ناشتے کے مزیدار پکوان، اِن سے موسم ِ سرما کی شام کا لطف اٹھائیں

فش سلائس
درکار اجزاء:
 مچھلی (بھاپ پر اُبال لیں) ۲؍ کپ، انڈا ایک عدد، میدہ ایک چھوٹا چمچہ، پیاز (چوپ کرلیں) ایک عدد، سیاہ مرچ پاؤ ڈر ایک چوتھائی چھوٹا چمچہ، چائنیز نمک آدھا چھوٹا چمچہ، ٹماٹو سوس حسب ضرورت، ڈبل روٹی چند سلائس، ہرا دھنیا چند پتے، نمک حسب ذائقہ۔ 
بنانے کا طریقہ:
 مچھلی کے گوشت سے کھال اور کانٹے علاحدہ کرکے گوشت کو پیالے میں ڈالیں۔ پیاز، نمک اور انڈا شامل کرکے اس میں میدہ، سیاہ مرچ پاؤڈر، چائنیز نمک، ٹماٹو سوس اور ہرادھنیا ڈال کر کانٹے سے مکس کریں۔ اس کے بعد ڈبل روٹی کے کنارے کاٹ لیں۔ ہرسلائس کو چار حصوں میں کاٹ لیں اور تیار کئے ہوئے آمیزے کو ڈبل روٹی کے ہر ٹکڑے پر لگائیں۔ فرائنگ پین میں تیل گرم کریں۔ (آمیزہ زیادہ گاڑھا نہیں ہونا چاہئے ورنہ سلائس پر چپکے گا نہیں) اس میں سلائس ڈال کر گولڈن براؤن ہونے تک فرائی کریں اور نکال کر پلیٹ میں رکھ لیں۔ مزیدار سلائس تیار ہیں سوس کے ساتھ نوش فرمائیں۔
پالک کے رولز 
درکار اجزاء:
 پالک آدھا کلو، مکھن ۲؍ بڑے چمچے، انڈے ( زردی سفیدی الگ الگ کرلیں) ۴؍ عدد، جائفل ایک چٹکی، چیز ایک بڑا چمچہ (بھرنے کے لئے)، مکھن ایک بڑا چمچہ، مشروم (کٹی ہوئی) ایک پاؤ، آدھے لیموں کا رس، دہی ۲۰۰؍ ملی گرام، سبز دھنیا ۲؍ بڑے چمچے۔ 
بنانے کا طریقہ: رول میں بھرنے والا آمیزہ بنانے کے لئے سب سے سوس پین میں مکھن گرم کریں اور اس میں مشروم، لیموں کا رس، نمک اور کالی مرچ ڈالیں۔ ۳؍ منٹ کے لئے پکائیں اور اسے ٹھنڈا کر لیں۔ پالک دھو کر سوس پین میں ڈالیں۔ پانی نہ ڈالیں ۲؍ منٹ کے لئے درمیانی آنچ پر پکائیں۔ پھرپالک کا پانی ٹھنڈا کر کے نچوڑ لیں۔ بیکنگ پین میں چکنائی لگا کر تیار رکھیں۔  پالک کو اچھی طرح پیس لیں اور ایک پیالے میں مکھن، انڈوں کی زردیاں، جائفل اور نمک مرچ ڈال کر پھینٹ لیں۔ دوسرے پیالے میں سفیدیوں کوپھینٹ لیں لیکن خشک نہ ہونے دیں۔ پھر اسے پالک میں ملا دیں۔ پالک کے آمیزے کو بیکنگ پین میں ڈال کر ۴۲۵؍ درجہ حرارت پر ۱۲؍ منٹ کے لئے بیک کریں۔ چیز کو ایک شیٹ پر چھڑکیں اور بیک کیا ہوا آمیزہ الٹا کر کے اس پر ڈالیں۔ ۱۰؍ منٹ تک ٹھنڈا کریں پھر کاغذ نکال دیں۔ مشروم پانی سے باہر نکال لیں اور اس کا پانی محفوظ کرلیں۔ مشروم میں دہی، دھنیا اور نمک مرچ ملائیں۔ اگر گاڑھا ہو جائے تو تھوڑا سا مشروم کا پانی ڈالیں۔ آمیزے کو پالک کی روٹی پر پھیلا دیں۔ اطراف خالی رکھیں۔ اس کے بعد لمبائی سے لپیٹنا شروع کردیں۔ پھر اسے ٹھنڈا کرکے سائس بنالیں۔ مزیدار پالک رولز تیار ہیں۔ سوس یا ڈپ کے ساتھ لطف اٹھائیں۔