سپریم کورٹ  کے جج سے جانچ کا مطالبہ کیا، کہا کہ’’مختار کی غلط شبیہ پیش کی گئی‘‘۔

 ایم آئی ایم کے صدر اسدالدین اویسی کے بعد سماجوادی پارٹی کے سربراہ اکھلیش یادونے اتوار کوغازی پور پہنچ کرمختارانصاری کوخراج عقیدت پیش کیا اور ان کے اہل خاندان سے تعزیت کا اظہارکیا۔ انہوں نے مختارانصاری کی پر اسرارموت کی جانچ سپریم کورٹ کے موجودہ جج سے کرانے کا مطالبہ کیا اور کہا کہ مختارانصاری کی جو شبیہ پیش کی گئی وہ دراصل ویسے نہیں تھے۔ ان کی عوامی مقبولیت اور انتخابات میں باربارکامیابی اسکی واضح مثال ہے۔ 
غازی پور پہنچنے پر اکھلیش یاود نے کہا کہ ’’اگر کوئی شخص اتنے سالوں سے جیل میں ہو اور پھر بھی عوام اسے جتا رہی ہو، تو اس کا مطلب ہے کہ اس شخص نے عوام کے درمیان رہ کر ان کا دکھ درد بانٹاہے۔ ‘‘اکھلیش یادو نے یہ بھی کہا کہ مختار انصاری کی `جو شبیہ پیش کی گئی وہ حقیقی نہیں ہے۔ ان کے انتقال پر لوگوں کی اتنی بڑی تعداد جمع ہو گئی یہ بھی اس کی واضح دلیل ہے۔ 
سماجوادی سربراہ نے مختارانصاری کی موت کی جانچ سپریم کورٹ کے موجودہ جج سے کروا نے کا مطالبہ کیا اور کہاکہ حکومت پر کسی کو بھروسہ نہیں ہے۔ حراست میں ہونے والی اموات میں اتر پردیش سب سے آگے ہے۔ مختار کی موت کے کیس کی سپریم کورٹ کے جج سے تحقیقات کر کے ہی انصاف ممکن ہے۔ غازی پور ضلع کے محمد آباد میں سابق ایم ایل اے مرحوم مختار انصاری کی رہائش گاہ `’پھاٹک‘ پہنچ کراکھلیش یادو نے مختار انصاری کے بھائی اورغازی پور کے ایم پی افضال انصاری، بیٹے عمر انصاری، بھتیجے صہیب انصاری اور خاندان کے دیگر افراد سے ملاقات کی اور تعزیت کا اظہار کیا۔ اس موقع پر سماجوادی پارٹی کے دیگر لیڈر بھی موجود تھے۔