ٹکٹوں کے دام بہت زیادہ ہونے کو اہم وجہ قرار دیا جارہا ہے ، ساتھ ہی میچ میں روہت شرما اور وراٹ کوہلی کے نہ ہونے کے سبب بھی ٹکٹ فروخت نہیں ہو رہے ہیں۔

عام طور پر ہندوستان-پاکستان میچ کے ٹکٹ چند گھنٹوں میں ہی فروخت ہو جاتے ہیںلیکن اتوار(۱۴؍ستمبر) کو ہونے والے ایشیا کپ مقابلہ کی ٹکٹ فروخت ہی نہیں ہو پا رہی ہے۔ جو خبریں سامنے آ رہی ہیں، ان کے مطابق میچ میں صرف ۲؍ دن رہ گئے ہیں اور بڑی تعداد میں ٹکٹیں فروخت ہونی باقی ہیں۔ ٹکٹ فروخت نہ ہونے کی ایک وجہ اس کی بہت  زیادہ قیمت بتائی جا رہی ہے، لیکن ایک وجہ روہت اوروراٹ بھی بتائے جا رہے ہیں۔رپورٹس کے مطابق ٹکٹوں کی اونچی قیمت نے فروخت کو کافی متاثر کیا ہے۔ 
 ایسٹ اسٹینڈ میں ۲؍ وی آئی پی ٹکٹوں کی قیمت ڈھائی  لاکھ روپے ہے۔ اس ٹکٹ کو خریدنے پر ناظرین کے  لئے بہترین سیٹ کے ساتھ کھانے پینے کا بھی انتظام ہوگا۔ اس ٹکٹ کو خریدنے پر پارکنگ پاس، وی آئی پی لاؤنج اور ریسٹ روم بھی ملے گا۔ وی آئی پی ٹکٹ کے علاوہ رائل باکس میں ٹکٹ کی قیمت۲؍ لاکھ ۳۰؍ ہزار روپے ہے۔ اسی طرح   اسکائی باکس کے  لئے ۱ء۶؍ لاکھ روپے خرچ کرنے ہوں گے۔ یہاں تک کہ پلاٹینم ٹکٹ کی قیمت بھی آسمان چھو رہی ہے، جو ۷۵؍ ہزار روپے میں مل رہی ہے۔ سب سے سستے ٹکٹ کی بات کریں تو ۲؍سیٹ بُک کرنے کے  لئے آپ کو تقریباً۱۰؍ ہزار  روپے خرچ کرنے ہوں گے۔
 امارات کرکٹ بورڈ کے ایک افسر نے اے این آئی کو  بتایا کہ ہندوستان-پاکستان میچ کی ٹکٹوں کی کم فروخت سے تمام افسران چونک گئے ہیں۔ انہوں نے بتایا کہ چمپئن ٹرافی  کے ٹکٹ ۴؍ منٹ میں   فروخت ہو گئے تھے لیکن اس بار حالات خراب ہیں۔ افسر نے خدشہ ظاہر کرتے ہوئے کہا کہ ٹکٹوں کی فروخت میں کمی کی ایک وجہ روہت شرما اور وراٹ کوہلی کی غیر موجودگی بھی ہو سکتی ہے جنہوں نے ٹی ٹوینٹی سے ریٹائرمنٹ لے لیا ہے۔