پٹاخوں سے بڑھتی آلودگی پر بات ہونی چاہئے اور گاڑیوں یا کارخانوں سے پیدا ہونے والی آلودگی کے خلاف مؤثر اقدامات ہونے چاہئیں مگر.... گھریلو خواتین کیا کریں۔

ایک ماں اپنے بچے کی پیدائش سے ہی اس کی حفاظت کیلئے فکرمند رہتی ہے۔ وہ اس کی غذا کا خیال رکھتی ہے، موسم کی شدت سے بچاتی ہے، بیماری کی معمولی علامت پر پریشان ہو جاتی ہے اور راتوں کو جاگ کر اس کی دیکھ بھال کرتی ہے۔ وہ چاہتی ہے کہ اس کا بچّہ صحتمند رہے، ہنستا کھیلتا رہے اور ایک محفوظ ماحول میں پروان چڑھے۔ لیکن کیا ہم نے کبھی سوچا ہے کہ جس ہوا میں ہمارا بچہ ہر روز سانس لے رہا ہے، اس کی حفاظت کی فکر بھی اتنی ہی ضروری ہے جتنی اس کی غذا، لباس اور تعلیم کی؟

یہ سوال آج کے دور میں اس لئے زیادہ اہم ہوگیا ہے کہ ہمارے شہروں کی فضا مسلسل آلودہ ہوتی جا رہی ہے۔ تہواروں کی خوشیاں اپنی جگہ، مگر ان خوشیوں کے بعض طریقے ہماری اور ہمارے بچوں کی صحت کے لئے خطرہ بن رہے ہیں۔ دیوالی روشنی، امید اور خوشی کا تہوار ہے۔ لیکن گزشتہ کئی برسوں سے دیوالی کے موقع پر پٹاخوں کے بے تحاشا استعمال نے فضائی آلودگی اور شور کی ایک نئی پریشانی پیدا کر دی ہے۔ سوال یہ نہیں کہ کسی کو تہوار منانے کی خوشی کیوں نہ ہو، بلکہ سوال یہ ہے کہ کیا ہماری خوشی کسی دوسرے کی تکلیف کا سبب بننی چاہئے؟ کیا چند گھنٹوں کی تفریح کیلئے بچوں کے پھیپھڑوں، بزرگوں کے سکون اور بیمار افراد کی صحت کو خطرے میں ڈالنا مناسب ہے؟

آلودگی کے اثرات

فضائی آلودگی کا سب سے زیادہ اثر بچوں، بزرگوں اور پہلے سے بیمار افراد پر پڑتا ہے۔ پٹاخے جلنے سے نکلنے والا دھواں اور باریک ذرات فضا میں شامل ہو جاتے ہیں جو سانس کے ذریعے پھیپھڑوں کے اندر تک پہنچ سکتے ہیں۔ ان کی وجہ سے کھانسی، گلے میں خراش، آنکھوں میں جلن اور سانس لینے میں دشواری پیدا ہو سکتی ہے۔ ایک ماں اپنے بچے کو دھوپ، سردی اور بارش سے بچانے کیلئے طرح طرح کے انتظامات کرتی ہے، لیکن فضا میں پھیلے ہوئے ان باریک ذرات سے اسے کیسے بچائے؟ وہ بچے کو کمرے میں بند کر سکتی ہے، کھڑکیاں دروازے بند کر سکتی ہے، مگر آلودگی کا مسئلہ صرف ایک گھر تک محدود نہیں رہتا۔ ہوا کسی ایک مکان کی حدود میں قید نہیں ہوتی۔

یہ بھی پڑھئے: بنگلہ دیش: شیخ حسینہ کے حامیوں کے ان کی وطن واپسی کے مطالبے کے بعد احتجاج

بے زبان مخلوق بھی متاثر ہوتی ہے

پٹاخوں کی تیز آواز سے جانور اور پرندے بھی اس شور سے خوفزدہ ہو جاتے ہیں۔ کتوں اور بلیوں کیلئے اچانک ہونے والے دھماکوں کی آواز انتہائی پریشان کن ہوتی ہے۔ پرندے خوف کے عالم میں اپنے گھونسلوں سے نکل جاتے ہیں۔ اس کے علاوہ پٹاخوں سے جلنے اور زخمی ہونے کے واقعات بھی سامنے آتے ہیں۔ بعض اوقات بچوں کی معمولی سی غفلت بڑے حادثے کا سبب بن جاتی ہے۔ ایسے واقعات میں صرف ایک فرد نہیں بلکہ پورا خاندان متاثر ہوتا ہے۔ ایک ماں کے لئے اپنے بچے کو زخمی حالت میں دیکھنے سے بڑا دکھ کیا ہو سکتا ہے؟ اس لئے والدین کو چاہئے کہ بچوں کی خوشیوں کے ساتھ ان کی حفاظت کو بھی مقدم رکھیں۔ انہیں پٹاخوں کے خطرات سے آگاہ کریں اور تہوار منانے کے محفوظ طریقے سکھائیں۔

تبدیلی کی شروعات گھر سے ہوسکتی ہے

خواتین معاشرے کی تعمیر میں بنیادی کردار ادا کرتی ہیں۔ وہ صرف گھر سنبھالنے والی نہیں بلکہ آنے والی نسلوں کی تربیت کرنے والی بھی ہیں۔ بچے اپنے والدین کے عمل سے زیادہ سیکھتے ہیں، نصیحتوں سے کم۔ اگر ہم خود ماحول کی حفاظت کا خیال رکھیں گے تو بچے بھی اسی عادت کو اپنائیں گے۔ گھر میں کچرا نہ جلانا، غیر ضروری پلاسٹک سے بچنا، پانی اور بجلی کا استعمال محتاط انداز میں کرنا، پودوں کی دیکھ بھال کرنا اور بچوں کو صفائی کی اہمیت سمجھانا ایسے چھوٹے اقدامات ہیں جن کے مثبت اثرات دور تک پہنچ سکتے ہیں۔ اس کے ساتھ حکومت اور انتظامیہ کی ذمہ داری بھی کم نہیں۔ ماحولیاتی قوانین پر مؤثر عمل درآمد، آلودگی کی مسلسل نگرانی، پٹاخوں کی فروخت اور استعمال کے ضابطوں پر عمل اور عوامی بیداری کے پروگرام ضروری ہیں۔ اسکولوں میں بھی بچوں کو ماحولیات کے تحفظ کی عملی تعلیم دی جانی چاہئے۔

بچوں کیلئے کیسی دنیا چھوڑ کر جائیں گے؟

ایک لمحے کیلئے تصور کیجئے کہ آنے والی نسلیں ہم سے سوال کریں کہ جب آپ کو معلوم تھا کہ ہوا آلودہ ہو رہی ہے، بچوں کی صحت متاثر ہو رہی ہے اور شہروں میں سانس لینا مشکل ہوتا جا رہا ہے، تب آپ نے ہمارے لئے کیا کیا؟ کیا ہمارے پاس اس سوال کا کوئی اطمینان بخش جواب ہوگا؟ ہم اپنی بیٹیوں اور بیٹوں کیلئے ایک بہتر دنیا کے خواب دیکھتے ہیں۔ چاہتے ہیں کہ وہ تعلیم حاصل کریں، ترقی کریں، خوشحال زندگی گزاریں اور ان کے خواب پورے ہوں۔ لیکن یہ سب اسی وقت ممکن ہے جب انہیں ایک صحتمند ماحول بھی میسر ہو۔ صاف ہوا، صاف پانی اور محفوظ فضا کسی عیش و آرام کی چیز نہیں بلکہ زندگی کی بنیادی ضرورتیں ہیں۔ ہمیں یہ سمجھنا ہوگا کہ بچوں کی حفاظت صرف گھر کی چار دیواری کے اندر نہیں ہوتی، اس کیلئے پورے معاشرے کو ذمہ دار بنانا پڑتا ہے۔ آخر میں بات صرف دیوالی کے پٹاخوں کی نہیں، ہماری اجتماعی سوچ اور ترجیحات کی ہے۔ ہمیں یہ فیصلہ کرنا ہے کہ ہم اپنے بچوں کو چند لمحوں کی چمک دینا چاہتے ہیں یا عمر بھر کے لئے صحتمند زندگی کا تحفہ؟