یہاں مانکولی علاقے میں واقع بلیو اوشین لائن پرائیویٹ لمیٹڈ کے کولڈ اسٹوریج پلانٹ میں جمعہ کو امونیا گیس کے اچانک رساؤ کا واقعہ پیش آیا جس کے باعث پلانٹ کے احاطے اور اطراف میں وقتی طور پر خوف و ہراس کی کیفیت پیدا ہو گئی۔  اطلاع ملتے ہی فائر بریگیڈ کی ۲؍ گاڑیاں فوری طور پر جائے وقوع پر پہنچ گئیں اور پانی کا چھڑکاؤ کرتے ہوئے ہوا میں پھیلتی امونیا گیس پر قابو پالیا جس کے نتیجے میں بڑا حادثہ ٹل گیا۔

اس بارے میں ذرائع کے مطابق امونیا گیس کا زیادہ اخراج انسانی صحت کے لیے مضر ثابت ہو سکتا ہے اور اس کے اثرات میں سانس لینے میں دشواری اور آنکھوں میں جلن جیسی علامات شامل ہیں۔

امونیا گیس کے رساؤ کے بعدبروقت کارروائی کے باعث کسی کے متاثر ہونے کی باضابطہ اطلاع موصول نہیں ہوئی ہے۔ دوسری جانب کولڈ اسٹوریج پلانٹ کے انچارج پروین مدن اور ان کے ساتھی عملے نے فوری مستعدی کا مظاہرہ کرتے ہوئے اس مقام کو بند کروا دیا جہاں سے گیس کا اخراج ہو رہا تھا، جس سے صورتحال مزید سنگین ہونے سے بچ گئی۔  واقعے کے بعد حالات مکمل طور پر قابو میں بتائے جا رہے ہیں۔ متعلقہ محکمے کی جانب سے گیس رساؤ کی وجوہات کی جانچ اور آئندہ اس نوعیت کے واقعات کی روک تھام کیلئے انتظامات کا جائزہ لیا جا رہا ہے۔