ادائیگی سہولت پلیٹ فارم امیزون پے نے ہندوستان میں اپنی خدمات کو وسعت دیتے ہوئے منگل کو فکسڈ ڈپازٹ سہولت کے آغاز کا اعلان کیا۔ صارفین امیزون پے پر صرف ایک ہزار روپے سے فکسڈ ڈپازٹ اکاؤنٹ کھول سکتے ہیں۔

ادائیگی سہولت پلیٹ فارم امیزون پے نے ہندوستان میں اپنی خدمات کو وسعت دیتے ہوئے منگل کو فکسڈ ڈپازٹ سہولت کے آغاز کا اعلان کیا۔  امیزون پے نے ایک پریس ریلیز میں بتایا کہ اس نے اس کے لیے دو بڑی غیر بینکاری مالیاتی کمپنیوں (این بی ایف سی) شری رام فائنانس اور بجاج فائنانس کے ساتھ ساتھ پانچ بینکوں - شوالک اسمال فائنانس بینک، سوریہ دے اسمال فائنانس بینک، ساؤتھ انڈین بینک، سلائس اور اتکرش اسمال فائنانس بینک کے ساتھ اسٹریٹجک شراکت داری کی ہے۔ 
ریلیز میں کہا گیا ہے کہ صارفین امیزون پے پر صرف  ایک ہزار روپے سے فکسڈ ڈپازٹ اکاؤنٹ کھول سکتے ہیں۔ اس کے لیے انہیں متعلقہ بینک میں بچت کھاتہ کھولنے کی ضرورت بھی نہیں ہوگی۔ شراکت دار ادارے سالانہ ۸؍ فیصد تک سود کی پیشکش کر رہے ہیں۔ تمام شراکت دار بزرگ شہریوں کو اضافی ۵ء۰؍ فیصد سود فراہم کرتے ہیں۔ شری رام فائنانس خواتین سرمایہ کاروں کو بھی ۵ء۰؍ فیصد تک اضافی سود کی پیشکش کر رہا ہے۔ 

یہ بھی پڑھئے:جاوید جعفری کی فلم ’’مایا سبھا‘‘۳۰؍ جنوری کو ریلیز ہوگی

امیزون پے کے چیف ایگزیکٹیو آفیسر وکاس بنسل نے کہاکہ ’’ہندوستان میں یقینی آمدنی والی کمپنی کافی مقبول ہیں کیونکہ ان کی ساخت سادہ ہوتی ہے، منافع یقینی ہوتا ہے اور خطرہ کم ہوتا ہے۔ نئے سال کے آغاز میں ہم صارفین کے لیے اختیارات کو بڑھا رہے ہیں اور انہیں اپنی بچت پر بہتر منافع حاصل کرنے میں مدد کر رہے ہیں تاکہ وہ ۲۰۲۶ء کے اپنے مالیاتی اہداف کے لیے مضبوط بنیاد بنا سکیں۔‘‘ 

یہ بھی پڑھئے:پڈیکل نے ۶۰۰؍ رن بنا کر وجے ہزارے میں تاریخ رقم کر دی

امیزون پے پہلے ہی یو پی آئی ادائیگی، قرض کی سہولت، بل ادائیگی، سفر کی بکنگ جیسی خدمات فراہم کرتا ہے۔ اب سرمایہ کاری کی مصنوعات بھی اس میں شامل ہوگئی ہیں۔ شراکت دار بینکوں کے ساتھ کی گئی فکسڈ ڈپازٹ پر فی جمع کنندہ فی بینک پانچ لاکھ روپے تک کی انشورنس سکیورٹی ملتی ہے۔  صارفین امیزون پے کے ذریعے براہ راست فکسڈ ڈپازٹ فیچر کا استعمال کر سکتے ہیں، جہاں وہ شراکت دار اداروں کی پیشکشوں کا موازنہ کر سکتے ہیں، اپنی پسند کا بینک یا این بی ایف سی اور مدت منتخب کر سکتے ہیں۔