لدھیانہ میں مظاہرین نے کشیپ کی تصویر پر جوتے پھینکے اور جوتوں کا ہار پہنایا اور ان کے خلاف سخت کارروائی کا مطالبہ کیا۔

لدھیانہ پولیس نے ایک ٹی وی پروگرام کے دوران والمیکی برادری کے جذبات کو مبینہ طور پر ٹھیس پہنچانے کے الزام میں مشہور ہندی نیوز چینل ’آج تک‘ کی اینکر انجنا اوم کشیپ، انڈیا ٹوڈے گروپ کے چیئرمین ارون پوری اور لِونگ میڈیا انڈیا لمیٹڈ کے خلاف ایف آئی آر درج کی ہے۔ ’بھارتیہ والمیکی دھرم سماج‘ کی جانب سے دائر کی گئی شکایت میں کشیپ پر ایک شو کے دوران مہارشی والمیکی کے بارے میں توہین آمیز تبصرے کرنے کا الزام لگایا گیا ہے جو ’آج تک‘ پر نشر کیا گیا اور اس کے سوشل میڈیا پلیٹ فارمز پر بھی شیئر کیا گیا۔ 

’بھارتیہ والمیکی دھرم سماج‘ کے لیڈر چودھری یش پال اور وجے دانو، جو پنجاب دلت وکاس بورڈ کے سربراہ بھی ہیں، نے کہا کہ ان تبصروں نے ”ملک بھر کی پوری والمیکی برادری کے جذبات کو ٹھیس پہنچائی ہے۔“ گروپ نے ان تبصروں کو ”انتہائی توہین آمیز“ قرار دیا اور کشیپ کی فوری گرفتاری اور عوامی معافی کا مطالبہ کیا۔ 

یہ بھی پڑھئے: مسلم آبادی سے متعلق امیت شاہ کے بیان پر ہنگامہ، نفرت کی آگ بھڑکانے کا الزام

پولیس نے بتایا کہ اس نے آئی پی سی کی دفعہ ۲۹۵ الف اور ایس سی/ایس ٹی (مظالم کی روک تھام) ایکٹ کی دفعہ ۳(۱)(v) کے تحت ایف آئی آر درج کی ہے، جو مذہبی جذبات کو بھڑکانے کے ارادے سے کئے گئے کاموں سے متعلق ہے۔ انسپکٹر گگن پریت سنگھ نے کہا کہ ضابطہ کے مطابق، ڈی ایس پی رینک کا ایک افسر اس معاملے کی تحقیقات کرے گا۔ لدھیانہ کے پولیس کمشنر سوپن شرما نے تصدیق کی کہ یہ ایف آئی آر، قانونی جائزے کے بعد درج کی گئی تھی۔ انہوں نے مزید بتایا کہ ”کم از کم ۱۳ دلت اور ایس سی تنظیموں“ نے شو کے انداز پر اعتراضات درج کرائے ہیں۔ انجنا اوم کشیپ اور ٹی وی ٹوڈے نیٹ ورک لمیٹڈ نےان الزامات کو ”بے بنیاد“ قرار دیا اور دعویٰ کیا کہ آن لائن گردش کرنے والے کلپس ”منتخب طور پر ترمیم شدہ اور گمراہ کن“ ہیں۔

अंजना ओम कश्यप पर लुधियाना, पंजाब में FIR दर्ज की गई, टीवी डिबेट के दौरान भगवान वाल्मीकि के अपमान का आरोप।

वाल्मीकि समाज में भारी आक्रोश,
लोगों ने विरोध प्रदर्शन में उनके पोस्टर पर जूते से स्वागत कर जताया गुस्सा। 💥#BiharElections2025 #AnjanaOmKashyap pic.twitter.com/c0TFm2iINU

— Adv. Vijay Singh (@VijaySingh_law) October 11, 2025

دریں اثنا، لدھیانہ میں احتجاجی مظاہرے پھوٹ پڑے، جہاں مظاہرین نے کشیپ کی تصویر پر جوتے پھینکے اور جوتوں کا ہار پہنایا۔ اور ان کے خلاف سخت کارروائی کا مطالبہ کیا۔ یاد رہے کہ ستمبر کے شروع میں، لکھنؤ کی ایک عدالت نے بھی آج تک کے ایک ایپی سوڈ پر کشیپ کے خلاف فرقہ وارانہ کشیدگی کو فروغ دینے کے الزام میں شکایت درج کرنے کی ہدایت دی تھی۔