سہولت کے ذریعے کمپنیاں اپنی آؤٹ گوئنگ کالز کے دوران صارفین کے موبائل اسکرین پر اپنا برانڈ نام ظاہر کر سکیں گی جس سے صارفین کو فائدہ ہوگا۔

ایئرٹیل بزنس نے پیرکو `بزنس نیم ڈسپلے  (بی این ڈی) سروس شروع کرنے کا اعلان کیا۔ نئی ٹیکنالوجی پر مبنی سروس انڈسٹری میں یہ اپنی نوعیت کی پہلی سہولت ہے، جس کا مقصد کمپنیوں اور صارفین کے درمیان ہونے والی بات چیت کو زیادہ قابل اعتماد اور موثر بنانا ہے۔
 نئی دہلی میں جاری کردہ ایک بیان میں کمپنی نے کہا کہ اس کے ذریعے کمپنیاں اپنی آؤٹ گوئنگ کالز کے دوران صارفین کے موبائل اسکرین پر اپنا برانڈ نام ظاہر کر سکیں گی، جس سے صارفین کو قابل اعتماد کاروباری کالز اور اسپیم کالز میں آسانی سے فرق کرنے میں مدد ملے گی۔
 ایئرٹیل نے اپنے صارفین کو اسپیم کالز سے راحت  فراہم کرنے کیلئے ہندوستان کا پہلا اینٹی اسپیم نیٹ ورک شروع کیا ہے۔ اس اقدام کے بارے میں ایک بڑی ملک گیر بیداری مہم کے ذریعے صارفین تک پہنچایا گیا، تاکہ وہ اس مسئلے کو بہتر طریقے سے سمجھ سکیں اور چوکنا رہ سکیں۔ جہاں اس اقدام کی وجہ سے لوگ اسپیم کالز کے بارے میں زیادہ باخبر ہوئے اور انہوں نے نامعلوم یا اسپیم کالز کو نظر انداز کرنا شروع کردیا، وہیں اس کا غیر ارادی اثر یہ ہوا کہ بہت سے برانڈس کی کالز کو بھی اسپیم کے طور پر ٹیگ کیا گیا۔ اس کی وجہ سے  صارفین اکثر بینکوں کی اہم کالز، کھانے کی ترسیل، کوریئر سروسیز، یا یہاں تک کہ ڈاکٹر کی ضروری اپائنٹمنٹ کو مس کردیتے ہیں۔ `بزنس نیم ڈسپلے اس مسئلے کا ایک محفوظ حل ہے۔ یہ سروس صارفین کو ہر آنے والی کال میں کمپنی کا نام ظاہر کر کے واضح معلومات فراہم کرتی ہے، جس سے وہ سمجھ کر فیصلہ کر سکتے ہیں۔ یہ کمپنیوں کو اپنی بہتر شناخت کرنے کی اجازت دیتی ہے اور صارفین فریب دہی سے محفوظ رہتے ہیں۔
 ایئرٹیل بزنس  کے  ڈائریکٹر اور سی ای او شرت سنہا نے کہاکہ ’’ایئرٹیل میں، ہم مسلسل ایک مواصلاتی تجربہ فراہم کرنے کی کوشش کرتے ہیں جو اسمارٹ، محفوظ اور شفاف ہو۔‘‘