میکسیکن رائس وتھ چیز پیٹیز بنانے کی آسان ترکیب ملاحظہ کیجئے۔

درکار اجزاء: چاول ڈھائی کپ، تیل ۲؍ بڑے چمچے، ادرک لہسن کا پیسٹ ایک بڑا چمچہ، گاجر ایک عدد (باریک کٹی ہوئی)، شملہ مرچ ۲؍ عدد (باریک کٹی ہوئی)، لال مرچ ایک چھوٹا چمچہ (کُٹی ہوئی)، ہری مرچ ۴؍ عدد (کچلی ہوئی)، نمک حسب ِ ذائقہ۔
چیز پیٹیز کے لئے: آلو ۲؍ عدد (اُبلے ہوئے)، کاٹیج چیز دو پیکٹ، میدہ ایک بڑا چمچہ، نمک اور لال مرچ حسب ِ ذائقہ، ہری مرچ ۶؍ عدد (کچلی ہوئی)، کُٹی ہوئی کالی مرچ ایک چھوٹا چمچہ، انڈے کی سفیدی ۲؍ عدد، ہرا دھنیا ایک گٹھی (باریک کٹا ہوا)، تیل تلنے کے لئے۔
گریوی کے لئے: تیل ایک چھوٹا چمچہ، ٹماٹر کا پیسٹ ۳؍ بڑے چمچے، پیاز ایک عدد (کچی پسی ہوئی)، لال مرچ ایک چھوٹا چمچہ (کُٹی ہوئی)، نمک حسب ِذائقہ، اجوائن ایک چٹکی، براؤن شوگر ایک چھوٹا چمچہ۔
بنانے کا طریقہ: چاول دو کنی اُبال لیں اور پانی نتھار کر دم پر لگا دیں۔ پھر کڑاہی میں تیل گرم کرکے ادرک لہسن کا پیسٹ ڈال کر ہلکا سا بھون لیں۔ اس کے بعد گاجر اور شملہ مرچ ڈال کر ہلکا سا بھون لیں۔ لال مرچ اور ہری مرچ ڈال کر ہلکا سا بھون لیں۔ پھر چاول اور نمک ڈال کر اسٹر فرائی کریں اور کڑاہی میں رہنے دیں۔ اب آلوؤں میں کاٹیج چیز میش کرکے اچھی طرح ملائیں۔ میدہ، نمک، لال مرچ، ہری مرچ، ہرا دھنیا اور کالی مرچ ڈال کر مکس کریں۔ اب اس کے گول گول کباب بنائیں اور انڈے کی سفیدی میں ڈپ کرکے تیل میں ڈیپ فرائی کریں اور گولڈن براؤن کرکے نکال لیں۔ گریوی کے لئے دوسری کڑاہی میں تیل گرم کرکے اس میں ٹماٹر کا پیسٹ ڈال دیں۔ ساتھ ہی پیاز، لال مرچ، نمک، اجوائن اور براؤن شوگر ڈال کر ہلکا سا بھونیں اور اتار لیں۔ اب ایک بڑی اور پھیلی ہوئی بیکنگ ڈش میں ذرا سی چکنائی لگا کر چاول ڈالیں پھر تلے ہوئے چیز پیٹیز رکھیں۔ اس کے بعد اوپر ٹماٹو گریوی ڈال کر پانچ سے دس منٹ تک بیک کر لیں۔ گرم گرم پیش کریں۔