گزشتہ ہفتے مذکورہ بالا عنوان دیتے ہوئے ہم نے ’’اوڑھنی‘‘ کی قارئین سے گزارش کی تھی کہ اِس موضوع پر اظہارِ خیال فرمائیں۔ باعث مسرت ہے کہ ہمیں کئی خواتین کی تحریریں موصول ہوئیں۔ ان میں سے چند حاضر خدمت ہیں۔

اللہ نے صحت سے نوازا ہے

نعمت تو بے شمار ہیں: (۱) اللہ کے فضل سے اچھی صحت ہے، بیماری سے دور ہوں۔ اسپتالوں کے چکر سے بچایا ہے۔ (۲) میرے وقت میں بڑی برکت دی، آج جہاں ہر ایک وقت کی کمی کی شکایت کرتاہے الحمدللہ میں زوم پر دن میں دو سے تین میٹنگ اٹینڈ کر لیتی ہوں اور خود بھی درس قرآن لیتی ہوں۔ (۳) رب کا کرم ہے میرے شوہر میرا خیال رکھتے ہیں۔ (۴) بی ایم سی میں بحیثیت معلمہ تیس سال کی نوکری کی اور اب دین کی اشاعت اور تبلیغ سے منسلک ہوں جو باعث ِ رحمت ہے۔ (۵) مجھے سسرال والے بڑے اچھے ملے۔
رضوانہ رشید احمد (تھانے)
اللہ نے کسی کا محتاج نہیں بنایا، الحمدللہ

اللہ کی عطا کی ہوئی ہر ایک چیز میرے لئے نعمت سے کم نہیں ہے۔ (۱)اللہ نے مجھے ایمان والی زندگی عطا کی ہے۔ (۲) اللہ نے عزت والی زندگی عطا کی ہے۔ (۳) اللہ نے کسی کا محتاج نہیں بنایا اور اتنی صلاحیت دی که وقت اور حالات کا ڈٹ کر مقابلہ کر سکوں الحمد للہ۔
(۴) فرمان بردار اور نیک سیرت اولاد ہے۔ اس کے لئے میں اللہ کی بہت شکر گزار ہوں۔ (۵) مَیں ایک معلمہ ہوں اور اللہ نے ایسے طلبہ مجھے عطا کئے ہیں جو علم کی جستجو میں لگے رہتے ہیں اور استاد کی قدر اور علم کی قدر کرنا جانتے ہیں۔
صبا پروین محمد عقیل (گوونڈی، ممبئی)
دو بیٹیوں کی شکل میں رحمتوں سے نوازا

اَن گنت نعمتوں میں سے صرف ۵؍ نعمتوں کے مشکل ترین چناؤ کے بعد یہ وہ چند نعمتیں ہیں جن کیلئے مَیں اللہ رب العزت کی تہہ دل سے شُکر گزار ہوں: (۱) ایک عورت کے قالب میں جنم لینا میرے لئے باعث امتیاز اور باعث شکر ہے۔ (۲) زندگی جیسی نعمت کے ساتھ تمام جسمانی اعضاء کی سلامتی، صحت تندرستی و عافیت انمول دولت ہے۔ (۳)کُشادہ روزی اور رزق حلال سے نوازنے کیلئے ربِ کریم کا شکریہ۔ (۴) اولاد کی نعمت کے طور پر دو فرمانبردار بیٹیوں سے نوازا ہے۔(۵) علم و عمل کی قیمتی ترین نعمت سےنوازا۔
خالدہ فوڈکر (جوگیشوری، ممبئی)
مجھے خوشحال زندگی سے نوازا 

(۱) مَیں اللہ رب العالمین کی شکر گزار ہوں کہ اس نے مجھے حضرت محمدؐ کا امتی بنایا اور ایک دیندار گھرانے میں پیدا فرمایا۔ (۲) اللہ کی مشکور ہوں کہ اس نے مجھے والدین جیسی عظیم نعمت سے نوازا جنہوں نے مجھے دین و دنیا کی بہترین تعلیم سے آراستہ کیا۔ (۳) اللہ کی نوازشوں میں سے ایک میری بیٹیاں ہیں جن کی وجہ سے مجھے ماں کہلانے کا شرف حاصل ہوا۔ (۴) دنیا کی عظیم نعمتوں میں سے ایک اچھی صحت ہے۔ (۵) اللہ کی شکر گزار ہوں کہ اس نے مجھے خوشحال زندگی سے نوازا اور ضرورتمندوں کی مدد کرنے کے قابل بنایا۔
ڈاکٹر روحینہ کوثر سید (ناگپور، مہاراشٹر)
اچھی صحت اور ذہنی و جسمانی تندرستی عطا کی

مَیں مالک کائنات کی بے حد شکرگزار ہوں کہ اس مالک نے مجھے
(۱)دین فطرت پر پیدا کیا، نبی اکرمﷺ کی امت میں شامل فرمایا اور میری رہنمائی کیلئے قرآن جیسی عظیم نعمت عطا کی۔ (۲) بہترین علم، اچھی صحت اور ذہنی و جسمانی تندرستی عطا کی۔ (۳) بے انتہا محبت کرنے والے والدین اور مشفق و سرپرست میرے بڑے ماموں کی محبت بھری توجہ ملی۔ (۴) میرے شریک زندگی جن کی ہر لمحہ میرے تئیں محبت میرا بہت ہی قیمتی اور خوبصورت سرمایہ ہے۔ (۵) میرے پانچوں بیٹے بیٹیاں اور ان کے متعلقین۔
ناز یاسمین سمن (پٹنہ، بہار)

ایمان کی دولت سے نوازا

(۱) اس بات کیلئے شکر گزار ہوں کہ ایک مسلم گھرانے میں پیدا ہوئی۔ (۲) ہمارے پاس ہر دولت سے بڑھ کر ایمان کی دولت ہے۔ (۳) اپنی بات اور اپنی سوچ کو بذریعہ قلم لوگوں تک پہنچانے کا ہنر، جس کیلئے بے پناہ شکر گزار ہیں۔ (۴) ماں باپ ایک انمول نعمت ہیں جنہوں نے اپنی محبت سے ہماری اس دنیا کو خوبصورت بنا دیا۔ (۵) بہترین اساتذہ جنہوں نے اس زمانے میں جینے کا طریقہ بتایا۔
سارہ فیصل (مئو، یوپی)
والدین کی دولت سے نوازا

(۱) ایمان کی دولت سے نواز، اس کیلئے شکر گزار ہوں۔ (۲) میری ماں جو ہمیشہ میرا ساتھ دیتی ہے۔ (۳) میرے والد جنہوں نے اپنے الفاظ سے میری شخصیت کی تشکیل کی ہے تاکہ مجھے اتنا مضبوط بنایا جا سکے کہ میں دنیا کا سامنا کر سکوں۔ (۴) ہمارا مذہب جس نے میری نظر میں ہر چیز کو اتنا واضح کر دیا ہے کہ میں ہر اچھے اور برے میں فرق کر سکتا ہوں۔ (۵) آرام و آسائش کیلئے میسر سامان کیلئے شکریہ۔
کوسین عافیت (یوپی)
ذہنی و جسمانی صحت سرمایۂ حیات

مَیں رب ِ کریم کی شکر گزار ہوں کہ اس نے مجھے بے شمار نعمتوں سے نوازا: (۱) ایمان، سرمایہ آخرت سے نوازا۔ (۲) ذہنی و جسمانی صحت سرمایۂ حیات ہے۔ (۳) والدین، انسانی بقا و تحفظ کیلئے قیمتی اثاثہ ہے۔ (۴) صحبت، میرے حلقہ اربابِ میں شامل معززین بہترین شخصیات ہیں۔ (۵) نعمتوں کی تکمیل و تحفظ کیلئے عظیم ترین نعمت شعور سے معمور فرمایا۔ تمام نعمتوں پر صد شکر۔
شبنم فاروق (گوونڈی، ممبئی)
نعمت ِ ایمان سے نوازا

انسان کا وجود بذات خود سراپا نعمت ہے۔ (۱) مجھے جو سب سے بڑی نعمت ملی ہے جس پر میں بصد خلوص قلب ممنون و مشکور ہوں وہ ہے نعمت ایمان۔ (۲) علم کی دولت سے نوازا۔ (۳) امت محمدیہؐ کی ایک فرد ہوں جس پر مجھے فخر ہے۔ (۴) میرے اساتذہ کرام جنہوں نے مجھے علم حاصل کرنا سکھایا اور حق و باطل کے درمیان تفریق سکھائی۔ (۵) میرے گھر کا دینی ماحول جو مجھے خالص توحید کا درس دیتا ہے۔
ناعمہ ارشد (بلرام پور، یوپی)
حق بات سمجھنے کی صلاحیت عطا کی

مَیں خدا کی بے انتہا شکر گزار ہوں کہ اُس نے مجھے زندگی کی ہر لذت اور ہر نعمت سے نوازا ہے: (۱) مجھے ایک دیندار مسلمان گھرانے میں پیدا کیا۔ (۲) مجھے محمد عربیؐ کی امت میں پیدا کیا۔ (۳) مجھے والدین جیسی عظیم ترین نعمت سے نوازا۔ (۴) علم دین کے حصول کیلئے منتخب کیا،کہ یہ بھی ایک توفیق ہے۔ (۵) اللہ نے مجھے حق دیکھنے سننے اور اپنی بات کہنے اور حق بات سمجھنے کی صلاحیت عطا فرمائی ہے۔
خولہ صدیقی محمدی (لکھیم پور، کھیری، یوپی)
مجھے دولت ایمان سے نوازا

ویسے تو ہر نعمت پر رب کا شکریہ لیکن یہ نعمتیں میرے لئے خاص ہیں: (۱) میرے والدین جنہوں نے میری تربیت دینی نہج پر کی اور مجھے دینی علوم سے آراستہ کیا۔ (۲) مجھے دولت ایمان سے نوازا۔ (۳) بے پناہ شکریہ اس ذات کا کہ اس نے مجھے خود مختار بنایا اور مالی طور پر مستحکم کیا۔ (۴) قلم سے لکھنے کی صلاحیت دی، اگرچہ اب بھی بہت کچھ سیکھنے کی ضرورت ہے۔ (۵) مجھے ذوق و فن تدریس عطا کیا۔
سحر جوکھن پوری (جوکھن پور، یوپی)
کون کون سی نعمتوں کو جھٹلاؤ گے؟

اللہ تعالیٰ نے کائنات کی تخلیق بڑی حکمت سے فرمائی ہے۔ اللہ نے لاتعداد نعمتیں انسانوں کو بخشی ہیں جن کیلئے ہمیں شکر گزار ہونا چاہئے۔ سورہ رحمان میں اللہ نے بار بار پوچھا ہے کہ تم اپنے رب کی کون کون سی نعمتوں کو جھٹلاؤ گے؟ پھر بھی پانچ نعمتیں جو بہت اہم ہیں: (۱) ہوا (۲) پانی (۳) سورج کی روشنی (۴) بارش کا پانی (۵) بے شمار قسم کے اناج، میوہ جات، پھل، نباتات، حیوانات، جڑی بوٹیاں وغیرہ۔
نجمہ طلعت، جمال پور، علی گڑھ

ہر حال میں خوش رہنے کی عادت، ایک نعمت

ربِ کریم نے انسان کیلئے دنیا بنائی پھر مرد و عورت بنائے تاکہ زندگی کی گاڑی برابر چلتی رہے۔ لیکن تقدیر سبھی کی الگ الگ بنائی۔ تقدیر کی بہ نسبت دیکھا جائے تو زندگی میں کتنے اُتار چڑھاؤ آتے ہیں ہم اُن نعمتوں کا شکر ادا کریں جو ہمارے حصے میں آئے ہیں۔ مَیں ان نعمتوں کے لئے اللہ رب العزت کی شکر گزار ہوں: (۱) میرے بزرگ پیر مرشد کا دامن تھامناہے۔ (۲) میں تعلیم یافتہ ہوں اور معلمہ ہوں۔ (۳) میرے بچے نیک ہیں۔ (۴) میرے سسرال میں ہر کوئی ایک دوسرے کو سمجھتا ہے جو ایک نعمت ہے۔ (۵) میری ہر حال میں خوش رہنے کی عادت کو گھر والے پسند کرتے ہیں یہ میرے لئے کسی نعمت سے کم نہیں ہے۔ 
شاہدہ وارثیہ (وسئی، پال گھر)
ذہنی سکون سے نوازا

سب سے پہلے مَیں ہر نعمت کے لئے اللہ تعالیٰ کی شکر گزار ہوں کہ اس نے ہر چیز عطا کی جس کے ہم قابل بھی نہ تھے۔
(۱) اللہ تعالیٰ نے ہمیں حضورؐ کا اُمتی بنایا، ایسے والدین عطا کئے جنہوں نے ہمیں دنیا میں رہنے کا شعور سکھایا،دینی و دنیاوی تعلیم دلوائی، بھائی بہن جیسے خوبصورت رشتے دیئے۔ (۲) بہت اچھا عزت اور محبت دینے والا شوہر،بچّے اور گھر عطا کیا۔ (۳) سوائے اللہ تعالیٰ کے کسی کا محتاج نہ کیا، ذہنی سکون، صحت والی زِندگی اور معاشرے میں عزت دی۔ (۴) ہر وہ چیز جو دل نے چاہا اور اللہ نے عطا کیا۔ (۵)شعور دیا کہ آج اگر میں چار افراد کے سامنے کوئی بات رکھتی ہوں تو لوگ غور بھی کرتے ہیں اور اہمیت بھی دیتے ہیں۔
فرح حیدر (اندرا نگر، لکھنؤ)
رزقِ حلال سب سے بڑی نعمت

خالق کل نے ہمیں بے شمار نعمتیں عطا کی ہیں۔ اگر ہم اللہ تبارک و تعالیٰ کی نعمتوں کا شمار کریں تو ہمارا دل شکر کے جذبات سے لبریز ہوجاتا ہے۔ (۱) اس نے مجھے مسلمان گھرانے میں پیدا کیا اور اس کی سب سے بڑی نعمت یعنی مذہب اسلام جو اس نے ہمیں شریعت ِ محمدیؐ کی شکل میں عطا کی۔ (۲) والدین، جو ہمیشہ اور ہر حال میں اپنی اولاد کا بھلا چاہتے ہیں۔ (۳) سب سے اہم نعمت جس کیلئے مَیں ربِ کائنات کی بیحد مشکور و ممنون ہوں وہ ہے نیک اور فرمانبردار اولاد  اور بیٹی جیسی بہو۔ (۴) رزقِ حلال وہ نعمت ہے جسے ہم کبھی فراموش نہیں کرسکتے۔ (۵) علام الغیوب کی بے شمار نعمتوں میں سے ایک نعمت علم ہے۔
فرزانہ بانو (شہر کا نام نہیں لکھا)
ماں جیسے عظیم منصب پر فائز کیا

ربِ کریم نے اپنے بندوں کیلئے بے شمار نعمتیں اس دنیا میں رکھی ہیں جس کا کوئی شمار نہیں اور نہ ہی کوئی نعم البدل۔ اللہ کی بے شمار عنایتوں کی وجہ سے زبان سے بے اختیار یہ آیت نکلتی ہے: اپنے رب کی کون کون سی نعمتوں کو جھٹلاؤ گے؟ یہاں چند نعمتوں کا ذکر ضروری سمجھتی ہوں: (۱) اللہ کا شکر ہے کہ ہم اسلام کے پیروکار ہیں اور حضرت محمدؐ کے امتی ہیں۔ (۲) والد جیسا شفیق سایہ اور ماں جیسی ہستی کا سایہ میری زندگی کی مشکل راہوں سے گزرنے کا حوصلہ دیتی ہے۔ (۳) ماں جیسے عظیم منصب پر فائز کیا اور دو بیٹیوں جیسی رحمت سے نوازا۔ (۴) صحت و تندرستی کی دولت سے نوازا ہے۔ (۵) علم و عقل سے نوازا اور وقت کے ساتھ شعور میں اضافہ کیا۔ 
فرزانہ انیس احمد (مالیگاؤں، مہاراشٹر)
اپنے گھر کا دیدار کروایا، خاص عنایت

انسان کو دُنیا میں پیدا کرکے مالک حقیقی نے اُسے بے شمار نعمتوں سے نوازا ہے۔ مجھے اللہ رب العزت نے کئی نعمتوں سے نوازا ہے: (۱) دیندار گھر میں پیدا کیا، آپﷺ کا امتی بنا کر بھیجا جو سب سے بڑی نعمت ہے۔ اللہ کا شکر ہے کہ اس نے مجھے ہدایت سے نوازا ہے۔ (۲) والدین دنیا کی سب بڑی نعمت ہے۔ ان کا ساتھ گزرتی زندگی میں بہت ضروری ہے۔ قدم قدم پر انہوں نے میرا بھرپور ساتھ دیا۔ (۳) اچھا شریک حیات اور نیک اولاد جیسی نعمت سے نوازا۔ (۴) بحیثیت معلمہ ہونا بھی ایک نعمت ہے کہ ٹیچر قوم کا معمار ہے اس لئے مَیں خود پر فکر محسوس کرتی ہوں۔ (۵) خانۂ کعبہ اور روضہ رسولؐ کی زیارت کروائی، خاص عنایت ہے۔
قمرالنساء جمیل احمد (مالونی، ملاڈ)
تندرستی سب سے بڑی نعمت

اللہ رب العزت نے ہمیں بے شمار نعمتیں عطا فرمائی ہیں۔ ان میں سے بالخصوص ۵؍ کا تذکرہ کرنا بے شک جوئے شیر لانے کے مترادف ہے۔ (۱) مَیں سب سے پہلے جس نعمت کیلئے شکر گزار ہوں وہ یہ ہے کہ اللہ تعالیٰ نے مجھے اشرف المخلوقات میں بنایا اور اس سے بڑھ کر یہ کہ مجھے مسلمان اور آقا ؐ کا امتی بنایا۔ (۳) خداوند کریم نے مجھے تندرست و صحتمند جسم سے نوازا جس کے تحت میں اپنے تمام امور خود انجام دے سکتی ہوں اور کسی کی محتاج نہیں ہوں۔ (۴) رب کریم نے مجھے والدین جیسی بیش قیمت دولت عطا کی۔ (۵) بیش بہا نعمت ، میرے شوہر اور بچے ہیں جن کے دم سے میرے گھر کی رونق ہے۔ وہی میری زندگی کا مقصد ہیں۔
رضوی نگار (اندھیری، ممبئی)