وزارت اعلیٰ کے عہدہ پر اُنہیں ہی فائز رکھنے کا فیصلہ، جیل سے سرکاری کام کاج کی حکمت عملی پر غور، ضرورت ہوئی تو کورٹ سے اجازت طلب کی جائے گی۔

عام آدمی پارٹی کے خلاف  ای ڈی کی سرگرمی اور وزیراعلیٰ اروند کیجریوال کے خلاف سمن کو دیکھتے ہوئے پیر کو دہلی میں’’آپ‘‘ کے تمام اراکین اسمبلی کی میٹنگ طلب کی گئی جہاں اس بات پر اتفا ق کیاگیا کہ گرفتار ہونے کی صورت میں بھی اروند کیجریوال وزیراعلیٰ کے عہدہ پر فائز رہیں گے۔اس کی اطلاع سوربھ بھاردواج نے میٹنگ کے بعد پریس کانفرنس میں  دی۔
دہلی شراب پالیسی میں اروند کیجریوال کو سمن  جاری کئے جانے کے بعد سے ہی ان کی گرفتاری کا اندیشہ ظاہر کیا جارہاہے۔ سوربھ بھاردواج نے ای ڈی کی کارروائی کو ’’سیاست سے متاثر‘‘ قرار دیتے ہوئے بتایا کہ میٹنگ میں شریک تمام اراکین اسمبلی نے کیجریوال سے اپیل کی ہے کہ ’’وہ گرفتار ہونے پر بھی وزارت اعلیٰ پر فائز رہیں گے کیوں کہ انہیں اس عہدہ پر دہلی کے عوام نے بٹھایا ہے۔ ‘‘  ’آپ‘ لیڈر نے کہا کہ تمام ایم ایل اے اس رائے کے حامل ہے کہ مودی ،کیجریوال سے خوفزدہ ہیں، بی جے پی جانتی ہے کہ وہ انہیں الیکشن کے ذریعہ اقتدار سے بے دخل نہیں کرسکتے اس لئے جانچ ایجنسیوں کا استعمال کررہے ہیں۔  بھاردواج نےبتایا کہ اگر کیجریوال گرفتار ہوگئے تو ’’میٹنگ کیلئے افسران جیل جائیں گے۔‘‘ انہوں نے مزیدکہا کہ ’’اگر ہمیں  بلایا گیا تو ہم بھی خوشی خوشی جائیں گے۔‘‘
 پریس کانفرنس میں موجود آتشی نے بتایا کہ کیجریول کے گرفتار ہوتے ہی عام آدمی  سرکاری کام کاج جیل سے جاری رکھنے کیلئے پارٹی کورٹ سے رجوع کریگی۔ سوربھ بھاردواج نے کہا کہ ’’جو حالات ہیں ان کو دیکھتے ہوئے لگتا ہے کہ میں اور آتشی بھی جیل جائیں گے۔ ہم وہیں کابینہ کی میٹنگ کیا کریں گے۔‘‘ واضح رہے کہ آپ کے کئی لیڈر گرفتار ہوچکے ہیں۔