لکھنوی کباب بنانے کی آسان ترکیب ملاحظہ کیجئے۔

درکار اجزاء: قیمہ آدھا کلو، پپیتےکا پیسٹ ایک بڑا چمچہ، تیل تلنے کے لئے، پیاز ایک عدد(باریک کٹی ہوئی)، ادرک لہسن کا پیسٹ ایک بڑا چمچہ، دہی ایک چوتھائی کپ، زیرہ ایک چھوٹا چمچہ (کٹا ہوا)، کھوپرا ۲؍ بڑے چمچے، خشخاش ایک بڑا چمچہ،پسا ہوا گرم مسالہ ایک چھوٹا چمچہ، پسی ہوئی جائفل جاوتری آدھا چھوٹا چمچہ، پسی ہوئی دارچینی ایک چوتھائی چھوٹا چمچہ، لال مرچ ایک چھوٹا چمچہ، نمک حسب ِ ذائقہ، بیسن ۴؍ سے ۵؍ بڑے چمچے، ہرا دھنیا ایک چوتھائی گڈی (کٹا ہوا)، کوئلہ ایک عدد، لیموں کا رس حسب ِ منشا۔
بنانے کا طریقہ: سب سے پہلے پیالے میں قیمہ کو ایک بڑا چمچہ پپیتے کا پیسٹ لگا کر ایک طرف رکھ دیں۔ اب کڑاہی میں تھوڑا سا تیل گرم کرکے پیاز کو شامل کرکے تھوڑا سا پکائیں۔ جب رنگ تبدیل ہونے لگے تو ادرک لہسن کا پیسٹ شامل کرکے تھوڑا سا پکائیں۔ پھر اس میں قیمہ شامل کرکے اچھی طرح بھون لیں یہاں تک کہ اس کا تمام پانی خشک ہو جائے۔ پھر اس میں دہی، زیرہ، کھوپرا، خشخاش، پسا گرم مسالہ، پسی ہوئی جائفل جاوتری، پسی ہوئی لال مرچ، پسی ہوئی دارچینی اور نمک شامل کرکے خوب اچھی طرح پکائیں۔ جب پانی خشک ہو جائے تو اسے چوپر میں بیسن کے ساتھ باریک پیس لیں۔ اب اسے پیالے میں نکال کر انگلی کے سائز کے کباب بنائیں اور تیل میں ڈیپ فرائی کر لیں۔ ہلکا سنہرا رنگ آنے پر نکالیں اور ایک کڑاہی میں رکھیں۔ اب کوئلے کو دہکا کر المونیم کے ٹکڑے پر رکھ کر کڑاہی میں رکھیں۔ کوئلے پر تھوڑا سا تیل ڈال کر ڈھکن فوراً بند کر دیں۔ ۲؍ سے ۳؍ منٹ بعد کوئلہ ہٹا کر تھوڑا سا ہرا دھنیا اور لیموں کا رس چھڑک کر گرم گرم پیش کریں۔ ذائقہ دار لکھنوی کباب کو پراٹھوں کے ساتھ نوش فرمائیں۔