اکثر خواتین کو شکایت ہے کہ گھر پر مکھن بازار کی طرح دانے دار اور سفید نہیں نکلتا، یہاں اس مسئلے کا حل دیا گیا ہے۔

گھر میں دہی سے مکھن بنانا ایک روایتی فن ہے لیکن اکثر صحیح طریقہ معلوم نہ ہونے کی وجہ سے یہ تھکا دینے والا اور وقت طلب کام بن جاتا ہے۔ بہت سے لوگ شکایت کرتے ہیں کہ گھر پر مکھن بازار کی طرح دانے دار اور سفید نہیں نکلتا۔ کھانا پکانے کی ماہر شویتا کھیرنار نے اس مسئلے کا حل پیش کیا ہے۔ انہوں نے دہی سے مکھن بنانے کے لیے برف  والی ایک بہت ہی موثر ترکیب بتائی ہے۔ سب سے اہم بات یہ ہے کہ اس کے لیے گھنٹوں کی مشقت کی ضرورت نہیں ہے۔ درجہ حرارت کا صحیح توازن اور ٹھنڈے پانی کا جادو منٹوں میں ملائی دار مکھن بنا سکتا ہے۔

مکھن بنانا دہی کے انتخاب سے شروع ہوتا ہے۔ شویتا کھیرنار کے مطابق، اگر آپ زیادہ مقدار میں اور  ذائقہ دار مکھن چاہتے ہیں تو تھوڑا سا کھٹا اور گاڑھا دہی بہترین ثابت ہوگا۔ ہلکی  کھٹاس چکناہٹ کو تیزی سے الگ کرنے میں مدد دیتی ہے۔ فریج سے نکلے ہوئے ٹھنڈے دہی کا استعمال کریں تاکہ مکھن نرم نہ رہے۔

یہ بھی پڑھئے: سوشل میڈیا ڈیٹاکس کیوں ضروری ہے؟

سب سے پہلے ایک گہرے برتن میں۲؍ سے۳؍کپ دہی لیں۔ آپ ہینڈ وِسک، بلینڈر یا ایک بڑا چمچ بھی استعمال کر سکتے ہیں۔ اسے ایک ہی سمت میں چند منٹ تک مسلسل ہلائیں۔ تھوڑی دیر پھینٹنے  کے بعد دہی کی ساخت بدلنا شروع ہو جائے گی اور یہ قدرے ہلکا ہو جائے گا۔

یہی وقت ہے جب شویتا کھیر نار کی خاص ترکیب کام آتی ہے۔ دہی کو ہلاتے وقت آہستہ آہستہ آدھا سے ایک کپ برف کا ٹھنڈا پانی ڈالیں۔ٹھنڈا پانی  ڈالنے سے  چکناہٹ مضبوط ہوجاتی ہے، دہی سے الگ ہوجاتی ہے اور اوپر کی طرف تیرتی ہے۔ گرم یا عام پانی استعمال کرنے سے مکھن پگھل سکتا ہے، اس کی ساخت خراب ہو سکتی ہے۔

یہ بھی پڑھئے: آفس کاکام کرنے کے ساتھ بچوں کو زیادہ سے زیادہ وقت کیسے دیا جا سکتا ہے؟

جیسے ہی آپ ٹھنڈے پانی سے پھینٹنا جاری رکھیں گے، آپ کو دہی کی سطح پر چھوٹے چھوٹے سفید دانے نظر آنے لگیں گے ۔ یہ دانے جلد ہی اکٹھے ہو کر بڑے گچھے بن جائیں گے۔ جب  سارا مکھن اوپر کی طرف تیرنے لگے اور نیچے صرف مائع رہ جائے تو یہ عمل مکمل ہو جاتا ہے۔

ایک بار جب مکھن جمع ہو جائے تو اسے اپنے ہاتھوں یا چمچ سے آہستہ سے نکال لیں۔ اب ایک اور پیالے کو ٹھنڈے پانی سے بھریں اور مکھن کودو تین بار اچھی طرح دھو لیں۔  اس طرح مکھن کے اندر دہی کی کھٹاس دور ہوجائے گی اور اس کی شیلف لائف بڑھ جائے گی۔ دھونے کے بعد مکھن بالکل سفید اور تازہ نظر آئے گا۔