رائس وِتھ چکن تکہ بنانے کی آسان ترکیب ملاحظہ کیجئے۔

درکار اجزاء: مرغی ایک کلو، چاول آدھا کلو، پیاز ۲؍ عدد، شملہ مرچ ۲؍ عدد، ٹماٹر ۳؍ عدد، لال اور کالی مرچ ایک، ایک چھوٹا چمچہ، نمک حسب ِ ذائقہ، ووسٹر سوس ایک بڑا چمچہ، مسٹرڈ پاؤڈر آدھا چھوٹا چمچہ، تیل حسب ِ ضرورت۔
بنانے کا طریقہ: سب سے پہلے مرغی پر نمک، مرچ، ووسٹر سوس، مسٹرڈ پاؤڈر لگا کر اسے چار پانچ گھنٹے کے لئے میرینیٹ ہونے کے لئے رکھ دیں۔ اب پیاز کو چوکور کاٹ لیں۔ ٹماٹر اور شملہ مرچ بھی چوکور کاٹ لیں۔ اس کے بعد باریک سیخیں لیں۔ ہر سیخ پر پہلے چکن کا ٹکڑا پھر پیاز، پھر ٹماٹر اور پھر شملہ مرچ کا ٹکڑا لگائیں۔ پھر دوبارہ اس ترتیب سے لگائیں یعنی ہر سیخ پر دو دو ٹکڑے لگیں گے۔ بوٹیوں سے علاحدہ کردہ ہڈیوں کی یخنی تیار کرلیں اور یہ یخنی ڈال کر چاول کا پلاؤ تیار کریں۔ اب کسی برتن میں ڈیپ فرائی کے لئے تیل گرم کریں اور سیخوں کو اس میں فرائی کر لیں۔ چاول کو ایک ڈش میں گول شکل میں نکال لیں۔ ان کے اوپر فرائی سیخیں رکھ دیں اور گرم گرم پیش کریں۔ یہ بہت مزیدار اور ذائقہ دار ہوتا ہے۔