کمال عدوان اسپتال کے سابق سربراہ ڈاکٹر حسام ابو صفیہ تقریباً ۲۳؍  ماہ سے بغیر فردِ جرم حراست میں ہیں۔ طبی ریکارڈ کے جائزے میں سینے کے درد، خون کی کمی، جلدی بیماری اور جسم پر چوٹوں کی نشاندہی؛ آزادانہ طبی معائنے کی درخواست بھی مسترد کردی گئی۔

اسرائیلی جیل میں قید غزہ کے معروف ماہرِ اطفال اور کمال عدوان اسپتال کے سابق ڈائریکٹر ڈاکٹر حسام ابو صفیہ کی صحت کے بارے میں نئی تشویش سامنے آئی ہے۔ برطانوی اخبار گارجین کی تازہ رپورٹ کے مطابق اسرائیلی ماہرِ طب نے ان کے طبی ریکارڈ کا جائزہ لینے کے بعد خبردار کیا ہے کہ مسلسل وزن میں کمی، خوراک کی قلت، مبینہ تشدد اور مناسب طبی نگہداشت نہ ملنے کے باعث ان کی جان کو خطرہ لاحق ہوسکتا ہے۔ ڈاکٹر ابو صفیہ دسمبر ۲۰۲۴ء سے اسرائیلی حراست میں ہیں، لیکن اب تک ان کے خلاف باقاعدہ فردِ جرم عائد نہیں کی گئی ہے۔ ڈاکٹر ابو صفیہ کو ۲۷؍ دسمبر ۲۰۲۴ء کو شمالی غزہ میں واقع کمال عدوان اسپتال سے اسرائیلی فوج نے حراست میں لیا تھا۔ وہ اس وقت اسپتال کے ڈائریکٹر تھے اور اسرائیلی فوج کے محاصرے اور مسلسل حملوں کے دوران بھی طبی خدمات جاری رکھنے کی کوشش کررہے تھے۔ ان کی گرفتاری کے وقت وہ سفید ڈاکٹر کا کوٹ پہنے ہوئے تھے۔ یہ وہی کوٹ تھا جسے انہوں نے اپنے بیٹے ابراہیم کی موت کے بعد سے دھویا نہیں تھا۔ ان کے بیٹے کی موت اکتوبر ۲۰۲۴ء میں اسپتال کے داخلی راستے کے قریب اسرائیلی ڈرون حملے میں ہوئی تھی۔

یہ بھی پڑھئے: اسرائیلی فوجیوں کیلئے کیٹی پیری کا نجی کنسرٹ، چوطرفہ مذمت

گرفتاری سے قبل ڈاکٹر ابو صفیہ غزہ کے ان طبی کارکنوں کی نمایاں آواز بن چکے تھے جو شدید محاصرے، ادویات کی قلت اور اسپتالوں پر حملوں کے باوجود مریضوں کا علاج جاری رکھے ہوئے تھے۔ کمال عدوان اسپتال نے ان کی قیادت میں ۸۰؍ روز سے زیادہ عرصے تک محاصرے اور حملوں کے دوران کام جاری رکھا تھا۔ ان کی گرفتاری کے بعد فلسطینی طبی حلقوں اور انسانی حقوق کی تنظیموں نے ان کی رہائی کا مطالبہ کیا تھا۔ گارجین کے مطابق اسرائیلی حکام نے ڈاکٹر ابو صفیہ کو ’غیر قانونی جنگجو‘ قرار دیا ہے۔ اس قانونی زمرے کے تحت اسرائیل نے انہیں طویل عرصے تک بغیر مقدمہ چلائے حراست میں رکھنے کا جواز پیش کیا ہے۔ رپورٹ کے مطابق ۳۷۵؍ سے زیادہ طبی کارکنوں کو بھی اسی نوعیت کی درجہ بندی کے تحت حراست میں رکھا گیا ہے۔ ڈاکٹر ابو صفیہ کو ابتدا میں دیگر مقامات پر رکھنے کے بعد زیرِ زمین واقع ریکفیت جیل منتقل کیا گیا، جہاں انہیں تنہائی میں رکھا گیا ہے۔ ان کے اہل خانہ بھی ان سے براہِ راست رابطہ نہیں کرسکے ہیں۔ ان کی صحت سے متعلق تشویش اس وقت بڑھی جب اسرائیلی انسانی حقوق کی تنظیم ’فزیشنز فار ہیومن رائٹس اسرائیل‘ نے ان کے طبی ریکارڈ حاصل کرکے ایک آزاد اسرائیلی طبی ماہر کو جائزے کے لیے فراہم کیے۔ پروفیسر امیت تیروش کے مطابق ڈاکٹر ابو صفیہ کا وزن جنوری ۲۰۲۵ء میں ۹۰؍ کلوگرام تھا، جو مئی ۲۰۲۶ء تک کم ہوکر ۷۶؍ کلوگرام رہ گیا۔ ماہر نے اسے تشویش ناک قرار دیتے ہوئے کہا کہ اتنی نمایاں کمی کی وجہ معلوم کرنا اور اس کا فوری طبی جائزہ ضروری ہے۔

یہ بھی پڑھئے: لوئس ہیملٹن کا رفح دورہ، غزہ کیلئے امدادی سرگرمیوں کا جائزہ لیا

طبی ریکارڈ میں سینے میں درد، خارش کی بیماری کے علاج میں تاخیر، خون میں ہیموگلوبن کی سطح کم ہونے، چکر آنے، پسلیوں میں درد اور آنکھ کے گرد نیل پڑنے کا بھی ذکر ہے۔ پروفیسر تیروش کے مطابق ہیموگلوبن میں کمی خاص طور پر تشویش ناک ہے، کیونکہ یہ وزن میں کمی کے بعد سامنے آئی اور اس کی مناسب جانچ نہیں کی گئی۔ جولائی ۲۰۲۶ء کے ریکارڈ میں جسم پر چوٹوں کے نشانات بھی درج ہیں۔ ڈاکٹر ابو صفیہ نے اپنے وکیل کو بتایا تھا کہ جیل کے محافظوں نے انہیں مارا پیٹا، تاہم طبی دستاویزات میں ان چوٹوں کی وجہ واضح نہیں کی گئی۔ پروفیسر تیروش نے گارجین سے گفتگو میں کہا کہ مسلسل خوراک کی محرومی، وزن میں کمی، بار بار مارپیٹ، جسمانی چوٹوں اور ناکافی طبی نگہداشت کے مجموعی اثرات ڈاکٹر ابو صفیہ کی زندگی کے لیے خطرناک ثابت ہوسکتے ہیں۔ ان کے مطابق طبی ریکارڈ میں سامنے آنے والے فوری مسائل کی مناسب تحقیقات نہیں کی گئیں۔ انہوں نے مطالبہ کیا کہ ڈاکٹر ابو صفیہ کا کسی ایسے آزاد طبی ماہر سے معائنہ کرایا جائے جو جیل انتظامیہ سے وابستہ نہ ہو اور جسے ان کے مکمل طبی ریکارڈ تک رسائی حاصل ہو۔
فزیشنز فار ہیومن رائٹس اسرائیل نے بھی کہا ہے کہ ڈاکٹر ابو صفیہ کے خلاف اسرائیلی حکام کے الزامات انہیں آزادانہ طبی معائنے کے حق سے محروم کرنے کا جواز نہیں بن سکتے۔ تنظیم کے نمائندے ناجی عباس کے مطابق غزہ کے ۱۴؍ فلسطینی ڈاکٹر، جن میں اسپتالوں کے سربراہ اور اہم طبی شعبوں کے ماہرین بھی شامل ہیں، اب تک بغیر فردِ جرم یا مقدمے کے قید ہیں، حالاں کہ غزہ کا صحت کا نظام پہلے ہی شدید دباؤ کا شکار ہے۔ اس سے قبل اقوام متحدہ کے ورکنگ گروپ برائے من مانی حراست نے جولائی ۲۰۲۶ء میں ڈاکٹر ابو صفیہ کی حراست کو من مانی قرار دیتے ہوئے ان کی فوری رہائی کی سفارش کی تھی۔ اقوام متحدہ کے ادارے نے کہا تھا کہ ان کی حراست انسانی حقوق کے عالمی اعلامیے اور شہری و سیاسی حقوق کے بین الاقوامی معاہدے کی متعدد دفعات سے مطابقت نہیں رکھتی۔ تاہم یہ ورکنگ گروپ کی قانونی رائے اور سفارش ہے، جو اپنے طور پر لازمی عدالتی حکم نہیں ہے۔ اسرائیلی سپریم کورٹ نے گزشتہ ماہ ان کی رہائی کے لیے دائر درخواست مسترد کردی تھی۔ 

یہ بھی پڑھئے: امریکہ: عبدل السید کا ایران جنگ کو پاگل پن قرار دے کرہیگستھ سے استعفیٰ کا مطالبہ

اسرائیلی جیل سروس نے گارجین کو بتایا کہ ڈاکٹر ابو صفیہ کے معاملے پر ہونے والی تنقید اسرائیل کو بدنام کرنے کی وسیع مہم کا حصہ ہے۔ ادارے کے ترجمان کے مطابق جیل سروس قانون کے مطابق اور عدالتی نگرانی میں کام کرتی ہے۔ تاہم اس نے ان کے طبی ریکارڈ میں درج مخصوص مسائل یا آزادانہ معائنے کی درخواست مسترد کیے جانے پر تفصیلی جواب نہیں دیا۔ اس طرح ایک جانب اسرائیلی حکام ان کی حراست کا دفاع کررہے ہیں، جب کہ دوسری جانب انسانی حقوق کے ادارے اور طبی ماہرین ان کی صحت اور قانونی تحفظات کے بارے میں فوری اقدامات کا مطالبہ کررہے ہیں۔