میڈیا دراصل فروغِ ابلاغ اور ترسیل اطلاع کا مؤثر ذریعہ ہے جس میں نت نئی تکنالوجی اور جدت آنے سے دنیا کی طنابیں کھنچ گئی ہیں اور عالمی بستی کا تصور عمل کے قالب میں ڈھل چکا ہے۔ اس لئے بالخصوص مسلمانوں کو نہایت ذمّہ دارانہ، مثبت اور قرآن و سنت کی ہدایات کے عین مطابق ذرائع ابلاغ کا استعمال کرنا چاہئے تاکہ دشمن کے شرانگیز پروپیگنڈے کو ’’خیر‘‘سے بدلا جا سکے۔

پروپیگنڈا دراصل نفسیاتی جنگ کا ہتھیار ہے۔ دشمن کا مقصد یہ ہوتا ہے کہ پروپیگنڈے کے ذریعہ خوف اور ہیجان کی کیفیت پیدا کر کے فرد یا اجتماع کے رویّے میں حسب خواہش تبدیلی لائے۔ ذہنی تنائو کی اس کیفیت کو انگریزی میں نفسیاتی جنگ (psychological warfare) اور جدید عربی اصطلاح میں ’’الحرب النفسیۃ‘‘ کہا جاتا ہے۔ (اسلام اور ذرائع ابلاغ، استاد فہمی قطب الدین النجار، ترجمہ: ڈاکٹر ساجد الرحمٰن صدیقی، ص ۴۴) اس جنگ میں توپ و تفنگ استعمال نہیں ہوتے بلکہ یہ جنگ ذرائع ابلاغ کے ذریعے لڑی جاتی ہے۔ دنیا میں پروپیگنڈے پر خوب رقم خرچ کی جاتی ہے اور اس سے وہ نتائج حاصل کیے جاتے ہیں جو عملی جنگ سے حاصل نہیں ہوتے۔ 
اگرچہ پروپیگنڈے کی اصطلاح ۱۶۲۲ء میں پہلی دفعہ ایک عیسائی مشن کے لئے استعمال ہوئی جو روم سے باہر تبلیغی مقاصد کے لئے گیا تھا اور وہاں کی حکومت ان عیسائیوں کے مخالفانہ خیالات کی تشہیر سے خائف تھی تاہم مذہبی حوالے سے بھی پروپیگنڈے کا وجود نہایت قدیم اور ازلی ہے۔ شیطان نے پروپیگنڈے کے ہتھیار سے حضرت آدم ؑ اور ان کی بیوی حوا کو اُس شجر ممنوعہ سے پھل کھانے پر آمادہ کیا جس سے اللہ تعالیٰ نے انہیں منع فرمایا تھا۔ 
انبیاء علیہم السلام کے خلاف، جو اللہ کی طرف سے خبر پہنچانے اور رسالت پر مامور تھے، پروپیگنڈے کا حربہ بنی اسرائیل نے اپنایا۔ کفار و فجار کی طرف سے پیغام ربانی کو بے اثر کرنے کے لئے نفسیاتی حربوں کے آثار تاریخ میں ملتے ہیں اور قرآن جگہ جگہ اقوامِ سابقہ کی اِن افترا پردازیوں کی وضاحت کرتا ہے۔ خود جزیرہ عرب کے اندر مشرکین، یہود اور منافقین نے خاتم الانبیا صلی اللہ علیہ وسلم کے خلاف زبردست نفسیاتی جنگ برپا کر رکھی تھی۔ منفی پروپیگنڈے، آیات الٰہی کی تکذیب اور دھمکیوں کا ایک طوفان تھا۔ حضورؐ اور آپؐ کے صحابہؓ کو خوفزدہ کرنے اور لالچ دینے کیلئے مختلف اسلوب اختیار کیے گئے۔ 
شعب ابی طالب میں حضورؐ اور ان کے خاندان کو محصور کرنا اور معاشرتی اور معاشی بائیکاٹ کی حالت میں تین سال تک زندگی گزارنے پر مجبور کرنا، اسی نفسیاتی جنگ کا ایک گھنائونا حربہ تھا۔ 
قرآن کے موثر پیغام کو نہ سننا اور ڈھولکیوں، باجوں اور مزامیر کی تفریح گاہیں منعقد کر کے قرآن کے پیغام کو مشتبہ اور غیر اہم بنانا منکرین حق کے پروپیگنڈے کا حصہ تھا جس کی طرف قرآن نے یوں اشارہ فرمایا:
’’یہ منکرین حق کہتے ہیں کہ اس قرآن کو ہرگز نہ سنو اور جب یہ سنایا جائے تو اس میں خلل ڈالو، شاید کہ اسی طرح تم غالب آجائو۔ ‘‘ (حٰم السجدۃ: ۲۶ )
تجارتی میلے اور جشن منانا بظاہر تفریح اور اشتہار بازی تھی مگر اس کی تہہ میں اللہ کے رسولؐ کو تنہا کرنے کی سازش تھی۔ یہ پروپیگنڈے بعض اوقات نتیجہ خیز ہوتے تھے:
’’اور جب انہوں نے تجارت اور کھیل تماشا ہوتے دیکھا تو اس کی طرف لپک گئے اور آپ کو تنہا چھوڑ دیا۔ ان سے کہو، جو کچھ اللہ کے پاس ہے وہ کھیل تماشے اور تجارت سے بہتر ہے۔ اور اللہ سب سے بہتر رزق دینے والا ہے۔ ‘‘(الجمعہ :۱۱)
شعروشاعری اور سخن گوئی عربوں کا اہم ابلاغی ذریعہ تھا۔ عرب بڑے فصیح اللسان تھے۔ پیغام رسالتؐ کے خلاف پروپیگنڈے کیلئے اس میڈیا کو بھی بھرپور استعمال کیا گیا۔ کعب بن اشرف ایک متمول یہودی اور مشہور شاعر تھا۔ وہ حضورؐکی شان میں توہین آمیز ہجو کہتا تھااور مخالفین کو اُکساتا تھا۔ جنگ بدر میں قریش کی شکست کے بعد اُس نے مکہ جا کر مسلمانوں کے خلاف خوب شعر و شاعری کی اور کشتگانِ بدر کے مرثیے لکھے جن میں انتقام لینے کی تحریص و ترغیب تھی۔ جب واپس مدینہ آیا تو شاعری کے ذریعے لوگوں کو آنحضرت ؐ کے خلاف برانگیختہ کرنا شروع کر دیا۔ 
(سیرۃ النبیؐ، علامہ شبلی نعمانی، ج ۱)
علامہ شبلی ؒ فرماتے ہیں : ’’عربوں میں شاعری کا وہ اثر تھا جو آج یورپ میں بڑے بڑے دانش وروں کی تقریروں اور نامور اخبارات کی تحریروں کا ہوتا ہے۔ ‘‘ (ایضاً) جب نظام ابلاغ اسلامی نے باطل کے پروپیگنڈے کا توڑ کرنے کا فیصلہ کیا تو راے عامہ سے اسلام کے خلاف منفی اثرات کو ختم کرنے اور مثبت اثرات مرتب کرنے میں حضرت حسان ؓبن ثابت، حضرت عبداللہ ؓبن رواحہ، کعبؓ بن مالک، حضرت ثابت ؓبن قیس نے وہ اہم کردار ادا کیا جو آج کل کے مسلم صحافیوں کیلئے نمونہ ثابت ہو سکتا ہے۔ 
کفار اور مشرکین نے اپنے آبا و اجداد کے دین پر تعصب اور ناحق طرف داری کے سبب نہ صرف آسمانی صداقت اور بے لاگ حقیقت کو ٹھکرا دیا بلکہ اس کو اپنے جھوٹے پروپیگنڈے کی بھینٹ چڑھانے کی اَن تھک کوشش کی۔ حق و باطل کے ابلاغ میں اُس دَور کے ماہرین ابلاغ کی مسابقت کی کوششیں برابر جاری رہیں مگرغلبہ بالآخر حق اور صداقت کا ہوا۔ اس کا ذکر کرتے ہوئے ابن خلدون اپنے ’’مقدمہ‘‘میں لکھتے ہیں :
’’دورِ اسلامی کے شعرائے عرب کا کلام بلاغت و فصاحت میں شعرائے جاہلیت کے کلام سے کیوں بلند اور ارفع ہے؟ نظم کی طرح نثر میں بھی یہی حال ہے۔ اسی لئے حسان بن ثابتؓ، عمر بن ابی ربیعہ، حطیہ، جریر، فرزدق، نصیب، عیلان، ذی الرمّہ، احوص اور بشار کے اشعار، خطبات اور عبارات و محاورات (یعنی صحافت اور ادب) کا پلّہ نابغہ، عنترہ، ابن کلثوم، زہیر، علقمہ بن عبدہ، طرفہ بن العبد کے کلام سے بہت اونچا ہے۔ صاحب نظر شخص کا ذوقِ سلیم خود اس فرق کو محسوس کر لیتا ہے۔ اس حقیقت کی وجہ یہ ہے کہ دورِ اسلامی کے ماہرین ابلاغ کو خوش قسمتی سے قرآن و حدیث کے معجزانہ کلام کو سننے اور اس کا اسلوب سمجھنے کا اتفاق ہوا اور اُن کی طبائع میں یہ اسلوب رچ بس گیا۔ اس لئے وہ آسمانِ بلاغت کے ستارے بن کر چمکے۔ ‘‘ (مقدمہ ابن خلدون، ترجمہ: مولانا سعد حسن خان)
آنحضور صلی اللہ علیہ وسلم کی ذات کے خلاف یہودیوں کے پروپیگنڈے کے سبب قریش کا جوشِ انتقام اس حد تک بھڑک اُٹھا کہ قریش نے بنونظیر کو پیغام بھیجا کہ ’’محمد(صلی اللہ علیہ وسلم) کو قتل کر دو ورنہ ہم خود آکر تمہارا استیصال کر دیں گے۔ ‘‘ (سیرت النبیؐ از مولانا شبلی نعمانی، ج ۱، ص ۴۰۹)
ابن جریر طبریؒ فرماتے ہیں : کعب بن اشرف یہودی کفارِ قریش کے مشرکوں کے پاس گیا اور ان کو نبیؐ کے خلاف ہمت دلائی اور اُن کو آمادہ کیا کہ وہ آپؐ کے خلاف جنگ کریں۔ (تفسیر ابن جریر الطبری، ج۵، ص ۷۹)
جہاں تک کعب کے پروپیگنڈے کا تعلق تھا تو صحابہؓ اور شاعرہ صحابیاتؓ نے اشعار ہی میں ان کے جوابات دیئے۔ مگر اس یہودی نے عین اس وقت جب جنگ بدر کی آگ ابھی ٹھنڈی نہیں ہوئی تھی دوبارہ جنگ کی آگ بھڑکانے کی علانیہ سازشیں شروع کر دیں اور مکہ جا کر قریش کو آمادئہ جنگ کیا۔ اس پر حضورؐ نے اذنِ الٰہی سے مداخلت کی اور کعب بن اشرف اپنے انجام کو پہنچا۔ (تاریخ ابن ہشام، ج ۲، ص ۵۲-۶۰)
اس واقعہ کے بعد یہودی قبائل سخت مرعوب ہو گئے۔ پروپیگنڈے اور افواہوں کے پھیلانے میں یہودیوں اور قریش مکہ کے ساتھ مدینہ کے منافقین بھی پیش پیش تھے۔ بنونظیر کو جب حضورؐ نے مدینہ سے جلاوطن کیا تو دوسرے یہودی قبیلہ بنوقریظہ نے بنونظیر کا ساتھ نہیں دیا۔ اس کی وجہ یہ تھی کہ بنونظیر اپنے آپ کو اونچی ذات کے یہودی تصور کرتے تھے اور اپنے مقتولوں کا پورا خون بہا لیتے تھے، جب کہ بنوقریظہ کے مقتول کی دیت آدھی ہوتی تھی۔ آنحضورؐ نے بنوقریظہ پر یہ احسان کیا کہ دیت اور دوسرے معاملات میں ان کو بنونظیر کے برابر قرار دیا۔ مدینہ کے منافقین نے بنونظیر کی جلاوطنی کے وقت اُن کو پیغام بھیجا کہ عبداللہ بن ابی دو ہزار آدمیوں کے ساتھ اُن کی امداد کرے گا۔ قرآن نے یہود اور منافقین کے اس گٹھ جوڑ کی طرف اِن الفاظ میں اشارہ کیا:
’’کیا آپ نے منافقوں کو نہیں دیکھا جو اپنے اُن بھائیوں سے کہتے ہیں جو اہلِ کتاب میں سے کافر ہوگئے ہیں کہ اگر تم (یہاں سے) نکالے گئے توہم بھی ضرور تمہارے ساتھ ہی نکل چلیں گے اور ہم تمہارے معاملے میں کبھی بھی کسی ایک کی بھی اطاعت نہیں کریں گے اور اگر تم سے جنگ کی گئی تو ہم ضرور بالضرور تمہاری مدد کریں گے، اور اللہ گواہی دیتا ہے کہ وہ یقیناً جھوٹے ہیں۔ ‘‘(الحشر:۱۱)
اہل ایمان کے خلاف درپردہ سازشوں کا سلسلہ عرصے سے جاری تھا۔ منافقین مسلمانوں کے درمیان غلط فہمیاں پیدا کرنے اور پروپیگنڈا کے ذریعے بدگمانیاں پھیلانے کا کوئی موقع ضائع نہیں کرتے تھے حالانکہ بنونظیر کا حضورؐ نے جب محاصرہ کیا تو یہودیوں نے منافقین کی مدد کا انتظار کیا مگر عبداللہ ابن ابی اپنے گھر میں دبک کر بیٹھ گیا۔ سلام بن مشکم اور کنانہ نے حّی بن اخطب سے پوچھا، بتائو بھائی! کہاں ہے ابن ابی اور کہاں ہیں اس کی فوجیں اور اس کے حلیف؟ حّی نے بے بسی کا اظہار کرتے ہوئے کہا: ’’ہماری تقدیر میں یہ جنگ اور بربادی لکھی تھی، اس سے اب کوئی مفر نہیں۔ ‘‘ (ضیاء النبیؐ، پیر محمد کرم شاہ الازہری، ج ۳)۔ 
بنونظیر کی جلاوطنی کا واقعہ غزوئہ احد کے بعد وقوع پذیر ہوا، جب کہ غزوئہ بدر اور غزوئہ احد کے درمیان ۳۸۰ دن کا فصل ہے۔ جنگ بدر ۱۷؍ رمضان۲ھ بمطابق ۱۵مارچ ۶۲۴ء کو لڑی گئی تھی اور اُحد کے میدان میں حق و باطل کا معرکہ ۱۵ شوال ۳ھ بمطابق ۳۱ ؍ مارچ ۶۲۵ء کو پیش آیا تھا۔ (الامینؐ ، محمد رفیق ڈوگر، ج ۲، ص ۳۸۳)۔ غزوئہ احد کے دوران یہ افواہ پھیلائی گئی تھی کہ رسولؐ اللہ قتل کر دیئے گئے۔ حضرت انس ؓ بن نضر نے اس مخالفانہ پروپیگنڈے کے جواب میں یہ موقف اختیار کیا: پھر زندگی کا فائدہ کیا؟ اور بے جگری سے لڑ کر شہید ہوئے۔ 

یہ بھی پڑھئے: ایسا نہ ہو کہ ہم دُنیا کی فکرمیں آخرت کو بھول جائیں!

اصطلاحات اور طنزیہ الفاظ: پروپیگنڈے اور نفسیاتی جنگ کے دوران منافقین مختلف طنزیہ الفاظ اور اصطلاحات کا سہارا لیتے تھے۔ ان میں سے ایک اصطلاح انصار کے لئے ’’عزت دار، ، (اعز) اور مہاجرین کے لئے ’’ذلیل‘‘ یعنی (اذل) تھی۔ یہ دو اصطلاحات خاص طور پر وضع کی گئی تھیں۔ 
شعبان ۶ھ میں حضورؐ کو بنی المصطلق کی جنگ کیلئے تیاریوں کی اطلاع ملی۔ ایسی اطلاعات کی بروقت وصولی کے لئے حضورؐ خصوصی اہتمام فرمایا کرتے تھے۔ خبر ملتے ہی حضورؐ ایک لشکر لے کر اُن کی طرف روانہ ہوئے تاکہ فتنے کو سر اُٹھانے سے پہلے ہی کچل دیا جائے۔ ابن سعد کے بیان کے مطابق مریسیع کے مقام پر آپؐ نے اچانک دشمن کو جا لیا اور تھوڑے سے مقابلے کے بعد پورے قبیلے کو مال و اسباب سمیت گرفتار کر لیا۔ ابھی لشکر اسلام مریسیع کے مقام پر ہی پڑائو ڈالے ہوئے تھا کہ ایک روز حضرت عمرؓ کے ایک ملازم جہجاہ بن مسعود غفاری اور قبیلۂ خزرج کے ایک حلیف سنان بن وبرجہنی کے درمیان پانی پر جھگڑا ہو گیا۔ ایک نے انصار کو پکارا تو دوسرے نے مہاجرین کو آواز دی۔ دو گروپوں کے درمیان لڑائی ہوتے ہوتے رہ گئی اور معاملہ رفع دفع ہو گیا۔ رئیس المنافقین عبداللہ بن ابی خزرجی نے اس موقع کو غنیمت جانتے ہوئے بات کا بتنگڑ بنایا اور انصار کو یہ کہہ کر بھڑکانا شروع کر دیا:’’یہ مہاجرین ہم پر ٹوٹ پڑے ہیں اور ہمارے حریف بن بیٹھے ہیں۔ یہ سب کچھ تمہارا اپنا کیا دھرا ہے۔ تم ہی لوگوں نے ان کو اپنے ہاں لابسایا اور مال و جائیداد میں حصے دار بنایا۔ آج اگر تم ان سے ہاتھ کھینچ لو تو یہ چلتے پھرتے نظرآئیں۔ پھر اُس نے قسم کھا کر کہا: ’’مدینے واپس پہنچنے کے بعد جو ہم میں سے عزت والا ہے وہ ذلیل لوگوں کو نکال باہر کرے گا۔ ‘‘
قرآن نے اُس کی اس گفتگو کی شہادت دی:
’’یہ کہتے ہیں کہ ہم مدینہ واپس پہنچ جائیں تو جو عزت والا ہے وہ ذلیل کو وہاں سے نکال باہر کرے گا۔ ‘‘(المنافقون:۸)
اللہ تعالیٰ نے اسی آیت میں اس پروپیگنڈہ کا جواب دیا، فرمایا: ’’حالاں کہ عزت تو اللہ اور اس کے رسولؐ اور مومنین کیلئے ہے، مگر یہ منافق جانتے نہیں ہیں۔ ‘‘(المنافقون:۸)
یہ بھی فرمایا گیا: ’’یہ وہی لوگ ہیں جو کہتے ہیں کہ رسولؐ کے ساتھیوں پر خرچ کرنا بند کر دو تاکہ یہ منتشر ہو جائیں۔ ‘‘(المنافقون:۷)
نفسیاتی دباؤ: اس پروپیگنڈے کے پس منظر میں مسلمان مہاجرین کا معاشی مقاطعہ اور اُن کو دیوالیہ کرنا مقصود تھا۔ یہی وجہ تھی کہ بڑائی اور کمتری، عزت اور ذلت کے جس تصور کا ابلاغ منافقین کر رہے تھے اور انصار کی معاشی بالادستی اور مہاجرین کی مالی احتیاج کا جس انداز سے اپنے پروپیگنڈے کے ذریعے استحصال کرنا چاہتے تھے، اس کے پس پردہ محرکات نہایت شر انگیز تھے۔ اُن کے نزدیک اللہ اور اس کے رسول ؐپر ایمان کی کوئی اہمیت نہیں تھی کہ جس کیلئے معاشی مفادات کو دائو پر لگا دیا جائے۔ ان کا مطمح نظر دنیوی آسائش اور بہتر ’’معیار زندگی‘‘ تھا۔ وہ ’’ترقی یافتہ‘‘ کو عزت دار اور معزز اور غربت کے مارے ہوئے غریب یا ’’ترقی پزیر‘‘ افراد کو ذلیل اور کم تر تصور کرتے تھے۔ مسلمانوں کی چپقلش سے فائدہ اٹھا کر منافقین اپنے پروپیگنڈے کے ذریعے اہل ایمان کو بہت بڑے فتنے سے دوچار کرنا چاہتے تھے اور مہاجرین کو ذلیل اور کمتر کے القاب سے نواز کر معاشی پسماندگی کے سبب احساسِ کمتری میں اُن کو مبتلا کرنا مقصود تھا۔ 
مگر اللہ نے اصل حقیقت کا پردہ اس آیت سے چاک کر کے رکھ دیا اور اُن کے اپنے الفاظ دہرا کر منافقین کے اس راز کو فاش کر دیا جس کو وہ چھپانا چاہتے تھے۔ 
ذاتیات پر حملہ: تہمت، پروپیگنڈے اور افواہ سازی کی بدترین کارروائی جو آنحضرتؐ کے خلاف کی گئی وہ افسانۂ افک تھا جو غزوہ بنی المصطلق کے سفر کے دوران پیش آیا۔ منافقوں کے سرغنہ عبداللہ بن اُبی کو پروپیگنڈے کا یہ موقع ہاتھ آیا اور اس نے حضرت عائشہؓ اور حضرت صفوانؓ پرتہمت لگائی، اور حسد اور نفاق کی چنگاری سے افواہوں کی آگ خوب بھڑکائی۔ جب حضورؐ مدینہ آئے تو تہمت تراشوں نے خوب جم کر پروپیگنڈا کیا۔ جھوٹ اور افواہ کس تیزی سے پھیلتی ہے، اس کا اندازہ واقعہ افک سے لگایا جا سکتا ہے۔ اس افواہ اور تہمت کی بازگشت سے مسلم معاشرے میں ہلچل مچ گئی اور کئی مخلص مسلمان بھی جھوٹ اور پروپیگنڈا کے اس زور سے متاثر ہوئے بغیر نہ رہ سکے۔ اس جھوٹ کا مصنف عبداللہ بن ابی اور اس کے ساتھ زید بن رفاعہ تھا جو یہودی منافق کا بیٹا تھا، مگر اس سے متاثر ہونے والے کئی مخلص مسلمان بھی تھے۔ اس بے بنیاد خبر سے عام مسلمانوں اور خود آنحضورؐ کو سخت ذہنی کوفت ہوئی۔ آپؐ خاموش تھے اور وحی کے منتظر تھے مگر دیر تک وحی نہ آئی۔ 
ایک ماہ تک اس خبر کی بازگشت اور اس پر ردّعمل کا اظہار ہوتا رہا، کیونکہ رسولؐ اللہ کی شخصیت اتنی عظیم تھی کہ آپؐ کا فرمان ’’اہم ترین خبر‘‘ (Breaking News) کی حیثیت رکھتا تھا۔ اس لئے آپؐکے خلاف خبر کی اشاعت بھی غیر معمولی اہمیت کی حامل تھی۔ 
یہ افترا پردازی اورا سیکنڈل کی خبر اپنی عین فطرت کے مطابق ایک زبان سے دوسری زبان پر چڑھتی اور پھیلتی جا رہی تھی، بالآخر اللہ تعالیٰ نے خود ہی حقیقت حال کھول کر رکھ دی۔ علامہ قرطبیؒ لکھتے ہیں : ’’محققین کی رائے کے مطابق حضرت یوسف ؑپر تہمت ِزنا لگائی گئی تو اللہ تعالیٰ نے ایک شیرخوار بچے کی زبان سے آپ کی برأت کی۔ حضرت مریم ؑپر الزام لگایا گیا تو عیسٰی ؑ جوابھی چند دنوں کے بچے تھے انھوں نے آپ کی برأت کی مگر جب منافقین نے حضرت عائشہؓ کو اپنے پروپیگنڈے اور صریح بہتان کا موضوع بنایا اور ہرزہ سرائی کی جسارت کی تو خود ربّ کائنات نے آپ کی پاکیزگی اور طہارت کی شہادت دی اور سورۃ النور کی ابتدائی ۱۰؍ آیات نازل فرمائیں جن کا براہِ راست تعلق اس واقعے سے ہے۔ 
 (سیرت ابن ہشام، ج ۲، ص ۳۰۴)
افواہ یا جھوٹے پروپیگنڈے پر ردّعمل: افک کے معنی قطعی جھوٹ، افترا اور خلافِ حقیقت بات ہے اور اگر یہ الزام تراشی کے طور پر بولاجائے تو اس کے معنی سراسر بہتان کے ہوتے ہیں۔ کسی بھی شریف زادی کے خلاف جھوٹے اسیکنڈل اور منفی پروپیگنڈے کے ردّعمل میں جو آئیڈیل معاشرتی رویہّ ہو سکتا ہے، ایک اسلامی معاشرے میں وہ یہی رویہّ ہے جس کی قرآن نشان دہی کرتا ہے۔ اگر اہل ایمان صبرو تحمل اور حسنِ ظن سے کام لیں اور پروپیگنڈے کی رَو میں بہنے کے بجائے افواہوں کا سدّباب کریں تو دشمن وہ مقاصدحاصل نہیں کر سکتا جو مسلمانوں کو نفسیاتی اُلجھن، افتراق اور آپس کی بدگمانیوں میں مبتلا کر کے اور اُن کا عمومی تاثر خراب کر کے حاصل کرنا چاہتا ہے۔ سورہ النور میں اس واقعے کو غیر معمولی قرار دیا گیا:
 ’’(ذرا غور تو کرو، اُس وقت تم کیسی سخت غلطی کر رہے تھے) جب کہ تمہاری ایک زبان سے دُوسری زبان اِس جھوٹ کو لیتی چلی جا رہی تھی اور تم اپنے منہ سے وہ کچھ کہے جا رہے تھے جس کے متعلق تمہیں کوئی علم نہ تھا۔ تم اسے ایک معمولی بات سمجھ رہے تھے، حالانکہ اللہ کے نزدیک یہ بڑی بات تھی۔ ‘‘(النور :۱۵) 
اس انتباہ کے ساتھ ہی قرآن نے معاً یہ نصیحت بھی کر دی:
’’کیوں نہ اسے سنتے ہی تم نے کہہ دیا کہ ہمیں ایسی بات زبان سے نکالنا زیب نہیں دیتا، سبحان اللہ، یہ تو ایک بہتان عظیم ہے۔ اللہ تم کو نصیحت کرتا ہے کہ آئندہ کبھی ایسی حرکت نہ کرنا، اگر تم مومن ہو۔ ‘‘(النور : ۱۶-۱۷)
مسلمانوں کے آپس میں حسنِ ظن کی مزید تاکید اِن الفاظ میں کی گئی:
’’جس وقت تم لوگوں نے اسے سنا تھا اُسی وقت کیوں نہ مومن مردوں اور مومن عورتوں نے اپنے آپ سے نیک گمان کیا اور کیوں نہ کہہ دیا کہ یہ صریح بہتان ہے؟ وہ لوگ (اپنے الزام کے ثبوت میں ) چار گواہ کیوں نہ لائے؟ اب کہ وہ گواہ نہیں لائے ہیں، اللہ کے نزدیک وہی جھوٹے ہیں۔ ‘‘ (النور :۱۲-۱۳)
حقیقت یہ ہے کہ مسلم معاشرے کے مرد و زن کا آپس میں نیک گمان اور حسنِ ظن ایک ایسی ڈھال ہے جس سے ٹکرا کر تمام بے بنیاد افواہوں اور پروپیگنڈے کا زور ٹوٹ جاتا ہے۔ چاہے پس پردہ مکار دشمن کا سرمایہ، منصوبہ اور وسائل کا زور ہی کیوں نہ ہو۔ اگر مسلمانوں کے نظریاتی دشمنوں کی من گھڑت خبریں اور گمراہ کن افواہیں ہماری زبان اور ہمارے قلم پر نہ چڑھ جائیں تو پھر کیا مجال کہ یہ شر پھیل کر ہمارے دلوں میں کدورتوں اور ہماری صفوں میں انتشار کو جنم دے؟ لہٰذا ہمیں دشمن کی افترا پردازیوں کی فکر نہیں بلکہ اپنے ذرائع ابلاغ کے کردار اور معاشرتی رویّے کی فکر ہونی چاہئے۔ 
عہد حاضر کے تقاضے: پروپیگنڈا زمانۂ امن میں بھی ہوتا ہے اور زمانۂ جنگ میں بھی۔ زمانہ جنگ میں افواہ سازی اور پروپیگنڈا اپنے پورے عروج پر ہوتا ہے۔ اس لئے ذرائع ابلاغ کی ذمّہ داری بہت بڑھ جاتی ہے تاکہ پروپیگنڈے سے خوف و ہراس نہ پھیلے اور دشمن اپنے عزائم میں کامیاب نہ ہو۔ ایسے مواقع پر ذرائع ابلاغ کیا کردار ادا کریں ؟ اُس کی وضاحت قرآن میں یوں کی گئی:
’’جب بھی اُن کے پاس امن یا جنگ کی کوئی خبر پہنچتی ہے تو یہ اُس کو فوراً نشر کر دیتے ہیں اور اگر یہ لوگ اُس کو رسول کی طرف یا اپنے میں سے اولی الامر کی طرف لوٹا دیتے تو اُن میں سے جو بھی لوگ اس (خبر) کی تحقیق کر سکتے ہیں وہ اس کی حقیقت معلوم کر لیتے اور اگر تم لوگوں پر اللہ کا فضل نہ ہوتا اور اُس کی رحمت شا مل ِ حال نہ ہوتی تو تم بھی شیطان کے پیچھے چل پڑتے سوائے چند لوگوں کے۔ ‘‘(سورہ النساء :۸۳)
یہ آیت منافقین کی شرارتوں کے بارے میں نازل ہوئی تھی جو افواہیں پھیلا کر معاشرے میں خوف و ہراس پیدا کرتے تھے۔ اس آیت سے یہ صاف ثابت ہوتا ہے کہ افواہیں پھیلانا شیطانی کام ہے اور منافقین کی نشانی ہے۔ (تفہیم المسائل، مولانا گوہر رحمن، ج ۱، ص ۴۲۶)