کِریمی چکن تکہ مسالہ ہانڈی بنانے کی آسان ترکیب ملاحظہ کیجئے۔

درکار اجزاء: چکن تکہ میرینیٹ کرنے کے لئے: چکن (بون لیس، کیوبز میں کٹا ہوا) ۵۰۰؍ گرام، دہی آدھا کپ، لال مرچ پاؤڈر ایک چھوٹا چمچہ، نمک آدھا چھوٹا چمچہ، گرم مسالہ پاؤڈر آدھا چھوٹا چمچہ، ہلدی ایک چوتھائی چھوٹا چمچہ، دھنیا پاؤڈر ایک چھوٹا چمچہ، لیموں کا رس ایک بڑا چمچہ، ادرک لہسن کا پیسٹ ایک بڑا چمچہ، تیل ۲؍ بڑے چمچے (تلنے کرنے کے لئے)، کوئلہ دھواں دینے کے لئے۔
گریوی (ہانڈی) کیلئے: تیل ۳؍ بڑے چمچے، پیاز ایک عدد (باریک کٹی ہوئی)، ٹماٹر ۲؍ عدد (بلینڈ کئے ہوئے)، ہری مرچ ۲؍ عدد (باریک کٹی ہوئی)، دہی آدھا کپ، کریم ایک چوتھائی کپ، مکھن ۲؍ بڑے چمچے، نمک حسبِ ذائقہ، لال مرچ پاؤڈر ایک چھوٹا چمچہ، ہلدی ایک چوتھائی چھوٹا چمچہ، دھنیا پاؤڈر ایک چھوٹا چمچہ، زیرہ آدھا چھوٹا چمچہ، گرم مسالہ آدھا چھوٹا چمچہ، کٹی ہوئی ہری مرچ اور ہرا دھنیا سجانے کیلئے۔
بنانے کا طریقہ:
چکن تکہ کیلئے: چکن کو ایک بڑے باؤل میں ڈالیں، اس میں دہی، لال مرچ، نمک، گرم مسالہ، ہلدی، دھنیا پاؤڈر، لیموں کا رس اور ادرک لہسن کا پیسٹ شامل کرکے اچھی طرح مکس کریں۔ چکن کو کم از کم ۳۰؍ منٹ کے لئے میرینیٹ ہونے دیں تاکہ مسالے چکن میں اچھی طرح جذب ہو جائیں۔ ایک فرائنگ پین میں تیل گرم کریں اور میرینیٹ شدہ چکن کو درمیانی آنچ پر سنہری اور گلنے تک فرائی کریں۔ دھواں دار ذائقہ دینے کے لئے، ایک جلے ہوئے کوئلے کے ٹکڑے پر تیل ڈالیں، چکن کے ساتھ پین میں رکھیں اور ڈھکن بند کرکے ۵؍ منٹ کے لئے چھوڑ دیں۔
ہانڈی (گریوی) کیلئے: ایک فرائنگ پین میں تیل گرم کریں اور اس میں زیرہ ڈال کر کڑکڑا لیں۔ پھر باریک کٹی ہوئی پیاز ڈال کر سنہری ہونے تک بھونیں، اس کے بعد ادرک لہسن کا پیسٹ شامل کریں اور مزید ایک سے ۲؍ منٹ پکائیں۔ اب بلینڈ کئے ہوئے ٹماٹر، نمک، لال مرچ، ہلدی، دھنیا پاؤڈر اور ہری مرچ ڈال کر ۵؍ سے ۷؍ منٹ تک بھونیں، جب تک کہ مسالہ تیل نہ چھوڑ دے۔ اب اس میں دہی شامل کریں اور مزید ۲؍ سے ۳؍ منٹ پکائیں تاکہ گریوی گاڑھی ہو جائے۔ اب فرائی کی ہوئی چکن تکہ شامل کریں اور ہلکی آنچ پر ۵؍ منٹ تک دَم پر رکھیں تاکہ چکن مسالے میں اچھی طرح مکس ہو جائے۔ آخر میں کریم، مکھن اور گرم مسالہ شامل کرکے مزید ۲؍ منٹ پکائیں تاکہ مزیدار کریمی ٹیکسچر آئے۔ اب ہری مرچ اور ہرا دھنیا چھڑک دیں۔ گرم گرم چکن تکہ مسالہ ہانڈی نان، تندوری روٹی یا زعفرانی چاول کے ساتھ پیش کریں اور مزے لیں!