ہینلی پاسپورٹ انڈیکس میں  ہندوستان ۷۷؍ویں مقام پر،کمزور ترین پاسپورٹس میں پاکستان کا چوتھا مقام۔

دنیا بھر کے طاقتور ترین پاسپورٹس کی فہرست میں۲۰۲۵ء کی دوسری ششماہی  میں ٹاپ ۳؍ میں ۳؍ایشیائی ممالک (سنگاپور،جنوبی کوریا اور جاپان)کے پاسپورٹ مضبوط ترین قرار دئیے گئے ہیں۔اس دوڑ میں ہندوستان کا پاسپورٹ۷۷؍ویں مقام پر ہے جبکہ اس کا پڑوسی ملک پاکستان نچلے نمبروں پر موجود ہے۔ ہینلے اینڈ پارٹنرز کی جولائی سے دسمبر۲۰۲۵ء کے لیے جاری کی گئی فہرست میں ایشیائی ملک سنگاپور کے پاسپورٹ کو ایک بار پھر طاقتور ترین قرار دیا گیا ہے۔۲۲؍ جولائی کو جاری  کردہ فہرست میں بتایا گیا کہ سنگاپور کے پاسپورٹ رکھنے والے افراد۱۹۳؍ ممالک میں ویزا کے بغیر سفر کرسکتے ہیں۔ دوسرے نمبر پر بھی مشترکہ طور پر ۲؍ ایشیائی ممالک جاپان اور جنوبی کوریا  موجود ہیں جن کے حامل افراد کو۱۹۰؍ ممالک میں ویزا فری رسائی حاصل ہوجاتی ہے۔ تیسرا نمبر مشترکہ طور پر۶؍ ممالک کے نام رہا جن کے پاسپورٹس پر۱۸۹؍ ممالک میں ویزا فری سہولت موجود ہے۔ یہ ممالک ڈنمارک، فن لینڈ، فرانس، جرمنی، آئرلینڈ، اٹلی اور اسپین ہیں۔ بلجیم، آسٹریا، لگسمبرگ، ناروے، پرتگال اور سویڈن کے حصے میں چوتھا نمبر آیا اور ان ممالک کے پاسپورٹس سے۱۸۸؍ ممالک میں ویزا فری رسائی مل سکتی ہے۔۱۸۷؍ ممالک میں ویزا فری داخلے کے ساتھ یونان، نیوزی لینڈ اور سوئٹزر لینڈ کے پاسپورٹس مشترکہ طور پر۵؍ ویں نمبر پر رہے۔
 اس فہرست میں سفر کی آسانی پر توجہ مرکوز کرکے ممالک کی درجہ بندی کی جاتی ہے اور امریکی پاسپورٹ۱۰؍ ویں نمبر پر پہنچ گیا ہے، جو کسی زمانے میں دنیا کا طاقتور ترین پاسپورٹ سمجھا جاتا تھا۔ کمپنی کی جانب سے جاری بیان میں بتایا گیا کہ امریکہ ٹاپ۱۰؍ سے باہر نکلنے کے قریب ہے اور ایسا اس انڈیکس کی۲۰؍ سالہ تاریخ میں پہلی بار ہوگا۔ کمپنی کے مطابق متحدہ عرب امارات کا پاسپورٹ گزشتہ ایک دہائی میں تیزی سے اوپر آنیوالا پاسپورٹ ہے۔ اس کی رینکنگ میں ایک دہائی کے دوران۳۴؍ درجے بہتری آئی اور اب یہ۸؍ ویں نمبر پر ہے۔ اسی طرح چین کی رینکنگ میں بھی۱۰؍ سال کے دوران۳۴؍ درجے کی بہتری آئی ہے اور وہ ابھی ۶۰؍ ویں نمبر پر ہے۔ پاکستان کمزور ترین پاسپورٹ رکھنے والا چوتھا ملک قرار پایا ہے۔ مجموعی طور پر پاکستانی پاسپورٹ کے حصے میں صومالیہ اور یمن کے ساتھ مشترکہ طور پر۹۶؍ واں نمبر آیا اور اس پر۳۲؍ ممالک میں ویزا فری داخلہ ممکن ہے۔ پاکستان سے نیچے عراق (۹۷)، شام (۹۸) اور افغانستان (۹۹)  رہے۔ پاکستان سے اوپر نیپال اور لیبیا۹۵؍ ویں، فلسطین، اریٹیریا اور بنگلہ دیش۹۴؍ ویں، شمالی کوریا۹۳؍ ویں، سوڈان ۹۲؍ ویں، سری لنکا اور ایران۹۱؍ ویں نمبر پر موجود ہیں۔