شدید دھوپ میں مسافروں کو ٹرین کا انتظار کرنا پڑتا ہے،ریلوے انتظامیہ کی جلد شیڈ لگانے کی یقین دہانی۔

سینٹرل ریلوے کے انتہائی بھیڑ بھاڑ والے ریلوے اسٹیشنوںمیں شمار کئے جانے والے ڈومبیولی ریلوے اسٹیشن کے پلیٹ فارم نمبر ۵ ؍کے ایک بڑے حصہ پر پچھلے ۴ ؍سال سے چھت نہیں ہے۔ سخت گرمی میں پلیٹ فارم پر شیڈ نہ ہونے کی وجہ سے مسافروں کو شدید دھوپ میں کھڑے رہنا پڑ رہا ہے۔
تقریبا ۴؍ سال قبل ۱۵؍ ڈبے کی لوکل ٹرین کے ٹھہرنے کیلئے سی ایس ایم ٹی کی جانب سے پلیٹ فارم نمبر ۵؍ کی توسیع کی گئی تھی۔ممبئی جانے والی ۱۵؍ ڈبے کی لوکل ٹرین کے ۳؍ ڈبے پلیٹ فارم نمبر ۵ ؍کے توسیع شدہ حصے پر ٹھہرتے ہیں۔ ریلوے انتظامیہ نے پلیٹ فارم کی توسیع تو کردی۔ تاہم، طویل عرصہ کے باوجودچھت کا انتظام نہیں کیا گیا۔
یہی وجہ ہے کہ مسافروں کو گرمی اور بارش میں سخت دقتوں کا سامنا کرنا پڑتا ہے۔ گرمی میں پلیٹ فارم پر چھت نہیں   ہونے سے مسافروں کو تپتی دھوپ میں کھڑے ہوکر ٹرین کا انتظار کرنا پڑتا ہے۔ اس ضمن میں ریلوے کے ایک افسر نے نام ظاہر نہ کرنے کی شرط پر بتایا کہ ڈومبیولی ریلوے اسٹیشن کے پلیٹ فارم نمبر۵ ؍کے توسیع شدہ حصہ پر چھت کی تنصیب کیلئے اعلی حکام کو تجویز روانہ کی گئی ہے۔تجویز منظور ہوتے ہی چھت کا کام شروع کیا جائے گا۔