٹے وعدوں سے تنگ آ چکے ہیں۔ تو کیا اپنے ملک میں بھی کچھ ایسا ہی ہو رہا ہے یا کچھ الگ؟ میرا خیال ہے کہ ہمارے عظیم ملک ہندوستان میں کچھ الگ ہو رہا ہے۔

دنیا بھر میں ان دنوںانقلاب اور احتجاج کا موسم چل رہا ہے۔اس کی وجہ ہر جگہ ایک ہی ہے، لوگ اپنے سیاست دانوں کی ناکامیوں اور ان کے جھوٹے وعدوں سے تنگ آ چکے ہیں۔ تو کیا اپنے ملک میں بھی کچھ ایسا ہی ہو رہا ہے یا کچھ الگ؟ میرا خیال ہے کہ ہمارے عظیم ملک ہندوستان میں کچھ الگ ہو رہا ہے۔ ایسا نہیں ہے کہ ہمارے نوجوان تبدیلی کا مطالبہ نہیں کر رہے ہیں۔ مگر پچھلے ہفتے، جب بی جے پی کے کارکنوں نے سڑکوں پر اُتر کر جمہوریت کو بحال رکھنے اور انتشار کو ختم کرنے کا مطالبہ کیا تو معاملہ کچھ بدلا بدلا سا لگا۔اب ایسا لگنے لگا ہے جیسے بی جے پی اور کانگریس کے درمیان ایک مقابلہ شروع ہو گیا ہے جس کا مقصد ایک ہی ہے اور وہ ہے ایک دوسرے کو نیچا دکھانا۔ 

یہ بھی پڑھئے: ہمارے معاشرے کے تین کردار

ایسا بھی لگنے لگا ہے کہ بی جے پی والے اس مقابلے میں اسلئے حصہ لینے لگے ہیں کہ انہیں شک ہے کہ بے جان اپوزیشن میں ایک نئی توانائی پیدا ہو گئی ہے۔ جب سے راہل گاندھی نے سپریم کورٹ تک طاقت کا مظاہرہ کیا اور اس کی حمایت میں ہزاروں لوگ دہلی کی سڑکوں پر اتر آئے تھے۔ تو کیا انڈیا اتحاد کے لیڈروں کو عام لوگ پہلے سے زیادہ پسند کرنے لگے ہیں؟ہو سکتا ہے کہ رام لیلا میدان میں جلسہ کرنے کا فیصلہ کانگریس نے پہلے سے کیا ہو، لیکن لگتا ہے کہ امید سے زیادہ حمایت دیکھنے کے بعد ہی راہل گاندھی نے ایک بہت بڑا جلسہ کرنے کا فیصلہ کیا تاکہ بوکھلائی ہوئی مودی حکومت تھوڑی اور بوکھلاجائے۔ یہ جلسہ یکم نومبر کو ہوا۔ اسے روکنے کیلئے بی جے پی کے قومی صدر کی قیادت میں حکمراں جماعت کے کارکن ہاتھوں میں ترنگا لہراتے ہوئے دہلی کی سڑکوں پر نکل آئے۔ یہ سمجھنا مشکل ہے کہ جب حکومت اپنی ہے، تو احتجاجی مظاہرہ کرنے کا کیا مطلب ہے؟ جمہوریت کو بچانے کا اپوزیشن پارٹیوں کا نعرہ بی جے پی والوں نے کیوں اٹھایا اور اسے انتشار کے خاتمے کے نعرے کے ساتھ کیوں جوڑ دیا؟ کیا یہ صرف طاقت کا مظاہرہ تھا تاکہ کانگریس کو یاد دلایا جا سکے کہ جتنی بھی بھیڑ اکٹھی کر لو، بی جے پی کا مقابلہ نہیں کر سکتے؟ بیشتر لوگوں کا خیال ہے کہ یہ بی جے پی کی بوکھلاہٹ کا نتیجہ ہے۔

اسی دوران قانون ساز کونسلوں کے انتخابی نتائج بھی آئے، جن سے یہ واضح ہو گیا کہ کانگریس انتخابی معاملوں میں اب بھی اتنی کمزور ہے کہ وہ اتر پردیش اور بہار میں ایک بھی سیٹ حاصل نہیں کر پائی اور نہ ہی کرناٹک میں جہاں کانگریس کی اپنی حکومت ہے۔ نتائج کے آتے ہی بی جے پی کے ترجمانوں نے ٹی وی پر سینہ تان کر یہ کہنا شروع کر دیا کہ چاہے انتخابات ای وی ایم سے ہوں یا بیلٹ پیپر سے، کانگریس ہارتی ہی رہے گی۔ ابھی ان کے دعوؤں کی بازگشت سنائی دے رہی تھی کہ خبر آئی کہ وزیراعظم کے انتخابی حلقے بنارس میں بی جے پی دونوں سیٹیں ہار گئی اور آر ایس ایس کے گڑھ ناگپور میں کانگریس جیت گئی۔ نتائج آ ہی رہے تھے کہ راہل گاندھی سوشل میڈیا پر یہ کہتے ہوئے دکھائی دئیے کہ عوام کورام لیلا میدان ضرور آنا چاہیے تاکہ یہ دکھایا جا سکے کہ سارا ملک مودی حکومت سے تنگ آ چکا ہے۔

یہ بھی پڑھئے: ترقی کے نام نہاد گجرات ماڈل میں اسکولی تعلیم کی بدتر صورتحال

کچھ حد تک ان کی بات صحیح ہے۔ وزیر اعظم نریندر مودی کی تیسری مدتِ کار کا یہ تیسرا سال ہے، جو اکثر سیاست دانوں کیلئے برا گزرتا ہے۔ اندرا گاندھی کے ساتھ بھی ایسا ہی ہوا تھا اور اس وقت اندرا گاندھی کے خلاف احتجاج اتنا پھیل گیا تھا کہ انہیں عام انتخابات کو ٹالنے کیلئے ایمرجنسی نافذ کرنی پڑی تھی۔ مگر ایسا کرنے سے انہوں نے کانگریس کی شبیہ اتنی خراب کر دی کہ جب انتخابات ہوئے تو نہ وہ اپنی رائے بریلی کی سیٹ بچا سکیں اور نہ ان کے بیٹے سنجے گاندھی اپنی امیٹھی کی سیٹ بچا سکے۔ جنتا پارٹی کی حکومت صرف ۲؍ سال تک ٹک سکی تھی، لیکن کم از کم یہ طے ہو گیا کہ کانگریس کے بغیر بھی مرکز میں حکومت بن سکتی ہے۔