الجزائر کے دارالحکومت الجزائر کے علاقے محمدیہ میں واقع ایک یتیم خانے میں جمعرات کی صبح خوفناک آتشزدگی کے نتیجے میں کم از کم ۱۱؍ افراد ہلاک اور ۱۹؍ زخمی ہوگئے۔ الجزائر کے جنرل ڈائریکٹوریٹ آف سول پروٹیکشن کے مطابق زخمیوں میں متعدد افراد جھلس گئے جبکہ بعض کو سانس لینے میں دشواری اور شدید صدمے کی کیفیت کا سامنا ہے۔ امدادی ٹیموں نے خصوصی ضروریات رکھنے والے پانچ افراد کو بحفاظت نکال لیا ہے۔ فائربریگیڈ کی متعدد ٹیمیں اب بھی آگ بجھانے اور ریسکیو کارروائیوں میں مصروف ہیں جبکہ حکام نے ہلاکتوں اور زخمیوں کے اعداد و شمار کو ابتدائی قرار دیا ہے۔

الجزائر کے دارالحکومت الجزائر (Algiers) کے علاقے محمدیہ میں واقع ایک یتیم خانے میں جمعرات کی علی الصباح لگنے والی خوفناک آگ نے بڑے انسانی سانحے کی صورت اختیار کرلی۔ الجزائر کے جنرل ڈائریکٹوریٹ آف سول پروٹیکشن نے تصدیق کی ہے کہ اس حادثے میں کم از کم ۱۱؍ افراد جاں بحق جبکہ ۱۹؍  افراد زخمی ہوئے ہیں۔ تاہم حکام کا کہنا ہے کہ یہ اعداد و شمار ابتدائی ہیں اور ریسکیو آپریشن مکمل ہونے کے بعد ان میں تبدیلی آسکتی ہے۔ سرکاری بیان کے مطابق زخمی ہونے والوں میں ۱۰؍ افراد مختلف درجے کے جھلساؤ کا شکار ہوئے ہیں، ۲؍ افراد کو دھوئیں کے باعث سانس لینے میں دشواری پیش آئی، جبکہ ۷؍ افراد شدید صدمے کی حالت میں پائے گئے جنہیں فوری طبی امداد فراہم کی گئی۔ امدادی اہلکاروں نے یتیم خانے میں موجود خصوصی ضروریات رکھنے والے پانچ افراد کو بحفاظت نکال کر محفوظ مقام پر منتقل کردیا۔ 

یہ بھی پڑھئے: ظہران ممدانی کا امیروں پر ٹیکس کا منصوبہ، امیر نیویارک چھوڑ رہے ہیں: رپورٹ

حادثے کے فوراً بعد سول پروٹیکشن، فائر بریگیڈ اور طبی امدادی اداروں نے بڑے پیمانے پر ریسکیو کارروائی شروع کردی۔ حکام کے مطابق آگ پر قابو پانے اور متاثرین کو نکالنے کے لیے ۱۰؍ فائر انجن، ۱۶؍ ایمبولینس، دو ایریل لیڈر ٹرک، دشوار گزار علاقوں میں کام کرنے والی خصوصی ریسکیو یونٹ اور نیشنل ٹریننگ اینڈ انٹروینشن یونٹ کی اضافی نفری کو بھی جائے وقوع پر تعینات کیا گیا۔ فائرفائٹرز کئی گھنٹوں سے آگ بجھانے اور عمارت کے ہر حصے کی تلاشی لینے میں مصروف ہیں تاکہ کسی بھی ممکنہ متاثرہ شخص کو بروقت بچایا جاسکے۔ ابتدائی اطلاعات کے مطابق آگ جمعرات کی صبح اچانک بھڑکی، تاہم اس کے اسباب کے بارے میں ابھی تک کوئی سرکاری وضاحت سامنے نہیں آئی۔ تفتیشی اداروں نے واقعے کی مکمل تحقیقات شروع کردی ہیں اور آگ لگنے کی اصل وجہ کا تعین کرنے کے لیے شواہد جمع کیے جارہے ہیں۔ حکام نے کہا ہے کہ تحقیقات مکمل ہونے تک کسی بھی امکان کو مسترد نہیں کیا جاسکتا۔ 

یہ بھی پڑھئے: برطانیہ: میونسپل اراضی پر قائم مندر، ہندو کمیونٹی سینٹر کی نیلامی پر تنازع

یہ افسوسناک واقعہ ایسے وقت پیش آیا ہے جب الجزائر حالیہ دنوں شدید گرمی کی لہر اور مختلف علاقوں میں لگنے والی جنگلاتی آگ سے بھی نبرد آزما ہے۔ اگرچہ محمدیہ کے یتیم خانے میں پیش آنے والے اس حادثے کا جنگلاتی آگ سے براہِ راست کوئی تعلق ظاہر نہیں کیا گیا، تاہم ملک بھر میں ہنگامی خدمات پہلے ہی غیرمعمولی دباؤ کا سامنا کررہی ہیں۔ سوشل میڈیا پلیٹ فارمز پر واقعے کے بعد افسوس اور غم کا اظہار کیا جارہا ہے۔ شہری متاثرہ بچوں اور عملے کے لیے دعائیں کر رہے ہیں اور ریسکیو اہلکاروں کی کوششوں کو سراہ رہے ہیں۔ الجزائر کی سول پروٹیکشن نے عوام سے اپیل کی ہے کہ وہ متاثرہ مقام کے اطراف غیرضروری ہجوم سے گریز کریں تاکہ امدادی کارروائیوں میں کسی قسم کی رکاوٹ نہ آئے۔