۲؍ ہزار کروڑ روپے کی سرمایہ کاری کی مدد سے آپریشنل انفراسٹرکچر کو وسعت دی جائے گی، اپ گریڈ کیا جائے گا۔

اپنے آپریشنل نیٹ ورک کو بہتر بنانے کے تئيں اپنی عہد بندی کے تحت، آن لائن مارکیٹ پلیس امیزون رواں سال۲۰۲۵ء میں ۲؍ ہزار کروڑ روپے یعنی۲۳۳؍ ملین ڈالر سے زیادہ کی سرمایہ کاری کر نے جارہی ہے۔ 
 کمپنی نے جمعرات کو جاری کردہ بیان میں کہا کہ اس سرمایہ کاری کی مدد سے آپریشنل انفراسٹرکچر کو وسعت دی جائے گی، اپ گریڈ کیا جائے گا، ساتھیوں کے تحفظ میں اضافہ کیا جائے گا، فلاحی پروگرام چلائے جائیں گے اور اس کی تکمیل کے لئے نئے آلات اور ٹیکنالوجی تیار کی جائے گی۔ امیزون کے آپریشنل نیٹ ورک کےلئے کی گئی سرمایہ کاری میں یہ سرمایہ کاری سب سے اہم ہےجس سے کمپنی کو ہندوستان بھر میں تمام حلقوں تک پہنچانے میں مدد ملے گی۔ 
  امیزون انڈیا اور آسٹریلیا آپریشنز کے نائب صدر ابھینو سنگھ نے کہا، ’’ہم ایک دہائی سے زیادہ طویل عرصے سے ہندوستان میں بہترین لاجسٹکس انفراسٹرکچر بنا رہے ہیں جس سے ہم پورے ملک میں اپنے صارفین کو محفوظ طریقے سے، تیزی سے اور قابل اعتماد طریقے سے خدمات فراہم کرنے پر قادر ہورہے ہیں ۔ یہ نئی سرمایہ کاری ہمارے ڈھانچے کے نیٹ ورک کو بڑھانے اور اپ گریڈ کرنے کے ہمارے عزم کو ظاہر کرتی ہے، تاکہ ہمارے ڈھانچے کو مکمل اور نیٹ ورک کو مضبوط بنایا جا سکے۔ ہم امیزون کو ہندوستان بھر کے صارفین کی بہتر خدمت کے لئے پوزیشن دے رہے ہیں ۔ ساتھ ہی ساتھ اپنے ملازمین، ساتھیوں اور شراکت داروں کی بھی مدد کر رہے ہیں جو یہ سب ممکن بناتے ہیں۔ ‘‘
 انہوں نے کہا، ’’ نئی سرمایہ کاری کی مدد سے، امیزون نئے مراکز شروع کرنے اور اپنی ترتیب اور ترسیل کے نیٹ ورک کو اپ گریڈ کرنے کا ارادہ رکھتا ہے۔ اس سرمایہ کاری سے پروسیسنگ کی صلاحیت میں اضافہ ہوگا اور کمپنی کے آپریشن نیٹ ورک کی کارکردگی میں بہتری ہوگی جس سے ہندوستان بھر کے صارفین کو امیزون کی سروس زیادہ تیزی اور قابل اعتماد طریقے سے حاصل کرنے میں مدد ملے گی۔ امیزون کے آپریشنز نیٹ ورک میں موجودہ عمارتیں اور نئی عمارتیں دونوں جدید ٹیکنالوجی اور موثر بلڈنگ سسٹم کے ساتھ ڈیزائن کی گئی ہیں تاکہ توانائی کے استعمال کو کم کیا جا سکے۔ ‘‘ انہوں نے مزید کہا، ’’امیزون کے تکمیلی مراکز معذور افراد کے لئے محفوظ اور زیادہ قابل رسائی بنائے گئے ہیں ۔ یہ اسٹریٹجک سرمایہ کاری ہندوستان میں اپنے کاروبار کو بڑھانے، فروخت کنندگان کو بااختیار بنانے، صارفین کی سہولت کو بڑھانے اور مقامی معیشتوں کو مضبوط کرنے میں مدد کرنے کے لئے امیزون کے عزم کو ظاہر کرتی ہے۔ ‘‘