ویسٹرن اور سینٹرل ریلوے نے تہوار کے دوران بھیڑ کے پیش نظر پلیٹ فارم ٹکٹ کی فروخت پر وقتی پابندی عائد کردی۔

دیوالی کی تعطیلات اور آنے والی چھٹھ پوجا کے دوران کثرت سے مسافروں کی آمد و رفت کے پیش نظر ویسٹرن ریلوے کے ممبئی ڈویژن نے ۶؍ بڑے اسٹیشنوں  باندرہ ٹرمنس، واپی، ولساڈ، ادھنا، سورت اور بھستان پر پلیٹ فارم ٹکٹوں کی فروخت پر ۱۵؍نومبر ۲۰۲۶ءتک عارضی پابندی عائد کرنے کا فیصلہ کیا ہے۔ 

اسی طرح سینٹرل ریلوے میں ۵؍ اسٹیشنوں سی ایس ایم ٹی، دادر، ایل ٹی ٹی، تھانے اور کلیان اسٹیشنوںپر بھی پابندی لگادی گئی ہے۔ اسی کے ساتھ یہ بھی کہا گیا ہے کہ ریلوے احاطے، آپریشنل کارکردگی کو برقرار رکھیں اور صحیح ٹکٹ رکھنے والے مسافروں کے لئے ٹرینوں کی حفاظت اورانہیں آسانی سے سوار ہونے اور اترنے کو یقینی بنائیں۔

یہ بھی پڑھئے: ہائی کورٹ کے حکم کے باوجود بی ایم سی نے اب تک دیا مرزا کا ویڈیو دوبارہ اَپ لوڈ نہیں کیا

اس تعلق سے ویسٹرن ریلوے کے چیف پی آر او ونیت ابھیشیک کے مطابق، تہوار کے موسم میں مسافروں کا بہت زیادہ رش دیکھا جاتا ہے۔ اس  دوران، پلیٹ فارمز پر ان کے ساتھ مسافروں کی موجودگی، جو خود سفر نہیں کر رہے ہیں، بھیڑ میں نمایاں اضافہ کرتے ہیں۔ نظم و نسق برقرار رکھنے اور ہجوم کی ہموار نقل و حرکت کو یقینی بنانے کے لئے، ان شناخت شدہ اسٹیشنوں پر پلیٹ فارم ٹکٹوں کے اجراء کو عارضی طور پر معطل کرکے پلیٹ فارم کے علاقوں میں داخلے کو کنٹرول کیا گیا ہے۔ البتہ بزرگ شہری، طبی مسائل سے دوچار  مسافر، حاملہ خواتین اور معذور مسافروں کو ان پابندیوں سے مستثنیٰ رکھا گیا ہے تاکہ سفر کے دوران تکلیف سے بچا جا سکے۔

سینٹرل اورویسٹرن ریلوے انتظامیہ کی جانب سے یہ بھی کہا گیا کہ تمام مسافروں اور ریل صارفین سے اپیل کی جاتی ہے کہ وہ پلیٹ فارم علاقے میں غیر ضروری موجودگی سے گریز کریں اور اپنا مکمل تعاون کریں۔ اس سے ریلوے انتظامیہ کو تہوار کے موسم میں سب کے لئے محفوظ اور پریشانی سے پاک سفر کو یقینی بنانے میں مدد ملے گی۔