وزیر ریل نے راجیہ سبھا کو بتایا کہ تصادم مخالف ڈیوائس کا بڑے پیمانے پر استعمال کرنے کی منظوری گزشتہ مہینے کئی ٹرائل مکمل ہونے کے بعد ملی ہے۔

وزیر ریل اشوینی ویشنو نے جمعہ کو راجیہ سبھا کو یہ اطلاع فراہم کی کہ ٹرینوں میں تصادم مخالف ڈیوائس یعنی `’کو َچ‘ کا بڑے پیمانے پر استعمال اب شروع ہو جائے گاکیونکہ کووچ ۴ء۰؍ کو گزشتہ مہینےحتمی منظوری مل گئی ہے۔ ایوان میں وقفہ سوالات کے دوران ایک سوال کے جواب میں  ویشنو نے کہا کہ کووچ کو۲۰۱۶ء میں منظوری دی گئی تھی اور تب سے اب تک اس کی مرحلہ وار جانچ جاری تھی لیکن اب گزشتہ مہینے  ۱۶؍ جولائی کو اسے باقاعدہ منظوری دے دی گئی ہے کیوں کہ اس کے تقریباً تمام ٹرائل مکمل ہو گئے ہیں۔  اب جلد ہی ٹرینوں میں اس سسٹم کو نصب کیا جائے گا۔
 وزیر ریل اشوینی ویشنو نے مزید کہا کہ ٹرینوں میں تصادم مخالف آلات کی تنصیب کا کام ۲۰۰۶ءمیں شروع ہوا تھا لیکن اپنے مقاصد میں کامیاب نہ ہونے کی وجہ سے ۲۰۱۲ء میں اس کا استعمال روک دیا گیا تھا۔ انہوں نے کہا کہ جیسے جیسے ٹرینوں کی رفتار بڑھنے لگی، ویسے ویسے  عالمی سطح پر ٹکراؤ روکنے والے آلات استعمال ہونے لگے لیکن ہندوستان میں ایسا نہیں ہوسکا مگر اب گزشتہ ۸؍ سال کے مسلسل ٹرائلس کے بعد یہ امید کی جاسکتی ہے کہ `’کو َچ‘سسٹم ٹرینوں کا تصادم روکنے میں اہم کردار ادا کرے گا۔ 
ایک ضمنی سوال کے جواب میں وزیر ریل نے یہ اطلاع بھی فراہم کی کہ  طویل  فاصلے کےریلوے ٹریک بچھانے کا کام بھی تیز رفتاری سے کیا جا رہا ہے تاکہ طویل فاصلے پر فکس پلیٹیں لگائی جاسکیں اور ٹریک کو مضبوط بنایا جاسکے۔ انہوں نے کہا کہ اب تک ۶۳؍ ہزار کلومیٹر طویل ایسے ٹریک بچھائے جا چکے ہیں ۔ ممبئی احمدآباد بلٹ ٹرین پروجیکٹ میں تاخیر سے متعلق سوالات کے جواب میں اشوینی  ویشنو نے کہا کہ دنیا بھر میں جہاں کہیں بھی بلٹ ٹرین پروجیکٹ شروع ہوا ہے اسے ۲۰؍ لگے ہیں لیکن ہمارے یہاں ایسا نہیں ہو گا۔